އަންނަ އޭޕްރީލް މަހުގެ 4 ވަނަ ދުވަހު ބޭއްވުމަށް ހަމަޖެހިފައިވާ ލޯކަލް ކައުންސިލްތަކުގެ އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިހާބުގައި، އެންމެ ގިނަ ކެންޑިޑޭޓުން ކުރިމަތިލާފައިވަނީ ވެރިކަންކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) އިން ކަމަށް އިލެކްޝަންސް ކޮމިޝަނުން ހާމަކޮށްފިއެވެ.
ޕީއެސްއެމް ނިއުސްގެ ”ރާއްޖެ މިއަދު“ ޕްރޮގްރާމުގައި ވާހަކަދައްކަވަމުން އިލެކްޝަންސް ކޮމިޝަނުގެ ނައިބު ރައީސް އަބްދުއްރަޙްމާން ސަލާހު ރަޝީދު ވަނީ އިންތިހާބަށް ކުރިމަތިލީ ފަރާތްތަކުގެ ތެރެއިން ކެންޑިޑެންސީ ސައްހަވި ފަރާތްތަކުގެ ތަފްސީލްތައް ހާމަކުރައްވާފައެވެ.
އިލެކްޝަންސް ކޮމިޝަނުގެ ތަފާސްހިސާބުތަކަށް ބަލާއިރު، ކައުންސިލް އިންތިހާބުގައި ޖުމްލަ 6 ސިޔާސީ ޕާޓީއަކުން 1,210 ކެންޑިޑޭޓުން ވާދަކުރެއެވެ. އަދި އަމިއްލަ ގޮތުން 401 ފަރާތަކުން ވާދަކުރާއިރު، އިންތިހާބުގައި ވާދަކުރުމުގެ ފުރުސަތު ރަސްމީކޮށް ލިބިފައިވަނީ ޖުމްލަ 1,611 ކެންޑިޑޭޓުންނަށެވެ.
ކައުންސިލް އިންތިހާބުގައި ޕާޓީތަކުން ވާދަކުރާ ކެންޑިޑޭޓުންގެ އަދަދު:
- ޕީއެންސީ: 665 ކެންޑިޑޭޓުން
- އެމްޑީޕީ: 495 ކެންޑިޑޭޓުން
- އެމްޑީއޭ: 31 ކެންޑިޑޭޓުން
- ޖުމްހޫރީ ޕާޓީ: 8 ކެންޑިޑޭޓުން
- ދަ ޑިމޮކްރެޓްސް: 8 ކެންޑިޑޭޓުން
- ޢަދާލަތު ޕާޓީ: 3 ކެންޑިޑޭޓުން
އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ (ޑަބްލިއުޑީސީ) އިންތިހާބަށް ބަލާއިރު، އިލެކްޝަންސް ކޮމިޝަނުން ވަނީ 1,383 ކެންޑިޑޭޓުންގެ ފޯމު ބަލައިގެންފައެވެ. މި އިންތިހާބުގައި ވެސް އެންމެ ގިނަ ކެންޑިޑޭޓުން ނެރެފައިވަނީ ވެރިކަންކުރާ ޕީއެންސީންނެވެ. އެ ޕާޓީން 658 ކެންޑިޑޭޓުން ވާދަކުރާއިރު، އިދިކޮޅު އެމްޑީޕީން ވާދަކުރަނީ 417 ކެންޑިޑޭޓުންނެވެ. މީގެ އިތުރުން އެމްޑީއޭ އިން 28، ޖުމްހޫރީ ޕާޓީން 7 އަދި ޢަދާލަތު ޕާޓީން 6 ކެންޑިޑޭޓުން ވާދަކުރާއިރު، އަމިއްލަ ގޮތުން 267 ކެންޑިޑޭޓުން ވާދަކުރެއެވެ.
ސަލާހު ރަޝީދު އިތުރަށް ވިދާޅުވީ، ބައެއް ރަށްރަށުގެ ކައުންސިލްތަކަށް އިންތިހާބުކުރަންޖެހޭ އަދަދަށް އެކަނި މީހުން ކުރިމަތިލާފައިވާތީ، ބައެއް ގޮނޑިތައް މިހާރުވެސް ކަށަވަރުވެފައިވާ ކަމަށެވެ.
އިލެކްޝަންސް ކޮމިޝަނުން މިހާރު ތައްޔާރުވަމުންދަނީ އަންނަ ހަފްތާގައި ކެންޑިޑޭޓުންގެ މެދުގައި ނަންބަރު ތަރުތީބު ކުރުމަށް ގުރުއަތުލުން ބޭއްވުމަށެވެ. ނަން އަނބުރާ ގެންދަން ބޭނުންވާ ފަރާތްތަކަށް އެ ފުރުސަތު އޮންނާނީ ގުރުއަތުލުމުގެ ކުރިން ކަމަށް ވެސް އެ ކޮމިޝަނުން މައުލޫމާތު ދެއެވެ.
