ރާއްޖޭގައި އުފެދުނު ކުޅަދާނަ ލަވަކިއުންތެރިންގެ ތެރޭގައި ހިމެނިވަޑައިނަވާ އަބްދުﷲ ހަސަން (ހޮޅުދޫ އަބްދުﷲ) އަވަހާރަވެއްޖެއެވެ.
އަބްދުﷲ ހަސަން އަވަހާރަވީ ދިގުމުއްދަތެއްގައި އާލާސްކަންފުޅޫގައި އުޅުއްވުމަށް ފަހު މިއަދު ހެނދުނުގެ ވަގުތެއްގައެވެ.
”ޤައުމީ ގުރާ“ ގެ ގޮތުގައި ދިވެހިން އަބްދުﷲ ހަސަން ފާހަގަކުރަނީ ސަބަބެއްނެތިއެއް ނޫނެވެ. ޤައުމީ ގިނަ ލަވަތަކެއް އޭނާ ވަނީ ވިދާޅުވެފައެވެ. އޭގެ އިތުރުން ގިނަމަދަހަތަކެއްވެސް ވަނީ ވިދާޅުވެފައެވެ.
އަބްދުﷲ ހަސަންގެ މަޝްހޫރު ލަވަތަކުގެ ތެރޭގައި ”ޤައުމަށް އައި މިނިވަން ނޫރާނީ“ އަދި ކުރީގެ ރައީސް މުހައްމަދު އަމީން ހެއްދެވި ”ވަތަން އެދޭގޮތަށް“ ގެ އިތުރުން ”ގަސްރުކުން މަލަފެވޭ“ ލަވަ ފާހަގަކޮށްލެވެއެވެ. އަދި ރާއްޖޭގައި ލިޔަންކިޔަން ނުދަންނަ ނިސްބަތް މަދުކުރެއްވުމަށް ކުރީގެ ރައީސް މައުމޫން އަބްދުލްޤައްޔޫމް ފެެއްޓެވި ޕޮރޮގްރާމް ގެ ތީމް ލަވަ ”ވަޑައިގަންނަވާށޭ ކިލާހަށް އަސާސީ“ ލަވައިގެ އަޑުގެ ވެރިޔަކީވެސް ހޮޅުދޫ އަބްދުﷲ އެވެ. އަދި މިއުރާޖް މާލޫދުވެސް ވަނީ ވިދާޅުވެފައެވެ.
އޭގެ އިތުރުންވެސް ލޯބީގެ ލަވަތަކާއި ކުޑަކުދިންނަށް ޙާއްސަ ލަވަތައްވެސް އޭނާ ވަނީ ވިދާޅުވެފައެވެ. އެ ލަވަތަކުގެ ތެރެއިން މިހާރުވެސް މަޝްހޫރު ކަމާއިއެކު ދައުރުވާ ލަވަތަތަކުގެތެރޭގައި“ ދޮންބެ ތެދުވޭ“ އަދި ”މީ މަގޭމަގޭ ކުޅޭ އަހޭ“ ހިމެނެއެވެ.
އަބްދުﷲ ހަސަން ގެ އަގުވަޒަން ކުރައްވާ 1981 ވަނަ އަހަރު ދިވެހި ލަވަކިއުމުގެ ރޮނގުން ޤައުމީ އިނާމު ސަރުކާރުން ވަނީ އޭނާ އަށް ދެއްވާފައެވެ.
