މާލޭގެ އެންމެ ބާރުބޮޑު ސަރަހައްދުގެ ބޮޑުތަކުރުފާނުމަގު ފުޅާކޯށް ޒަމާނީ ފެންވަރަށް ތަރައްޤީކުރުމުގެ ދެވަނަ ފިޔަވަހީގެ މަސައްކަތްތައް ނިންމައި އާންމުކޮށް ހުޅުވާލައިފި އެވެ.
އެމްޓީސީސީއާއި ޙަވާލުކޮށްގެން ސަރުކާރުން ކުރިއަށްގެންދިޔަ މި މަޝްރޫޢުގެ ދަށުން ލޯކަލް މާރުކޭޓުން ފެށިގެން ނޯތު ހާބަރާ ހަމައަށް 250 މީޓަރުގެ ސަރަޙައްދެއްގައި ވަނީ ތާރުއަޅައި ނިންމާފައެވެ. މީގެ އިތުރުން، މަގު ފުޅާކުރުމަށްޓަކައި ފަޅުން ބައެއް ހިއްކައިގެން އެމަގަށް ވަނީ 6 މީޓަރު އިތުރުކޮށްފައެވެ.
ލޯކަލް މާރުކޭޓާ ހަމައިންފެށީގެން ހުޅަނގަށް މަގު ފުޅާކޮށް ތާރުއަޅައި އާންމުންނަށް ހުޅުވާލާފައިވާއިރު، އެސަރަހައްދު ފެހިކުރުމުގެގޮތުން ގަސް އިންދުމުގެ ހަރަކާތްތަކެއްވެސްވަނީ ކުރިއަށް ގެންގޮސްފައެވެ. މި ހަރަކާތުގައި ދައުލަތުގެ 12 ވަޒީރުންނާއި ސަރުކާރުގެ އިސްވެރިން ވަނީ މަގުގެ ދެ ފަރާތުގައި ގަސް އިންދަވައިދެއްވާފައެވެ.
ޢިމާރާތްކުރުމާއި ގެދޮރުވެރިކަމާ ބިނާރާބެހޭ ވަޒީރު ޑރ. އަބްދުﷲ މުއްތަލިބު ޑރ.އަބްދުﷲ މުއްތަލިބް ވިދާޅުވީ އެ ސަރަހައްދަކީ ކުރިން އެއްކޮޅަށް ދުއްވާގޮތަށް ހަމަޖެހިފައިވާ މަގެއް ނަމަވެސް އަލަށް މިގެނައި ބަދަލުތަކާ އެކު އެމަގުގައި މިހާރު ދެކޮޅަށް ދުއްވޭނެ ކަމުގައެވެ.
މި މަގު ތަރައްޤީކުރުމުގެ މި އަމަލީ މަސައްކަތަކީ މިދިޔަ ޑިސެންބަރު މަހުގެ 9 ވަނަ ދުވަހު ފަށާފައިވާ މަސައްކަތެކެވެ.
ވަޒީރު ޑރ. އަބްދުﷲ މުއްތަލިބު ވިދާޅުވި ގޮތުގައި، މި މަޝްރޫޢު ނިމުމާއެކު ބާޒާރުމަތީގެ ޓްރެފިކަށް ބޮޑު ލުޔެއް ލިބިގެންދާނެއެވެ. ކުރިން އެއްކޮޅަށް ދުއްވާ ގޮތަށް އޮތް މި މަގު މިހާރު ވަނީ ދެކޮޅަށް ދުއްވޭ ގޮތަށް ހަމަޖައްސާފައެވެ. މީގެ ސަބަބުން ބާޒާރުމަތީގައި އަބަދުވެސް ކުރިމަތިވާ މަގު ތޮއްޖެހުމުގެ މައްސަލައަށް ހައްލެއް ލިބި، މުދާ އުފުލާ ފަރާތްތަކަށާއި އާންމު ދަތުރުފަތުރު ކުރާ ފަރާތްތަކަށް ބޮޑެތި ފަސޭހަތަކެއް ލިބިގެންދާނެ ކަމަށް ވަޒީރު ފާހަގަކުރެއްވިއެވެ.
ބޮޑުތަކުރުފާހުމަގު ފުޅާކޮށް އަލަށް ތަރައްގީކޮށްފައި ވަނީ ޗާންދަނީ މަގުން ފެށިގެން ފާލަންދޮށު ހިނގުމާ ހަމައަށެވެ.
މި މަސައްކަތަކީ މާލޭގެ މަގުތައް ޒަމާނީ ފެންވަރަށް ތަރައްޤީކޮށް، ތަރުތީބުކުރުމަށް ސަރުކާރުން ކުރިއަށްގެންދާ މުހިންމު މަސައްކަތެކެވެ.
