ރާއްޖޭގައި ބާއްވާ އެންމެ ބޮޑު ދެ އިންތިޚާބު ކަމުގައިވާ ރިޔާސީ އިންތިޚާބާއި ރައްޔިތުންގެ މަޖިލިސް އިންތިޚާބު އެއްކޮށް ބޭއްވުމާ މެދު ރައްޔިތުންގެ ފެންނަ ނުފެންނަ ވޯޓެއް ނުވަތަ ރިފަރެންޑަމްގައި އިންތިޚާބުތަށް އެއްކުރުމާއި ދެކޮޅަށް ވޯޓް ދިނުމަށް އެމްޑީޕީގެ ވަގުތީ ޗެއާޕާސަން އަދި ރައްޔިތުންގެ މަޖިލީހުގެ ހަނިމާދޫ ދާއިރާގެ މެމްބަރު އަބްދުލްޣަފޫރު މޫސާ ގޮވާލައްވައިފިއެވެެ.
ރިޔާސީ އިންތިޚާބާއި ރައްޔިތުންގެ މަޖިލިސް އިންތިޚާބު އެއްކޮށް ބޭއްވުމާއި ގުޅޭގޮތުން ނަގާ ރިފަރެންޑަމް ވޯޓާ ގުޅިގެން އެމްޑީޕީގެ ވަގުތީ ޗެއާޕާސަން އަދި ހަނިމާދޫ ދާއިރާގެ މެމްބަރު އަބްދުލްޣަފޫރު މޫސާ ވިދާޅުވީ، އިންތިޚާބުތައް އެއްކޮށްލުމަކީ ރައްޔިތުން އެދިގެން ކުރާ ކަމެއް ނޫން ކަމުގައެވެ. އަދި މިކަމާ ގުޅޭގޮތުން ނަގާ ރިފަރެންޑަމްގައި ރައްޔިތުން ”ނޫނެކޭ“ ބުނަންޖެހޭ ކަމަށާއި، މި ބަދަލު ގެންނަން ސަރުކާރުން އުޅެނީ ވެރިކަމުގެ މުއްދަތު އިތުރުކުރުމަށް މަގުފަހިކުރުމުގެ ބޭނުމުގައި ކަމަށްވެސް މެންބަރު ޣަފޫރު ތުހުމަތުކުރެއްވިއެވެ.
”އަޅުގަނޑު ވަރަށް ބޮޑަށް ދިވެހި ރައްޔިތުންގެ ކިބައިން އެދެން މި ރިފަރެންޑަމްގައި ނޫނެކޭ ބުނަން. ސަބަބަކީ މި ރިފަރެންޑަމް މި ބާއްވަނީ ރައްޔިތުންގެ ހިތުގައި މި ޤާނޫނު ބަދަލުކޮށް ގާނޫނު އަސާސީ ބަދަލުކޮށް މިކަހަލަ ކަންތައްތަށް ކުރުމަކީ މާބޮޑުކަމެއްގެ ގޮތުގައި ދެކެމުން އައި ދެކުން ބަދަލުކޮށް ވެރިކަމުގެ މުއްދަތު އިތުރުކުރުމަށްޓަކާ އެކަމަށް ފަސޭހަކުރުމަށްޓަކާ ބާއްވާ ބޭއްވުމެއްމިއީ“ ހަނިމާދޫ ދާއިރާގެ މެމްބަރު އަބްދުލްޣަފޫރު މޫސާ ވިދާޅުވިއެވެ.
ޣަފޫރު ވިދާޅުވީ މިހާރު އަމަލުކުރަމުންދާ ފެހި ގާނޫނު އަސާސީއަށް ވީ 17 އަހަރުގެ ދިގު މުއްދަތުގެ ތެރޭގައި، މިފަދަ ބޮޑު ބަދަލެއް ގެންނަންޖެހޭ އެއްވެސް ސަބަބެއް މިހާތަނަށް ފެންނާކަށް ނެތް ކަމުގައެވެ. އަދި އިންތިޚާބުތައް އެއްކޮށްލުމުގެ ވާހަކައަކީ ރައްޔިތުންގެ ތެރެއިން އައިސްފައިވާ ޝުއޫރެއް ނޫން ކަމަށާއި، މިއީ ސަރުކާރުން އަމިއްލައަށް ބޭނުންވެގެން ކުރާ ކަމެއް ކަމަށް ޣަފޫރު ވިދާޅުވިއެވެ.
”އަޅުގަނޑު މިހާތަނަށް އެއްވެސް ދިވެހި ރައްޔިތަކު މިއިންތިޚާބު އެއްކޮށްލާ ވާހަކަ ދެއްކި އަޑެއް ނާހަން. ރައްޔިތުން އެ ވާހަކަ ނުދައްކާތީ އެ އަޑު ނީވެނީ. ހަގީގަތަކީ އިންތިޚާބުތައް އެއްކޮށްލަން ބުނަންޖެހޭނީ ރައްޔިތުން، ސަރުކާރަކުން ނޫން،“ ޣަފޫރު ވިދާޅުވިއެވެ.
ޣަފޫރު ވިދާޅުވީ މައި ދެ އިންތިޚާބު އެއްކުރުމަކީ ރަނގަޅު ނިޔަތެއްގައި ނުވަތަ ރަނގަޅު މަގްސަދެއްގައި ކުރާ ކަމެއް ނޫން ކަމަށާއި، މީގެ އަސްލު ބޭނުމަކީ ސަރުކާރުގެ ބާރުތައް ދިގު މުއްދަތަކަށް ދަންމާލުން ކަމުގައެވެ. އެހެންކަމުން، ގައުމުގެ މުސްތަގުބަލަށްޓަކައި މި ރިފަރެންޑަމަށް ދިވެހި ރައްޔިތުން ބޮޑުކޮށް ”ނޫނެކޭ“ ބުނުމަށް ޣަފޫރު ވަނީ ގޮވާލައްވާފައެވެ.
“ ޙަޤީގަތުގައި ރައްޔިތުން ބުނަން ޖެހޭނީ އިންތިޚާބުތައް އެއްކޮށްލާށޭ، ސަރުކާރަކުން ނޫން ބުނަން ޖެނޭނީ، އެހެން ވީމަ ރައްޔިތުންގެ އެއްވެސް ބަހެއްނެތި ސަރުކާރުން ބޭނުންވެގެން މިކަން ކުރަމުން މިދަނީ، އަޅުގަނޑު މިހާތަނަކަށް އެއްވެސް ދިވެހި ރައްޔިތަކު މި ދެއްއިންތިޚާބު އެއްކޮށްލާވާހަކަ ދެއްކި އަޑެއް ނާހަން“ އެމްޑީޕީގެ ވަގުތީ ޗެއާޕާސަން އަދި ހަނިމާދޫ ދާއިރާގެ މެމްބަރު އަބްދުލްޣަފޫރު މޫސާ ވިދާޅުވިއެވެ.
