ސީޒަންގެ ޑައިރެކްޝަން ފެނިގެންދާ ފިލްމު “ އަދިރިކަން“ މީޑިޔާނެޓްގެ އޯޓީޓީގައި ދައްކަން ފަށައިފިއެވެ.
އަސަރުގަދަ ލޯބީގެ ފިލްމެއް ކަމަށްވާ ”އަދިރިކަން“ އަކީ 2020 ވަނަ އަހަރު އެސް ޕްރޮޑަކްޝަން އާއި މާސްކޭ ސްޓޫޑިއޯ އިން ރިލީޒް ކުރެވުނު ފިލްމެކެވެ.
މިފިލްމުން ދައްކުވައިދެނީ ދިވެހިންގެ އާންމު ދިރިއުޅުމެވެ. ދެމަފިރިންގެ ދެމެދުގައި ކުރިމަތިވާ މައްސަލަތަކާއި ދިވެހިންގެ ދިރިއުޅުމުގެ އާދަކާދަތަކެވެ.
ކުޅަދާނަ ފިލްމީ ތަރިން ކަމަށްވާ ޝީލާ ނަޖީބް އަދި އައިމިނަތު ރިޝްފާ ފެނިގެންދާ މިފިލްމުގައި ބަތަލުގެ ރޯލު ކުޅެފައިވަނީ އަލީ ސީޒަންއެވެ. އިތުރު ކާސްޓުންގެ ތެރޭގައި ޒީނަތު އައްބާސް، އަޙްމަދު ސަޢީދު، މަރިޔަމް ޝަކީލާ އަދި މުޙައްމަދު ރަޝީދު (ދަރާ) ހިމެނެއެވެ.
އަހުމަދު ޒަރީރުގެ ސްކްރީން ޕްލޭއަކަށް ކުޅެފައިވާ ފިލްމުގެ ކެމެރާމަނަކީ އަޙްމަދު މޫސާ (ދަބަ)އެވެ.
މީޑިޔާނެޓްގެ އޯޓީޓީ ޕްލެޓްފޯމްތަކަށް ދިވެހިންގެ މެދުގައި ވަރަށް ބޮޑު ތަރުހީބެއް ދަނީ ލިބެމުންނެވެ. ދިވެހި ފިލްމުތަކުގެ އިތުރުން ކްރައިމް ތްރިލާތައް މިމަހު 12 ވަނަ ދުވަހު ފަށާގޮތަށް މިވަނީ ހަމަޖެހިފައެވެ. އަދި މީޑިއާނެޓް އޮރިޖިނަލްސް ވެބް ސީރީޒް ”ގާރލް ފްރެންޑްސް“ގެ ޓްރެއިލަރ މިހާރު ވަނީ ރިލީޒްކޮށްފައެވެ.
