ކޮރޯނާ ވައިރަސްގެ އައު ވޭރިއަންޓުން ރައްކާތެރި ވުމަށް އެޅޭ ފިޔަވަޅެއްގެ ގޮތުން ޔޫ.އޭ.އީ، އިތިއޯޕިއާ އަދި ވިއެޓްނާމްއަށް ކުރާ ދަތުރުތައް ހުއްޓާލާފައިވާ ކަމަށް ސައުދީ އަރަބިއްޔާއިން ބުނެފިއެވެ.
ސައުދީއިން މިގޮތަށް ނިންމާފައި މިވަނީ، ކޮވިޑްގެ ސަބަބުން އެއްއަހަރު ވަންދެން ސައުދީއިން އެހެން ޤައުމުތަކަށް ދަތުރުކުރުން މަނާކޮށްފައި އޮތް އޮތުމަށް ނިމުން ގެނެސް، ވެކްސިންގެ 2 ޑޯޒް ފުރިހަމަ ކޮށްފައިވާ ފަރާތްތަކަށް އެހެން ޤައުމުތަކަށް ދަތުރު ކުރުމަށް ހުއްދަދިންތާ 7 ހަފްތާ ފަހުންނެވެ.
ދާޚިލީ ވުޒާރާގެ އިސް އޮފިޝަލަކާއި ހަވާލާދީ ސައުދީގެ ރަސްމީ ނޫސް އެޖެންސީ އެސް.ޕީ.އޭއިން ބުނެފައި ވަނީ،މި 3 ޤައުމަށް ކުރާ ދަތުރުތައް އާދީއްތަ ދުވަހުގެ 11:00 ގެ ފަހުން ހުއްޓާލާނެ ކަމަށެވެ. އަދި މިޤައުމުތަކުން އަންނަ ފަސެންޖަރުން 14 ދުވަހުގެ ކަރަންޓީން މުއްދަތެއް ފުރިހަމަ ކުރަން ޖެހޭނެ ކަމަށްވެސް ބުނެފައިވެއެވެ. ސައުދީއިން މިގޮތަށް ނިންމާފައި ވަނީ ކޮރޯނާ ވައިރަސްގެ އައު ވޭރިއެންޓެއް ހަލުވިކަމާއެކު ފެތުރެމުންދާތީ ރައްކާތެރި ކަމުގެ ފިޔަވަޅެއްގެ ގޮތުން ކަމަށްވެސް ބުނެފައިވެއެވެ.
މިޤައުމުތަކުގައި ކޮރޯނާ ވައިރަސްގެ ޑެލްޓާ ވޭރިއަންޓް ދަނީ ފެތުރެމުންނެވެ. އަދި މިވޭރިއަންޓަށް ވެކްސިންއިން ވެސް އަސަރު ނުކުރާކަމަށް ދުނިޔޭގެ ސިއްޙަތު ޖަމިއްޔާއިން ވެސް ވަނީ ބުނެފައެވެ. ޑެލްޓާ ވޭރިއަންޓް އެންމެ ފުރަތަމަ ފެނިފައިވަނީ އިންޑިޔާއިން، އަދި އެއަށް ފަހު މިހާރު 85 ޤައުމަކުން މިވޭރިއަންޓް ވަނީ ފެނިފައެވެ. ކޮރޯނާގެ މިހާތަނަށް ފެތުރުނު ވޭރިއަންޓްތަކާއި ބަލާއިރު ޑެލްޓާ ވޭރިއަންޓް ހަލުވިކަމާއެކު ފެތުރެއެވެ.
