އަމާޒަކީ މުބާރާތުގެ ތަށި ނެގުންކަމަށާ، ސަޕޯޓަރުންގެ އަޑު ވަރަށް މުހިންމުކަމަށް ޤައުމީ ޓީމުގެ މެދުތެރޭގައި މުހިންމު ރޯލެއް އަދާކުރަމުންދާ އިބްރާހިމް އައިޝަމް ބުނެފިއެވެ.
ރާއްޖޭގައި މިހާރު ކުޅެމުންދާ ސާފްޗެމްޕިއަންޝިޕް ފުޓްބޯޅަ މުބާރާތުގައި ރާއްޖެ ލަންކާ ބައްދަލު ކުރާމެޗް މިއަދު ހަވީރު 4:00 ގައި ކުޅުމަށް ހަމަޖެހިފައިވާއިރު، ފެންވަރުއެމްވީ އާއި ވާހަކަ ދައްކަމުން ށ.ފުނަދޫއަށް އުފަން އިބްރާހިމް އައިޝަމް ބުނީ ޓީމުގެ ހުރިހާ ކުޅުންތެރިންވެސް އަމާޒަކީ ތަށިކަމަށާ، ތަށި ހޯދުމަށް ކުރެވެން އޮތްހާ މަސައްކަތެއް ކުރާނެކަމަށެވެ. އަދި މިކަމުގައި 12 ވަނަ ކުޅުންތެރިޔާގެ އަޑު ވަރަށް މުހިންމުކަމަށެވެ.
”މިހުރީ ލަންކާމެޗުންވެސް މޮޅުވެގެން ފައިނަލަށް ދިއުމުގެ ފުރިހަމަ އުންމީދުގަ. އަހަރެންގެ ސަޕޯޓަރުންނަށް އަދި ރަށުމީހުންނަށް ބުނެލަން ބޭނުންވަނީ މިހާރުވެސް ތިޔަ ސަޕޯޓު ކުރާ ފޯރީގައި ސަޕޯޓް ކޮށްދޭށޭ. އިރާދަކުރެއްވިއްޔާ މުބާރާތުގެ ތަށި ނަގާނަން. މިހުރީ ލެވެންހުރިހާ އެފޮޓެއްލައިގެން މިއީވެސް އަހަރެމެންގެ ފަހަރަކަށް ހަދަން އިންޝާ ﷲ“ :އިބްރާހިމް އައިޝަމް
ލަންކާ ރާއްޖެ މެޗްގެ ފުރަތަމަ އެގާރައިން ފެނިދާނެތޯ ސުވާލުކުރުމުން އައިޝަމް ބުނީ އެއެއް ނިންމާނީ ކޯޗު ކަމަށެވެ. މުހިންމީ ފުރަތަމަ އެގާރަ ނޫންކަމަށާ، މުހިންމީ މޮޅުކުޅުމެއްދައްކާ ދިވެހިން ފަޚްރުވެރިކޮށްދިނުންކަމަށެވެ.
ރާއްޖެ ބަންގްލަދޭޝް މެޗަށް ފަހު އައިޝަމްއަށް ފުޓްބޯޅައިގެ ތަޖުރިބާ ކާރުން އަދި ސަޕޯޓަރުންގެ ތައުރީފުން މުޅި ސޯޝަލް މީޑިއާ ފުރާލިއެވެ. އެމެޗް ގައި ޤައުމީ ޓީމުގެ މެދުތެރެއަށް ކުޅެމުން އައި އައްސަދު އަލީ( އަޑުބަރޭ) އަށް މެޗުގެ 22 ވަނަ މިނެޓްގައި އަނިޔާވުގެ ސަބަބުން ބަދަލުގައި އައިޝަމް އެރުވި ހިސާބުން މުޅި ޓީމުގެ ކުޅުން އަވަސްވެ ވަރުގަދަ ވެގެން ދިޔަކަމަށް ގިނަ ބަޔަކު ފާހަގަ ކުރިއެވެ.
