ރައީސް އިބްރާހިމް މުހައްމަދު ސޯލިހުގެ ކޮއްކޯފުޅުގެ ޖަނާޒާގައި ބައިވެރިވުމަށް ރައީސް ދުބާއީއަށް ފުރާ ވަޑައިގެންފިއެވެ.
ރައީސް އޮފީހުގެ ތަރުޖަމާނު މަބްރޫކު އަޒީޒް ވިދާޅުވި ގޮތުގައި ރައީސް އިބްރާހިމް މުހައްމަދު ސޯލިހުގެ ކޮއްކޯފުޅު އަހްމަދު މުހައްމަދު ސޯލިހުގެ ޖަނާޒާގައި ބައިވެރިވެ ވަޑައިގަތުމަށްޓަކައި އަމިއްލަ ދަތުރުފުޅެއްގައި ރައީސް ސޯލިހް މިއަދު ދުބާއީއަށް ފުރާވަޑައިގެންފައިވާ ކަމަށެވެ. އަދި ރައީސް އެނބުރި މާލެ ވަޑައިގަންނަވާނީ އަންނަ ބުދަދުވަހު ކަމަށް މަބްރޫކު ވިދާޅުވިއެވެ.
އާއިލާގެ ބޭފުޅަކާ ހަވާލާދީ ”އަދަދު“ ނޫހުގައި ބުނެފައި ވަނީ ރައީސްގެ ކޮއްކޯފުޅު އުމުރުން 55 އަހަރުގައި އަވަހާރަވީ ހާޓްއެޓޭކެއް ޖެހިގެންކަމަށެވެ.
ރައީސް ސޯލިހުގެ އެއްބަނޑު އެއްބަފާ 12 ބޭފުޅުންގެ ތެރެއިން ލޯފަން 4 ބޭފުޅުން ތިބެއެވެ. އަދި އެހަތަރު ބޭފުޅުންނަކީވެސް ޤުރުއާން ހިތުދަސް ބޭފުޅުންނެވެ. މީގެ އިތުރުން ތިން ކޮއްކޯފުޅުންނަކީ ހާފިޒުންނެވެ. ދިމާވި ސިއްޚީ މައްސަލަތަކެއްގެ ސަބަބުން މިއަދު ނިޔާވި ކޮއްކޯފުޅަށް ހާފިޒް ކޯސް ފުރިހަމަ ނުކުރެވުނީއެވެ.
