ކޮވިޑް19 ގެ ސަބަބުން އަޅާފައިވާ ފިޔަވަޅުތަކަށް އިތުރު ލުއިތަކެއް ދީފިއެވެ.
ރައީސް އޮފީހުގެ ފަރާތުން މިއަދު ބޭއްވި ނޫސްވެރިންގެ ބައްދަލުވުމުގައި ކޮވިޑްގެ ސަބަބުން އަޅާފައިވާ ފިޔަވަޅުތަކަށް ދެއްވާފައިވާ ލުއިތަކުގެ ތަފްސީލު ދެއްވަމުން ރާއިސް އޮފީހުގެ ތަރުޖަމާނު މަބްރޫކް ޢަބްދުލް ޢަޒީޒް ވިދާޅުވެފައި ވަނީ، ކޮވިޑް ވެކްސިންގެ 2 ޑޯޒް ހަމަކުރުމަށް ފަހު 14 ދުވަސް ފަހުން މޮނިޓަރިންގައި ނެތް ރަށަކުން (މޮނިޓަރިންގައި ނެތް) އެހެން ރަށަކަށް ނައްސި ޕީ.ސީ.އާރް ޓެސްޓަކާއެކު ދަތުރު ކުރެވޭނެ ކަމަށެވެ. އަދި އެގޮތަށް ދަތުރު ކުރެވޭނެ އުސޫލެއްވެސް ކަނޑައަޅާފައިވާ ކަމަށް ބުނެފައިވެއެވެ.
މީގެ އިތުރުން މާލެ ސަރަހައްދުގެ ކާފިއު ވެސް ވަނީ އުވާލައި، ފިހާރަތައް ރޭގަނޑު 11:30 ވަންދެން ހުޅުވާފައި ބެހެއްޓުމާއި ކެފޭ ރެސްޓޯރެންޓް ފަދަ ތަންތަނުގައި އެތެރޭގައި ތިބެގެން ކެއުމުގެ ހުއްދަވެސް ވަނީ މިއަދު ދެއްވާފައެވެ. އިތުރަށް ދިން ލުއިތަކުގެ ތެރޭގައި އޭޝިއާގެ ޤައުމުތަކުން އަންނަ ފަތުރުވެރިން ރިސޯޓުތަކަށް އެތެރެވުމުގެ ހުއްދަވެސް ވަނީ ދެއްވާފައެވެ.
އަދި ހަމަ އެހެންމެ ޓިއުޝަން ސެންޓަރުތަކާއި ޤުރުއާން ކްލާސްތައް ހިންގާ ފަރާތްތަކުން އެޚިދުމަތް އަލުން ފެށުމުގެ ހުއްދަ ދިނުމާއި، ޑޭކެއާ ސެންޓަރުތަކުން ޚިދުމަތް ދިނުމުގެ ހުއްދަވެސް ވަނީ ދެއްވާފައެވެ. އެހެންނަމަވެސް އެފަދަ ސެންޓަރުތަކުން ޚިދުމަތް ދެވޭނީ އެފަދަ ސެނަޓަރުތަކުގައި މަސައްކަތް ކުރައްވާ ހުރިހާ ޓީޗަރުން ވެސް ވެކްސިން ޖަހައިގެންނެވެ. ނޫސްވެރިންނާއި ވާހަކަ ދައްކަވަމުން މަބްރޫކް ވިދާޅުވީ ކޮވިޑްގެ ސަބަބުން ކުޑަކުދިންނަށް ހައިރިސްކް ވާތީ ޓިއުޝަން ސެންޓަރުތަކާއި ޤުރުއާން ކުލާހުގައި ތިއްބަވާ ޓީޗަރުން ވެކްސިން ޖެއްސެވުމަށްފަހު ކަނޑައެޅިފައިވާ ގައިޑްލައިންތަކާއި އެކީގައި އެކުލާސްތައް އަލުން އޮޕަރޭޓް ކުރަން ފެއްޓެވުމަށެވެ. އަދި ޑެކެއާ ސެންޓަރުތަކުގައި ވެސް ގައިޑްލައިނަކަށް އަމަލު ކުރަންޖެހޭނެކަމަށް މަބްރޫކް ވިދާޅުވެފައި ވެއެވެ.
ކަރަންޓީން ވުމުގެ އުސޫލްތައް ސާފު ކޮށްދެއްވަމުން މަބްރޫކް ވިދާޅުވީ، ބޭރު ޤައުމުތަކުން ރާއްޖެ އަންނަ ފަރާތްތަކުގެ ތެރެއިން ވެކްސިންގެ 2 ޑޯޒް ހަމަކޮށް 14 ދުވަސް ވެފައިވާ ފަރާތްތައް ކަރަންޓީނުވާން ޖެހޭ މުއްދަތު 7 ދުވަހަށް މަދުކޮށްފައިވާ ކަމަށެވެ. އަދި ބޭރު ޤައުމުތަކުން ރާއްޖެ އަންނަ ފަތުރުވެރިން 96 ގަޑިއިރު ހަމަނުވާ ނައްސި ޕީ.ސީ.އާރް ރިޕޯޓެއް ގެންނަން ވާނެ ކަމަށްވެސް މިއަދުގެ ބައްދަލުވުމުގައި މަބްރޫކް ބުނުއްވިއެވެ. 7 ދުވަހުގެ ކަރަންޓީން މުއްދަތު ހަމަވުމުން ރިލީސް ސާމްޕަލްއެއް ވެސް ނެގުމަށް ވަނީ ހަމަޖައްސާފައެވެ. މީގެ އިތުރުން ފަތުރުވެރިން ތިބޭ ކޮންމެ ރިސޯޓަކުން ކޮންމެ މަހަކު ރެންޑަމް ސާޕަލް ނެގުމަށް ވަނީ މަޖުބޫރުވެސް ކޮށްފައެވެ.
އިތުރަށް ދިން ލުއިތަކުގެ ތެރޭގައި ކުޅިވަރު ކުޅުމަށް ދިން ލުއި ހިމެނެއެވެ. ނަމަވެސް މުބާރާތްތައް ބޭއްވުމަށް ހުއްދަ ދެއްވާފައެވެ ނުވެއެވެ. ހަމައެހެންމެ 30 މީހުންނަށް ވުރެ ގިނަ ނުވާނެހެން ހަފްލާތައް ބޭއްވުމަށް ވެސް މިއަދު ވަނީ ހުއްދަ ދެއްވާފައެވެ.
