ދުނިޔޭގެ އެކި ކަންކޮޅުތަކުގައި ތިބި އެތައް މިލިއަން ސަޕޯޓަރުންގެ ލޯބި ހޯދާފައިވާ ބޮލީވުޑްގެ ރަސްގެފާނު ޝާހްރުކް ޚާންގެ އާ ފިލްމު ”ކިންގް“ ސިނަމާތަކަށް އަންނާނެ ތާރީޚު ރަސްމީކޮށް އިއުލާންކޮށްފިއެވެ.
ސިދާތު އާނަންދު ޑައިރެކްޓްކުރާ މި ފިލްމު ރިލީޒްކުރުމަށް ހަމަޖެހިފައިވަނީ 24 ޑިސެމްބަރު 2026 ގައެވެ.
މި ފިލްމުގެ ރިލީޒް ޑޭޓް އިއުލާންކޮށްފައިވަނީ ޝާހްރުކް ޚާން އާއި ސިދާތު އާނަންދުގެ ކާމިޔާބު ފިލްމު ”ޕަތާން“ އަށް ތިން އަހަރު ފުރުނު މުނާސަބަތާ ދިމާކޮށް، ހޮނިހިރު ދުވަހު އިންސްޓަގްރާމް މެދުވެރިކޮށް އާންމުކުރި ޚާއްޞަ ވީޑިއޯއަކާ އެކުގައެވެ. ޝާހްރުކް އާންމުކުރި މި ޕްރޮމޯ ވީޑިއޯއިން ފެންނަނީ އޭނާގެ މުޅިން ތަފާތު، އެކްޝަން އަވަތާރެކެވެ. ”އިޓްސް ޓައިމް ޓު ރޯ، އެންޑް އެންޑް ދަ އިޔާ ވިތު ފިއާ“ މި އިބާރާތާއެކު ފެށޭ މި ވީޑިއޯގައި، ލޭލޭ ހުރި ގަމީހެއްގައި ހުރި ޝާހްރުކް އިމާރާތެއްގެ ބިއްލޫރި ފުރާޅެއް ފަޅާލާފައި އެތެރެއަށް ފުންމާލާ މަންޒަރު ފެނިގެންދެއެވެ. މި ޕްރޮމޯއާއެކު ޝާހްރުކް ލިޔެފައިވަނީ ”ކިންގް ތައްޔާރުވަނީ 24.12.2026 ގައި ގުގުމާލުމަށް“ ކަމަށެވެ.
މި ފިލްމުގެ މަސައްކަތް ފެށިގެން އުޅޭކަން ފުރަތަމަ ހާމަކުރީ 2025 ވަނަ އަހަރުގެ ނޮވެމްބަރު 2 ގައި ފާހަގަކުރި ޝާހްރުކްގެ އުފަންދުވަހުއެވެ. އެ ދުވަހު އާންމުކުރި މައުލޫމާތުތަކާއެކު ފިލްމަށް އޮތް އިންތިޒާރު ބޮޑުވެގެންދިޔައީ، ޝާހްރުކްގެ ނުރަ އިސްތަށިގަނޑާއި، ”ބިރުގަތުމެއް ނޫން، އަހަރެން މިއީ ބިރުވެރިކަން“ (ޑަރް ނަހީ، ދެހްޝަތު ހޫން) މި ވަރުގަދަ ޑައިލޮގްގެ ސަބަބުންނެވެ.
ރެޑް ޗިލީޒް އެންޓަޓެއިންމަންޓާއި މާފްލިކްސް ޕިކްޗާސް ގުޅިގެން އުފައްދާ މި ފިލްމަކީ ވަރަށް ބޮޑު ބަޖެޓެއްގެ ސިނަމެޓިކް އިވެންޓަކަށް ވެގެންދާނެ ކަމަށް ބެލެވެއެވެ. ޝާހްރުކްގެ އިތުރުން މި ފިލްމުގެ މުހިންމު ރޯލުތަކުން އޭނާގެ ދަރިފުޅު ސުހާނާ ޚާން އާއި، ދީޕިކާ ޕަދުކޯން އަދި އަބީޝެކް ބައްޗަން ފެނިގެންދާނެއެވެ.
2026 ވަނަ އަހަރުގެ ކްރިސްމަސް ބަންދާ ދިމާކޮށް މި ފިލްމު ރިލީޒްކުރުމަށް ނިންމުމަކީ، އަހަރު ނިންމާލުމަށް ސަޕޯޓަރުންނަށް ލިބޭނެ އެންމެ ބޮޑު ހަދިޔާ ކަމަށް ގިނަ ބަޔަކު ސޯޝަލް މީޑިއާގައި ބުނަމުންދެއެވެ.
