އީރާނަށް ހަމަލާ ދިނުމުގައި އެމެރިކާ ސިފައިން އިޒްރޭލާ ބައިވެރިވާން އެންގެވީ އީރާނުން އިސްވެ ހަމަލާދޭން އުޅޭ ކަމަށް ޤަބޫލުކުރައްވައިގެން ކަމަށް, އެމެރިކާގެ ރައީސް ޑޮނަލްޑް ޓްރަޕް އިއްޔެ ވިދާޅުވެއްޖެ އެވެ. ޓްރަމްޕް ދެއްކެވި އެ އުޒުރަކީ އެގައުމުގެ ސެކްރެޓަރީ އޮފް ސްޓޭޓް މާކޯ ރޫބިއޯ ދެއްކެވި ވާހަކައާ ތައާރުޒުވާ ވާހަކަ އެކެވެ.
ރޫބިއޯ ހޯމަ ދުވަހު ނޫސްވެރިން ގާތު ވިދާޅުވީ އެމެރިކާ ސިފައިން އީރާނަށް ހަމަލާދިނީ އިޒްރޭލުން އީރާނުގެ ވެރިރަށް ތެހެރާނަށް ދޭން ރާވާފައިވާ ހަމަލާ ދީފި ނަމަ އީރާނުން ބަދަލުހިފާނެކަން އެނގޭތީ ކަމަށެވެ.
”އަހަރެމެންނަށް އެނގޭ އިޒްރޭލުން ފިޔަވަޅުތަކެއް އަޅާނެކަން, އަހަރެމެންނަށް އެނގޭ ނަތީޖާއެއްގެ ގޮތުން އެމެރިކާގެ ލަޝްކަރުތަކާ ދެކޮޅަށް ހަމަލާތައް އަންނާނެކަން, އަދި އަހަރެމެންނަށް އެނގޭ އޭގެ ކުރިން އިސްވެ ހަމަލާ ނުދީފިއްޔާ އަހަރެމެންގެ މާ ގިނަ މީހުން މަރުވާނެކަން,“ ރޫބިއޯ ވިދާޅުވި ކަމަށް ރޮއިޓާސްގެ ރިޕޯޓެއްގައި ބުންޏެވެ.
އެހެން ނަމަވެސް ހަނގުރާމައިގެ ތެރެއަށް އެމެރިކާ ވެއްދީ އިޒްރޭލުން ކަމަށް ދައްކާ ވާހަކައާ ޓްރަމްޕް ގެންދަވަނީ ދެކޮޅުހައްދަވަމުންނެވެ. އެއީ އެމެރިކާގެ އިދިކޮޅު ޕާޓީ“ ޑިމޮކްރެޓްސް“ ގެ އިސް ބޭފުޅުންނާއި ސަރުކާރަށް ތާއީދުކުރާ މީހުން ވެސް އެ ހަނގުރާމައިގައި އެމެރިކާއިން ބައިވެރިވާތީ ފާޑުކިމުން ގެންދާތީ ދައްކަވާ ވާހަކަތަކެކެވެ. ހަނގުރާމައާ ދެކޮޅު ހަދާ ފަރާތްތަކުން ބުނަނީ އެމެރިކާއިން ހަނގުރާމައިގެ ތެރެއަށް ވަނީ އެ ހަނގުރާމައިގައި ބައިވެރި ނުވުމުގެ އިހުތިޔާރު އޮއްވާ ކަމަށެވެ.
އެހެން ނަމަވެސް ޓްރަމްޕް ވިދާޅުވަމުން ގެންދަވަނީ އީރާނަށް ހަމަލާދޭން އިޒްރޭލަށް ބާރު އެޅީ އެމެރިކާއިން ކަމަށެވެ. އީރާނަށް ހަމަލާދިނީ އެގައުމުން ހަމަލާދޭން އުޅޭތީ ކަމަށް ޓްރަމްޕް ވިދާޅުވާ ވިދާޅުވުން އީރާނުން ދޮގުކުރެ އެވެ. އީރާނުން ތަކުރާރުކޮށް ބުނަމުން އަންނަނީ މި ހަނގުރާމައަކީ އީރާނުން ކުރި އެއްވެސް ކަމަކާ ނުލައި ފެށި ހަނގުރާމައެއް ކަމަށެވެ.
