ކޮވިޑް19 އަށް ރާއްޖެއިން މިއަދު ފައްސިވި އަދަދު މަދުވެއްޖެއެވެ.
ހެލްތު ޕްރޮޓެކްޝަން އެޖެންސީ (އެޗް.ޕީ.އޭ) އިން އާންމު ކޮށްފައިވާ ތަފާސް ހިސާބުތަކުން ދައްކާ ގޮތުގައި ފާއިތުވި 24 ގަޑިއިރު ރާއްޖެއިން ފައްސިވެފައި ވަނީ 73 މީހުންނެވެ. އޭގެތެރެއިން 14 މީހުން ފައްސި ވެފައިވަނީ މާލެ ސަރަހައްދުންނެވެ.
މީހުން ދިރިއުޅޭ ރަށްރަށުން 45 މީހުން ފައްސިވެފައި ވާއިރު ރިސޯޓުތަކުން 09 މީހުން ވެސް ފައްސި ވެފައިވެއެވެ. އަދި މީހުން ދިރިއުޅޭ ބޯޓުން 03 މީހުން ފައްސިވެ، ތަރައްޤީ ކުރަމުން އަންނަ ރަށަކުން ވެސް މީހަކު ފައްސިވެފައިވާ ކަމަށް އެޗް.ޕީ.އޭއިން ނެރެފައިވާ ހިސާބުތަކުން ދައްކައެވެ.
ފާއިތުވި 24 ގަޑިއިރު ތެރޭގައި ނަގާފައިވަނީ 6،715 ސާމްޕަލެވެ. އަދި މިވަގުތު ރާއްޖޭގައި 2،501 މީހުން ކޮވިޑް19 އަށް ފަރުވާ ކުރަމުންދާއިރު 16 މީހުންނަށް ހޮސްޕިޓަލުގައި އެނދުމަތި ކޮށްގެން ފަރުވާ ދެމުންދާ ކަމަށް މިރޭގެ ހިސާބުތަކުގައި ދައްކައެވެ.
މުޅި ރާއްޖެއިން މިހާތަނަށް 75،405 މީހުން ކޮވިޑް19 އަށް ފައްސިވެފައިވާއިރު ބަލިން ރަނގަޅުވެފައި ވަނީ 72،678 މީހުންނެވެ. ރާއްޖެއިން ކޮވިޑް19 ގައި ނިޔާވެފައި ވަނީ 214 މީހުންނެވެ.
