މާދަމާއިން ފެށިގެން މިސްކިތްތަކުގައި ގައިދުރުކޮށް ޖަމާޢަތުގައި ނަމާދުކުރުމަށް ހުޅުވައިލައްވަން ހަމަޖެހިފައިވާކަމުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ. ރައީސުލްޖުމްހޫރިއްޔާ މިހެން ވިދާޅުވީ އޮންލައިންކޮށް މީޑިޔާތަކާއި ބައްދަލުކުރެއްވުމަށް އިއްޔެ ބޭއްވި ނޫސްވެރިންގެ ބައްދަލުވުމުގައެވެ.
ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން ރައީސުލްޖުމްހޫރިއްޔާ ވިދާޅުވީ ޖުލައި 1 ވަނަ ދުވަހުން ފެށިގެން އަޅުގަނޑުމެން ދޭން ނިންމާފައިވާ ލުއިތަކުގެ ތެރޭގައި، ކަރފިއު ގަޑި މިހާރު ރޭގަނޑު 8 ޖަހާއިރު ފަށާގޮތަށް ބަދަލުކުރުން ހިމެނޭކަމުގައެވެ.
ކަރފިއު ދެން އޮންނާނީ، ރޭގަނޑު 8 ން ފަތިހު 4 އާ ހިސާބަށްކަމަށާއި، ކަރފިއު ނޫން ގަޑިތަކުގައި ހުރިހާ ވިޔަފާރިތަކެއް ހުޅުވައިލުމަށް މިވަނީ ހުއްދަ ދެވިފައިވާކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާ ވިދާޅުވީ މިސްކިތްތަކުގައި ގައިދުރުކޮށް ޖަމާޢަތުގައި ނަމާދުކުރުމަށްވެސް މިވަނީ ހުޅުވައިލެވިފައިކަމަށާއި، ކަރފިއު ނޫން ގަޑިތަކުގައި ފާހާނުލައި، ކޮންމެ ރައްޔިތަކަށް، ކޮންމެ ބޭފުޅަކަށް ބޭރަށް ނުކުމެވަޑައިގަތުމުގެ ފުރުޞަތު އޮންނާނެކަމުގައެވެ.
މި ޕްރެސްގައި ހެލްތު މިނިސްޓަރ އަޙްމަދު ނަސީމާއި، މިނިސްޓަރ އޮފް އިކޮނޮމިކް ޑިވެލޮޕްމަންޓް ފައްޔާޒް އިސްމާޢީލް ބައިވެރިވެވަޑައިގެންނެވިއެވެ.
