މާލޭގައި މާރާމާރީއެއް ހިންގައި މީހަކު ޒަޚަމްކޮށްލައިފިއެވެ.
މިހާދިސާ ހިނގާފައިވަނީ ގަލޮޅު ”ކަރާގެ ގޯޅި“ ސަރަހައްދުގައެވެ. ސައިކަލްތަކެއްގައި އައި ގުރޫޕެއް އެސަރަހައްދުގައި ހުރި މީހެއްގެ ބޮލަށް ވަޅި ޖެހުމަށްފަހު އެތަނުން ފިލީކަމަށް މަންޒުދުށް މީހުން މައުލޫމާތު ދީފައިވެއެވެ.
މާރާމާރީގައި އަނިޔާވި މީހާގެ ހާލު ސީރިޔަސް ކަމެއް ނުވަތަ ނޫންކަމެއް އަދި ކަށަވަރުނުވެއެވެ. އޭނާ ބޮލުގައި އަތްއަޅައިގެން ހުރިއިރު ލޭފައިބަމުންދިޔަ ފޮޓޯއެއް މިހާރު މީސްމީޑީޔާގައި ދަނީ ދައުރުވަމުންނެވެ.
މަންޒަރު ދުށް މީހުން ބުނާގޮތުން ވަޅިން ހަމަލާދިނުމަށްފަހު ގޭންގުގެ މީހުން ވަނީ އެތަނުން ފިލާފައެވެ.
އެހެންނަމަވެސް ފުލުހުން ވިދާޅުވި ގޮތުގައި މިރޭ 21:50 އެހާތާނގައި މާލޭގައި މާރާމާރީއެއް ހިނގާކަމުގެ ޝަކުވާއެއް ލިބިފައިވެއެވެ. ދެމީހެއްގެ ދެމެދުގައި ހިނގި މިމާރާމާރީއެއްގައި އެކަކުގެ ބޮލަށް ވަނީ ވަރަށް އަނިޔާވެފައެވެ. މިމާރާމާރީ ހިނގާފައިވަނީ ގަލޮޅު، ފާށަނާ ކިލެނގެމަގުގެ ގޯޅިގަނޑެއްގެ ތެރޭގައި ކަމަށާއި މިމާރާމާރީގައި ތޫނު އެއްޗެއް ބޭނުންކޮށްފައިނުވާކަމަށް ފުލުހުންވަނީ ހާމަކޮށްފައެވެ. އަދި މިމާރާމާރީގައި އަނިޔާވި މީހާއަށް އައި.ޖީ.އެމް.އެޗްގައި ފަރުވާދެމުންދާ ކަމަށާއި އެމީހާގެ ހާލު ރަނގަޅު ކަމަށް ފުލުހުން ވަނީ ހާމަކޮށްފައެވެ.
މިމައްސަލަތައް ފުލުހުންދަނީ އިތުރަށް ތަހުޤީގުކުރަމުންނެވެ.
ޖުލައި 7 ވަނަ ދުވަހުވެސް ތިން މީހަކު ވެގެން މާލޭގެ ބޮޑުތަކުރުފާނު މަގު ސަލްމާން މިސްކިތް ކައިރީގައި 21 އަހަރުގެ ޒުވާނެއްގެ ގައިގައި ތަޅާ މާރާމާރީ ހިންގާފައިވެއެވެ. މީގެ އިތުރުން ޖުލައި 1 ވަނަ ދުވަހުގަވެސް މާލޭގެ މަގުމަތީގައި ދިވެއްސަކާއި ބިދޭސީއަކު ވަނީ މާރާމާރީ ހިންގާފައެވެ.
