ޖަޕާނު ސަރުކާރުގެ އެހީގައި ދިވެހިރާއްޖޭގެ ސިއްހީ ދާއިރާ އިތުރަށް ހަރުދަނާކުރުމަށްޓަކައި، ރާއްޖެއަށް ސީ އެމްބިއުލާންސެއް ހަދިޔާކޮށްފިއެވެ.
މިކަމާ ގުޅޭގޮތުން ދިފާއީ ވުޒާރާއިން އެކްސްގައި ކުރި ޕޯސްޓެއްގައި ބުނެފައިވަނީ، ޖަޕާނު ސަރުކާރުގެ ފަރާތުން ރާއްޖެއަށް މި ސީ އެމްބިއުލާންސް ހަދިޔާކޮށްފައިވަނީ އިއްޔެ ބޭއްވި ހާއްސަ ރަސްމިއްޔާތެއްގައި ކަމަށެވެ.
މި ރަސްމިއްޔާތުގައި ޖަޕާނު ސަރުކާރުގެ ފަރާތުން މި އުޅަނދު ރަސްމީކޮށް ހަދިޔާކޮށްދެއްވީ އެ ގައުމުން ރާއްޖެއަށް ކަނޑައަޅުއްވާފައި ހުންނަވާ ސަފީރު އިޝިގާމީ ރުމިކޯއެވެ. ދިވެހި ސަރުކާރުގެ ފަރާތުން މި އެހީއާ ހަވާލުވެލެއްވީ ދިފާއީ ވަޒީރު މުޙައްމަދު ޣައްސާން މައުމޫނެވެ.
ދިފާއީ ވުޒާރާއިން މައުލޫމާތު ދެއްވި ގޮތުގައި، މި ސީ އެމްބިއުލާންސަކީ ޖަޕާނު ސަރުކާރުގެ ”ގްރޭންޓް އެއިޑް ފޯ އިކޮނޮމިކް އެންޑް ސޯޝަލް ޑިވެލޮޕްމެންޓް“ ޕްރޮގްރާމްގެ ދަށުން ރާއްޖެއަށް ފޯރުކޮށްދިން އެހީއެކެވެ. މި އުޅަނދުގެ ސަބަބުން ރަށްތަކުގެ މެދުގައި ބަލިމީހުން އުފުލުމާއި، ކުއްލި ހާލަތްތަކުގައި ސިއްހީ ފަރުވާ ފޯރުކޮށްދިނުމުގެ ނިޒާމު އިތުރަށް ހަލުވިވެ، ހަރުދަނާވެގެންދާނެ ކަމަށް އެ ވުޒާރާއިން ފާހަގަކުރައްވައެވެ.
ޖަޕާނަކީ ރާއްޖޭގެ ތަރައްގީގެ މުހިންމު ބައިވެރިއެކެވެ. އެ ގައުމުން ދަނީ ރާއްޖޭގެ އެކި ދާއިރާތަކުން، ހާއްސަކޮށް އިޖުތިމާއީ އަދި އިގުތިސާދީ ދާއިރާއިން ބޭނުންވާ މުހިންމު އެހީތެރިކަން މެދުނުކެނޑި ފޯރުކޮށްދެމުންނެވެ. މީގެ ތެރޭގައި ހިލޭ އެހީގެ ދަށުން ހިންގާ ތަފާތު މަޝްރޫއުތަކާއި ވަސީލަތްތައް ފޯރުކޮށްދިނުން ހިމެނެއެވެ.
