ކޮންމެ މަހަކު ދެމިލިޔަން މީހުންނަށް އުމްރާވުމުގެ ފުރުސަތު ސައުދީ ސަރުކާރުން ހުޅުވާލައިފިއެވެ.
ސައުދި އަރަބިއްޔާގެ ހައްޖު މިނިސްޓްރީން ނެރުނު އިއުލާނެއްގައި ބުނެފައިވަނީ އޮގަސްޓް 9 ވަނަ ދުވަހުން ފެށިގެން ދުވާލަކު 60 ހާސް މީހުންނަށް އުމްރާވުމުގެ ފުރުސަތު ދެވޭނެ ކަމަށާއި މާދަމާއިން ފެށިގެން ފޯމްތައް ބަލައިގަންނާނެ ކަމަށެވެ. އެހެންނަމަވެސް ކޮވިޑް-19އިން ރައްކާތެރިވުމަށް ސައުދީ އަރަބިއްޔާއިން އަޅާފައިވާ ރައްކާތެރިކަމުގެ ފިޔަވަޅުތަކަށް ހުރުމަތްތެރިކޮށް ހިތުމަށް ވަނީ އަންގާފައެވެ. އެގޮތުން އުމްރާވާން ދާ މީހުން ދަތުރު ކުރާ ބަސްތަކުގައި މީހުން އުފުލޭނީ އެބަސްތަކުގެ ކެޕޭސިޓީއަށް ވުރެ ދެބައިކުޅަ އެއްބައި މަދުންކަމަށާއި އެބަސްތަކުން ސެނިޓައިޒަރ ލިބެން ހުންނަން ޖެހޭނެކަމަށް އެމިނިސްޓްރީން ވަނީ އިއުލާންކޮށްފައެވެ.
އުމްރާވާން ދާ ފަރާތްތަކަކީ ކޮވިޑް-19 ވެކްސިންގެ 4 ޑޯޒު ފުރިހަމަކޮށްފައިވާ މީހުންނަށް ވާންޖެހޭނެކަމަށާއި ބަލިޖެހި ރަނގަޅުވެފައިވެ ވެކްސިން ފުރިހަމަކޮށްފައިވީ ނަމަވެސް އުމްރާ ވެވޭނެކަމަށްވެސް އެއިއުލާނުގައި ބުނެފައިވެއެވެ.
ކޮވިޑް-19ގެ ސަބަބުން މިއަހަރުވެސް ހައްޖުވުމުގެ ފުރުސަތު ދީފައިވަނީ ހަމައެކަނި ސައުދީގައި ދިރިއުޅޭ މީހުންނަށެވެ. ފާއިތުވީ ދެއަހަރުގައިވެސް ބައިނަލް އަޤުވާމީ ހައްޖު ވަނީ ކެންސަލްކޮށްފައެވެ.
