ބަންގްލަދޭޝްގެ ކާބޯތަކެތި ބަންދުކުރާ ފެކްޓްރީއެއްގައި ހިނގި ނުރައްކާތެރި އަލިފާނުގެ ހާދިސާއެއްގައި އެފެކްޓްރީގެ ވެރިފަރާތާއި އޭނަގެ ހަތަރު ދަރިންވެސް ހައްޔަރުކޮށްފިއެވެ.
އެޤައުމުގެ މީޑިޔާތަކުން ރިޕޯޓްކުރާ ގޮތުގައި މިދިޔަ ބުރާސްފަތި ދުވަހު 5 ބުރީގެ ފެކްޓްރީގައި ހިނގާ ދިޔަ އަލިފާނުގެ ހާދިސާގައި 52 ދެމީހަކު ވަނީ މަރުވެފައެވެ. މިހާދިސާއާއި ގުޅިގެން އެޤައުމުގެ ފުލުހުން ކުރި ތަހުޤީޤުން ހާމަވާ ގޮތުގައި އެފެކްޓްރީގައި ކުޑަކުދިން ލައްވާ މަސައްކަތްކުރާ މައްސަލަ މިވަނީ ފެންމަތިވެފައެވެ.
މީޑިޔާތަކުން ހާމަވާގޮތުގައި އެފެކްޓްރީގައި އަލިފާން ރޯވިއިރު އިމާރާތުގެ މައި ދޮރުގައި ތަޅުލެވިފައި ހުރުމުން އިމާރާތުގެ ތެރޭގައި މީހުން ތާށިވެ ގިނައަދަދެއްގެ ބަޔަކު ވަނީ މަރުވެފައެވެ. މިއިމާރާތުގައި ސަލާމަތީ ފިޔަވަޅުތައް ނެތްކަމަށާއި ގިނަ މީހުން ސަލާމަތް ނުކުރެވުނީ އިމާރާތުން ނުނުކުމެވި އެތެރޭގައި ތާށިވެގެން ކަމަށް ބަންގްލަދޭޝްގެ ނަރަޔަންގަންޖް ޑިސްޓްރިކްޓްގެ ފުލުހުންގެ ޗީފް ޖޭޔަދުލް އާލަމް މީޑިޔާތަކަށް މައުލޫމާތުދީފައިވެއެވެ.
ބަންގްލަދޭޝް ފަޔަރ ސާރވިސްގެ ސްޕޯކްސްޕާރސަން ވިދާޅުވީ ދޮރުގައި ތަޅުވެވިފައި ހުރުމުންނާއި އިމާރާތުގައި އަލިފާން ނިއްވާނެ ވަސީލަތްތައް ނެތުމުގެ ސަބަބުން އަލިފާން ނިއްވުމުގައި ވަރަށް ގިނަ ދަތިތަކާ ކުރިމަތިލާން ޖެހުނު ކަމަށެވެ.
މިއިމާރާތުގެ 3 ވަނަ ފްލޯއިން އެކަނިވެސް 48 މީހެއްގެ ހަށިގަނޑު ފެނިފައިވާކަމަށް މީޑިޔާތަކުގައި ހާމަކޮށްފައިވެއެވެ. އަދި މަރުވި މީހުންގެ ތެރޭގައި 14 އަހަރުގެ ދެކުދިން ހިމެނޭ ކަމަށް ރިޕޯޓްތަކުގައި ބުނެފައިވެއެވެ. މީގެ އިތުރުން 11 އަހަރުގެ ކުޑަކުއްޖަކު އަދިވެސް ނުފެންނަ ކަމަށް މީޑިޔާ ރިޕޯޓްތައް ބުނެއެވެ. މިކުދިންނަކީ އެފެކްޓްރީގައި މަސައްކަތް ކުރަން ގެންގުޅޭ ކުދިންނެވެ.
