ރާއްޖޭގެ ފަތުރުވެރިކަމުގެ ސިނާއަތުގައި ރިސޯޓުތަކުން ފަތުރުވެރިންނަށް ދެމުންދާ ހިދުމަތްތައް، މީހުން ދިރިއުޅޭ ރަށްރަށުގެ ހޮޓާތަކުން ދިނުމުގެ ފުރުސަތު ނެތުމަކީ ވަރަށް ބޮޑު ބޭއިންސާފެއް ކަމަށް ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، ރާއްޖޭގައި އެންމެ ފުޅާ ދާއިރާއެއްގައި ގެސްޓްހައުސް ވިޔަފާރިކުރާ މާފުށީގެ ޓޫރިޒަމް ބްރޭންޑް ”ހާޓް އޮފް މޯލްޑިވްސް“ އިފްތިތާހުކުރުމަށް ރޭ އެ ރަށުގައި ބޭއްވި ހާއްސަ ރަސްމިއްޔާތެއްގައެވެ.
ރައީސް ނަޝީދު ފާހަގަކުރެއްވީ، މިވަގުތު ރާއްޖޭގައި ކަންކަން ހަމަޖެހިފައިވާ ގޮތުން، ރިސޯޓުތަކުގައި ފަތުރުވެރިންނަށް ލިބޭ ހިދުމަތްތަކާއި ވިއްކާ ތަކެތި، މީހުން ދިރިއުޅޭ ރަށްރަށުގެ ހޮޓާތަކުން ނުލިބޭކަން ކަމަށެވެ. “
”މިވަގުތުވެސް މި ރާއްޖޭގައި ކަންކަން ހަމަޖެހިފައިމިވާގޮތުން، ރިސޯޓްފަހަރުގައި ޓުއަރިސްޓުންނަށްދޭ ހިދުމަތްތައް، ވިއްކާ ތަކެތި، ބޮޑެތި މިހިރަ ހޮޓާތަކުން ނުދެވޭކަން. އެއީ ބޭއިންސާފެއް. އެ ހަމަހަމަކަން ގެނައުމަށް އަޅުގަނޑުމެން ވިސްނާ ން ޖެހޭނެ،“ ނަޝީދު ވިދާޅުވިއެވެ.
ރާއްޖެއަށް މިހާރު ދެ މިލިއަނަށްވުރެ ގިނަ ފަތުރުވެރިން އަންނަ ކަމަށާއި، އޭގެތެރެއިން ދެ ލައްކައެއްހާ ފަތުރުވެރިން މާފުށި ފަދަ މީހުން ދިރިއުޅޭ ރަށްރަށަށް އަންނާތީ، މި ފަދަ ހިދުމަތްތައް ރަށްރަށުން ވެސް ލިބެން ހުންނަން ޖެހޭނެ ކަމަށް ނަޝީދު ވަނީ ބަޔާންކުރައްވާފައެވެ. އެމަނިކުފާނު ވިދާޅުވީ، މީހުން ދިރިއުޅޭ ރަށްރަށާއި ރިސޯޓުތަކާ އަޅާ ބަލާއިރު، ހުރިހާ ރަށެއްގައި ވެސް އޮތީ ހަމަ އެއްކަހަލަ ގޮނޑުދޮށްތަކާއި މޫދާއި ގަސްކަރަޔާއި ފަސްގަނޑެކެވެ. އެހެންކަމުން، ރިސޯޓެއްގައި ނަގާ ނަފާ، މީހުން ދިރިއުޅޭ ރަށެއްގައި ނުނެގޭންވީ އެއްވެސް ސަބަބެއް ނެތް ކަމަށް ވެސް އެމަނިކުފާނު ފާހަގަކުރެއްވިއެވެ.
ނަޝީދުގެ ވެރިކަމުގައި، 2010 ވަނަ އަހަރު މާފުށީގައި ލޯކަލް ޓޫރިޒަމްގެ ވިޔަފާރި ފެށުނު ދުވަސްވަރާ އަޅާބަލާއިރު، ލޯކަލް ޓޫރިޒަމާ އެކު މާފުށީގެ އިގުތިސާދު އެތައް ގުނައަކަށް އުފުލިފައިވާކަން ނަޝީދު ފާހަގަކުރެއްވިއެވެ. ރަށްރަށުގައި ޓޫރިޒަމްގެ ވިޔަފާރިކުރަން ހުއްދަ ދިނީ ވެސް މި ސަބަބާ ހުރެ ކަމަށް އެމަނިކުފާނު ވިދާޅުވިއެވެ.
މި ރަސްމިއްޔާތުގައި ރައީސް ނަޝީދުގެ އިތުރުން ކުރީގެ ޓޫރިޒަމް މިނިސްޓަރު ޑރ. އަބްދުﷲ މައުސޫމް، މާފުށީ ކައުންސިލްގެ މެންބަރުން، ގެސްޓްހައުސް ވިޔަފާރިވެރިންނާއި މުވައްޒަފުން، އަދި އެ ރަށުގެ ރައްޔިތުން ވަނީ ބައިވެރިވެފައެވެ.
