ލީބިޔާގެ ކުރީގެ ޒަޢީމް ކާނަލް މުއައްމަރު ޣައްޒާފީގެ ދަރިކަލުން ސައިފުލް އިސްލާމް ޣައްޒާފީ އަވަހާރަކޮށްލައިފިއެވެ. ޣައްޒާފީގެ ދަރިކަލުން ސައިފުލް އިސްލާމް ޣައްޒާފީ އަވަހާރަކޮށްލާފައިވާކަން ޣައްޒާފީގެ އާއިލާއާ ގާތްގުޅުން އޮންނަ މަސްދަރުތަކުންވެސް ވަނީ ކަށަވަރުކޮށްދީފަ އެވެ. މި ހާދިސާއާ ގުޅިގެން ލީބިޔާގެ ސިޔާސީ މަސްރަހަށް ވަނީ ނުހަނު ބޮޑު ސިހުމެއް ލިބިފައެވެ.
ސައިފުލް އިސްލާމް ޣައްޒާފީ އަވަހާރަކޮށްލާފައިވަނީ ލީބިޔާގެ ވެރިރަށް ޓްރިޕޮލީގައި އުޅޭ ހަތިޔާރުއެޅި ހަނގުރާމަވެރި ޖަމާޢަތެއް ކަމަށްވާ 444 ވަނަ ބްރިގޭޑާއެކު ހިނގި ކުރިމަތިލުމެއްގައި ކަމަށް ތުހުމަތު ކުރެއެވެ. ނަމަވެސް، 444 ވަނަ ބްރިގޭޑުން ދަނީ އެކަމުގައި ބައިވެރި ނުވާކަމަށް ބުނަމުންނެވެ.
ޢަރަބި މީޑިއާއިން ރިޕޯޓްކޮށްފައިވާ ގޮތުގައި، ސައިފުލް އިސްލާމް އަވަހާރަ ކޮށްލާފައިވަނީ ބަގީޗާއެއްގެ ތެރޭގައި ހުންނަވަނިކޮށް ހަތަރު މީހަކު އެ ސަރަހައްދަށް ވަދެ ބަޑިން ހަމަލާދީގެންނެވެ. ނަމަވެސް ބައެއް ފަރާތްތަކުން ތުހުމަތުކުރާ ގޮތުގައި، ސައިފުލް އިސްލާމް އަވަހާރަކޮށްލާފައިވަނީ، ޢަރަބި ޢިމާރާތާއި، އިޒުރޭލުގެ މޮސާޑު ގުޅިގެން ހިންގި އޮޕަރޭޝަނެއްގައެވެ. މި ހަމަލާ ދިނުމަށްފަހު ސައިފުލް އަށް ހަމަލާދިން މީހުން ވަނީ އެ ސަރަހައްދުން ފިލާފައިވާކަމަށްވެސް ބައެއް މަސްދަރުތަކުން ބުނެއެވެ.
ލީބިޔާގެ ރަސްމީ ނޫސް އެޖެންސީ ”ލާނާ“ އިން ވަނީ ސައިފުލް އިސްލާމްގެ މުޝީރު ޢަބްދުﷲ އުޘްމާނާ ހަވާލާދީ އޭނާ އަވަހާރަވިކަން ކަށަވަރުކޮށްދެއްވާފައެވެ. ނަމަވެސް މި ހަމަލާގެ ފަހަތުގައިވަނީ ކޮން ބައެއްކަން އެފަރާތުން ހާމަކޮށްފައެއް ނުވެއެވެ.
