ކޮމިޝަނަރ އޮފް ޕޮލިސްގެ މަޤާމުގައި ހުންނެވި އިސްމާޢީލް ނަވީން ޝަރަފްވެރިކަމާއި އެކު އެމަޤާމުން ރިޓަޔާ ކުރައްވައިފިއެވެ.
ދިވެހި ފުލުހުންގެ ޚިދުމަތުގައި ގާތްގަނޑަކަށް 32 އަހަރު ޚިދުމަތް ކުރެއްވުމަށްފަހު ޝަރަފުވެރިކަމާއެކު ފުލުހުންގެ ޚިދުމަތުން ވަކިވެވަޑައިގެންނެވިކަން ނަވީން ވަނީ ހާމަކުރައްވާފައެވެ.
ނަވީންގެ ރަސްމީ ފޭސްބުކްގައި އިއްޔެ ކުރެއްވި ޕޯށްޓެއްގައި ވިދާޅުވެފައިވަނީ ފުލުހުންގެ ޚިދުމަތުގައި ގާތްގަނޑަކަށް 32 އަހަރު ޔުނީފޯމް އެޅި ޚިދުމަތަށްފަހު، ރިޓަޔަރކުރިތާ މިއީ ފުރަތަމަ ދުވަސް ކަމުގައެވެ.
ނަވީން ވިދާޅުވީ އެމަނިކުފާނު ފުލުހުންގެ ޚިދުމަތުން ވަކިވެގެން މިދަނީ، އެ މަސައްކަތާ ގުޅުނުއިރުވެސް ހިތުގައި އޮތް ފަދަ މާތް ސިފަތަކާއި ޖޯޝާ އެކުގައި ކަމުގައެވެ.
ނަވީން ވިދާޅުވީ ފުލުހުންގެ ޔުނީފޯމަށް އޮތް އިޙްތިރާމާއި، އެ މުއައްސަސާއަށް އޮތް އިތުބާރާއި، އަދި ޤައުމަށް އޮތް ލޯތްބާ އެކުގައިކަމަށާއި، ޤައުމަށް ޚިދުމަތް ކުރުމުގެ ފުރުޞަތު ލިބުމަކީ އެމަނިކުފާނަށް ލިބުނު ވަރަށް ބޮޑު ޝަރަފެއްކަމަށްވެސް ނަވީންގެ ޕޯސްޓުގައި ވަނީ ވިދާޅުވެފައެވެ.
ފުލުހުންގެ ޚިދުމަތުން ނަވީން ރިޓަޔަރ ކުރައްވާފައިވަނީ، 2026 ފެބްރުވަރީ 18 ވަނަ ދުވަހު ކަމަށް ފުލުހުންގެ ޚިދުމަތުންވެސް ވަނީ ހާމަކުރައްވާފައެވެ.
ޕޮލިސް ކޮމިޝަނަރު ކަމަށް ނަވީން އައްޔަންކުރައްވާފައިވަނީ އެ މަޤާމްގައި ކުރިން ހުންނެވި ޢަލީ ޝުޖާއު 2025 ވަނަ އަހަރުގެ އޭޕްރީލް މަހު ކުއްލި ގޮތަކަށް ރިޓަޔަރ ކުރެއްވުމާއި ގުޅިގެންނެވެ.
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ކޮމިޝަނަރ އޮފް ޕޮލިސްގެ މަގާމަށް ގ.ވެލަގަލާ، އިސްމާޢީލް ނަވީން، ޢައްޔަންކުރައްވައި މަޤާމުގެ ފަތްކޮޅު އެރުވުމުގެ ރަސްމިއްޔާތު ބާއްވާފައި ވަނީ 2025 ވަނަ އަނަރުގެ ޖޫންމަހުގެ 10 ވަނަ ދހުވަހު މެންދުރު ރައީސުލްޖުމްހޫރިއްޔާގެ އޮފީހުގައެވެ.
ކޮމިސަނަރ އޮފް ޕޮލިސްގެ މަޤާމުން ނަވީން ރިޓަޔަރ ކުރެއްވުމާއި ގުޅިގެން ފުލުހުންގެ ޚިދުމަތް ވަގުތީ ގޮތުން ހިންގެވުން ޑެޕިޔުޓީ ކޮމިޝަނަރ އޮފް ޕޮލިސް ފަރުހާދު ފިކުރީ އާއި ޙަވާލުކުރައްވާފައިކަމަށް ކަމަށް މިނިސްޓަރ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީ އަލީ އިޙްސާން ވަނީ ކަނޑައަޅުއްވާފައެވެ.
ކޮމިޝަނަރ އޮފް ޕޮލިސް އިސްމާޢީލް ނަވީން މޯލްޑިވްސް ޕޮލިސް ސަރވިސްގެ ޚިދުމަތާއި ގުޅިވަޑައިގެންނެވީ 2006 ވަނަ އަހަރުއެވެ. އިސްމާޢީލް ނަވީން ވަނީ މޯލްޑިވްސް ޕޮލިސް ސަރވިސްގެ ކޯޕަރޭޓް ސަރވިސް ޑިރެކްޓަރޭޓްގެ ވެރިޔާގެ މަޤާމާއި، ޕީޕަލް ޑިރެކްޓަރޭޓްގެ ވެރިޔާގެ މަޤާމާއި، ސެންޓްރަލް ޕޮލީސިންގ ކޮމާންޑްގެ ވެރިޔާގެ މަޤާމާއި، ފޮރެންސިކް ސަރވިސަސް ޑިރެކްޓަރޭޓް މަޤާމު ފުރުއްވާފައެވެ.
ކޮމިޝަނަރ އޮފް ޕޮލިސް އިސްމާޢީލް ނަވީން ވަނީ އޮސްޓްރޭލިޔާގެ ޔުނިވަރސިޓީ އޮފް ސަދަން ކުއީންސްލަންޑުން މާސްޓަރ އޮފް ބިޒްނަސް އެޑްމިނިސްޓްރޭޝަން އަދި، އިނގިރޭސިވިލާތުގެ ޔުނިވަރސިޓީ އޮފް ނޮތަމްބްރިޔާއިން ބެޗެލަރ އޮފް ލޯ ހާސިލުކުރައްވާފައެވެ.
