ކުދި ވިޔަފާރިތަކަށް ހާއްސަކޮށް އިކޮނޮމިކް ރިލީފް ޕެކޭޖްގެ ދަށުން ދޫކުރެވޭ ލޯނަށް އެދުމުގެ ފުރުސަތު ހުޅުވާލައިފިއެވެ.
ބޭންކް އޮފް މޯލްޑިވްސް މެދުވެރިކޮށް ދޫކުރެވޭ އިކޮނޮމިކް ސްޓިމިއުލަސް ލޯނަށް އެދި މިމަހު 20 ވަނަ ދުވަހުން ފެށިގެން ހުށަހެޅޭނެ ކަމަށާއި ކޯވިޑް-19، އިކޮނޮމިކް ސްޓިމިއުލަސް ލޯނު މެދުވެރިކޮށް 10 މިލިއަން ރުފިޔާ އާ ހަމަޔަށް އެދި ލޯނަށް ހުށަހެޅޭނެކަމަށް ބޭންކް އޮފް މޯލްޑިވެސް އިން ވިދާޅުވެއްޖެއެވެ.
ފިނޭންސް މިނިސްޓަރ އިބްރާހިމް އަމީރު ވިދާޅުވި ގޮތުގައި މިލޯނު ދޫކުރުމުގެ މައިގަނޑު މަޤްސަދަކީ ރާއްޖޭގެ އުފެއްދުންތެރިކަން އިތުރުކޮށް، އިޤްތިސާދުގެ ވިލުންވެރިކަން އިތުރުކުރުމަށް ވިޔަފާރިތަކަށް އެހީތެރިވުމެވެ. އަދި މިލޯނު ދޫކުރާނީ ރަހުނަކާ ނުލައި %6 އިންޓަރެސްޓް ރޭޓުގައި، 4 އަހަރުން އަނބުރާ ދައްކާ ގޮތަށެވެ. އަދި ލޯނު ދެއްކުމަށް ގިނަވެގެން 12 މަސް ދުވަހުގެ ގްރޭސް ޕީރިއަޑެއް ލިބޭނެކަމަށް މިނިސްޓަރ އަމީރު ވަނީ ވިދާޅުވެފައެވެ.
ފިނޭންސް މިނިސްޓްރީގެ ތަފާސް ހިސާބުތައް ދައްކާގޮތުން މިއަހަރުގެ ޖަނަވަރީމަހުގެ ނިޔަލަށް ”ކޯވިޑް19 ރިކަވަރީ ލޯނު ސްކީމް“ގެ ދަށުން ބޮޑެތި ވިޔަފާރިތަކަށް 585.9 މިލިއަން ރުފިޔާއާއި 8 މިލިއަން ޑޮލަރު ވަނީ ދޫކޮށްފައެވެ. މިއީ ޖުމްލަ 419 ވިޔަފާރިއަކަށް ދޫކޮށްފައިވާ ލޯނުގެ އަދަދެވެ.
