އިސްލާޙަށް މަސައްކަތްކުރާ ހުރިހާ ސިޔާސީ ޕާޓީތަކުން ސެކިއުލާ ބިލާއި ދެކޮޅަށް ނޫސް ބަޔާން ނެރުމަކީ ރައްޔިތުންގެ ހިތުގައި އިސްލާމްދީނަށް އޮތް ލޯބި ހާމަކޮށްދޭނެ އަލިގަދަ ހެއްކެއް ކަމުގައި ދީނީ ކަންކަމަށް މީހުން އަހުލުވެރިކުރުވުމާއި، ހޭލުންތެރިކުރެއްވުމަށް ބުރަ މަސައްކަތްތަކެއް ކުރައްވަމުން ގެދަވާ ޢަލީ ރަމީޒު ވިދާޅުވެއްޖެ އެވެ.
ރައްޔިތުންގެ މަޖިލީހަށް ހުށަހަޅާފައިވާ މި ބިލާއި ދެކޮޅަށް ރާއްޖޭގެ ގިނައަދަދެއްގެ ކައުންސިލް ތަކުންނާއި ގިނަ ރައްޔިތުންގެ އިތުރުން ދީނީ ޢީލްމުވެރިން ގެންދަވަނީ މިކަމާއި ދެކޮޅަށް ބަޔާންތައް ނެރުއްވަމުންނެވެ. އެގޮތުން އެބިލު އަނބުރާ ނެންގެވުމަށް އެދި 101 ޢިލްމުވެރިއެއްގެ ސޮޔާއިއެކު ރައީސުލް ޖުމްހޫރިއްޔާ އިބްރާހީމް މުޙައްމަދު ޞާލިޙުއަށް ވަނީ ޕެޓިޝަނެއްވެސް ހުށަހަޅުއްވާފަ އެވެ. މީގެ އިތުރުން ކުރީގެ ހޯމް މިނިސްޓަރ ޢުމަރު ނަޞީރު އިސްކޮށް ހުންނަވައިގެން އުފައްދަވާފައިވާ ދިވެހި ނެޝަނަލް އެކްޝަން، (ޑީއެންއޭ)އިންވެސް ވަނީ ނަފްރަތުގެ ޢަމަލު ހުއްޓުވުމުގެ ނަމުގައި މަޖިލީހަށް ހުށަހަޅުއްވާފައިވާ ބިލު އަނބުރާ ގެންދިއުމަށް ގޮވާލައްފާ އެވެ.
ސެކިއުލާ ބިލާ ދެކޮޅަށް ޢަލީ ރަމީޒު ކުރެއްވި ޓުވީޓެއްގައި ވިދާޅުވެފައިވަނީ، ސެކިއުލާ ބިލާއި ދެކޮޅަށް ހުރިހާ ޕާޓީއަކުން ތިބިކަން ހާމަވެގެން މިދަނީ ރާއްޖޭގެ ރައްޔިތުންގެ ހިތްތަކުގައި އިސްލާމްދީނަށް އޮތް ލޯބި ހާމަކޮށްދޭ އަލިގަދަ ހެއްކެއް ކަމުގަ އެވެ.
އެބިލު އަނބުރާ ނެންގެވުމަށް އެދި 101 ޢިލްމުވެރިއެއްގެ ސޮޔާއިއެކު ރައީސުލް ޖުމްހޫރިއްޔާ އިބްރާޙީމް މުޙައްމަދު ޞާލިޙުއަށް ޕެޓިޝަނެއް ހުށަހަޅުއްވާފައި ވާއިރު، ޢިލްމުވެރިން ނެރުނު ބަޔާނެއްގައި ބުނެފައިވަނީ، ސެކިއުލަރ ޙަރަކާތްތައް މި ޤައުމުގައި ވަރުގަދަ ކުރުމަށް މިވީހާތަނަށް ބައިނަލްއަޤުވާމީ ޖަމާޢަތްތަކާ ގުޅިގެން އެކި ޖަމާޢަތްތަކުން ހިންގާ ޖަރީމާތަކާ ގުޅިގެން ދިވެހި ދައުލަތުގެ އިދާރާތަކަށް ހުށަހަޅާފައިވާ މައްސަލަތައް، އެކި ބަހަނާތަކުގެ ތެރޭގައި ހައްޔަރުވެ ކުރިއަށް ނުގޮސް އޮންނަކަމީ ޙަޤީޤަތްކަން ދިވެހި މުޖުތަމަޢުގެ ކޮންމެ ފަރުދަކަށްވެސް މިހާރު ފެންނަން އެބައޮތް ކަމުގަ އެވެ.
އެފަދަ ހާލަތްތަކުގައިވެސް ދީނާ ދެކޮޅު ޖަރީމާތައް ހިންގާ މީހުންނާ ދެކޮޅަށް ޢިލްމުވެރިންނާއި ދީނަށް ޣީރަތްތެރިކަން ހުންނަ އާންމުންގެ ފަރާތުން ބުނާ ބަހަކާ ގުޅިގެން، ދީނުގެ ދިފާޢުގައި ތެދުވާ މީހުންނަށް ދަޢުވާ އުފުލޭނެ ގޮތަށް އޮތުމަކީ ލޮބުވެތި މިވަޠަނުގެ ދީނާއި ޤައުމިއްޔަތާ ޚިލާފު ކަމެއްކަމަށްވެސް ފާހަގަކޮށްފައިވެއެވެ.
މި ބިލާ ދެކޮޅަށް ރާއްޖޭގެ ކަންކޮޅުތަކުން ބަޔާންތައް ނެރެމުންދާ މިދަނޑިވަޅުގައި ޑީއޭންއޭ އިން ނެރުނު ބަޔާނެއްގައި ބުނެފައިވަނީ ”އެއްވެސް ޤާނޫނަކަށް އެއްވެސް އިސްލާހެއް ހުށަހަޅަންވާނީ ދިވެހިރާއްޖޭގެ ޤާނޫނު އަސާސީއާ ޚިލާފުނުވާނޭ ގޮތަށް ކަމުގައި ޑީ.އެން.އޭ އިން ދެކެމެވެ. އެހެންކަމުން ޤާނޫނު ނަންބަރު: 2014/9 (ދިވެހިރާއްޖޭގެ ޤާނޫނުލް ޢުޤޫބާތު) އަށް ހުށަހަޅާފައި މިވާ އިސްލާހަކީ ބަލައިގަނެވޭނެ ބަދަލެއް ނޫން ކަމުގައި ދެކި މިކަން ޑީއެންއޭ އިން ހަރު އަޑުން ކުށްވެރި ކުރަމެވެ.” ޑީއެންއޭގެ ބަޔާނުގހައި ބުނެފައި ވެއެވެ.
