މޮރިޝަސްއާ ރާއްޖެ ދެމެދު ފުށުއަރާ ކަނޑުގެ ސަރަހައްދު ބައިކުރުމަށް އިންޓަނޭޝަނަލް ޓްރައިބިއުނަލް އޮފް ދަ ލޯ އޮފް ދަ ސީ (އިޓްލޮސް)އިން މިއަދު ނިންމި ނިންމުގެ ސަބަބުން ރާއްޖޭގެ ކަނޑުގެ ސަރަހައްދުން ބައެއް ގެއްލިފައިވާކަމަށާއި، އެކަން ބަލައިނުގަތުމަކީ ރާއްޖެއަށް އެންމެ ފައިދާހުރިގޮތްކަމަށް ދިވެހިރާއްޖޭގެ ކުރީގެ ރައީސުލްޖުމްހޫރިއްޔާ، ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް، ރައީސް މުޙައްމަދު ނަޝީދު ގޮވާލައްވައިފި އެވެ.
ރައީސް ނަޝީދު ވިދާޅުވީ ޗާގޯސް އަތޮޅުތަކުގެ ސިޔާދަތީ ބާރު ރާއްޖެ އިން ދޫކޮށްލުމުން މިހާރު ރާއްޖޭގެ ކަނޑުގެ ސަރަހައްދުން ބައެއް ގެއްލިފައިވާ ކަމުގައެވެ.
”އަޅުގަނޑު ދެކޭ ގޮތުގައި މިކަން ބަލައިނުގަތުމަކީ ރާއްޖެ އަށް ރަނގަޅު ގޮތް.“ ރައީސް ނަޝީދު ވިދާޅުވި އެވެ.
މި މައްސަލައިގައި އިޓްލޮސް އިން ނިންމާފައިވަނީ ފުށުއަރާ ބައި އިކުއި ޑިސްޓެންޓު އުސޫލުން ބަހައިލުމަށެވެ. މިގޮތަށް އިޤްތިޞާދީ ސަރަޙައްދު ބެހުމުގައި ދެ ޤައުމުގެ ދެމެދުގައި ޚިޔާލު ތަފާތުވުން އުފެދުނީ ހަމައެކަނި ހިކި ދިޔައިގައި ފެންނަ ބްލެންހެމް ރީފުން ފެށިގެން މިން އަޅަން މޮރިޝަސް އިން އެދުމުންނެވެ. ނަމަވެސް ރާއްޖެއިން ވަކާލަތުކުރީ އެއީ މޮރިޝަސްގެ އައްސޭރި ފަށުގެ ބައެއް ނޫން ކަމުގަ އެވެ. އިޓްލޮސް އިން ވެސް މިއަދު ނިންމާފައިވަނީ މޮރިޝަސްގެ ހުށަހެޅުންތައް ބަލައިނުގަނެވޭނެ ކަމުގައެވެ. އިޓްލޮސް އިން މިގޮތަށް ނިންމާފައިވަނީ ރާއްޖެއިން ހުށަހެޅި ލިޔުންތަކާއި ހެއްކާ އަދި ސެޓަލައިޓް ފޮޓޯތަކާއި ސައިންޓިފިކް ހުށައެޅުންތަކަށް ބެލުމަށްފަހުގަ އެވެ.
ރާއްޖެ އާއި މޮރިޝަސްގެ ކަނޑުގެ ސަރަހައްދުން ފުށުއަރަނީ 95،000 އަކަ ކިލޯމީޓަރުގެ ސަރަހައްދެކެވެ. މޮރިޝަސްއިން އިޓްލޮސް އަށް ހުށަހަޅާފައިވަނީ އެ ގައުމުގެ ފަރުގެ ސަރަޙައްދެއް ކަމަށް ބުނާ ”ބްލެންހެން ރީފް“އިން ފެށިގެން އިން ކަނޑައެޅުމަށެވެ. އެއީ ބޭސް ޕޮއިންޓަށް ބަލައިފިނަމަ މޮރިޝަސް އަށް 4،687 އަކަ ކިލޯމީޓަރު އިތުރަށް ލިބޭނެ އެވެ. ނަމަވެސް އިޓްލޮސް އިން ވަނީ މޮރިޝަސްގެ އެ ހުށަހެޅުން ބަލައިނުގަންނަން ނިންމާފަ އެވެ.
މިކަމާ ކަންބޮޑުވުން ފާޅުކުރައްވަމުން ރައީސް ނަޝީދު މިރޭ ކުރެއްވި ޓުވީޓެއްގައި ވިދާޅުވެފައިވަނީ ޗާގޯސްގެ ރަށްތަކުގެ ސިޔާދަތީ ބާރު ރާއްޖެއިން ދޫކޮށްލުމުން ރާއްޖޭގެ ކަނޑުގެ ސަރަހައްދުން ބައެއް ގެއްލިފައިވާ ކަމުގަ އެވެ. މިކަމުގައި އެންމެ ފައިދާހުރި ގޮތަކީ އިޓްލޮސްގެ ނިންމުން ބަލައިނުގަތުން ކަމަށްވެސް ރައީސް ނަޝީދުގެ މެސެޖުގައި ވިދާޅުވެފައިވެއެވެ.
”ޗާގޯސް އަތޮޅުތަކުގެ ބާރު ރާއްޖެއިން ދޫކޮށްލުމުން މިހާރު މިވަނީ ރާއްޖޭގެ ކަނޑުގެ ސަރަހައްދުން ބައެއް ގެއްލިފަ. އަޅުގަނޑު ދެކޭގޮތުގައި މިކަން ބަލައިނުގަތުމަކީ ރާއްޖެއަށް އެންމެ ފައިދާހުރިގޮތް.“ ރައީސް މުޙައްމަދު ނަޝީދު ވިދާޅުވި އެވެ.
ރާއްޖެ އާއި ޗާގޯސް ޖަޒީރާއާ ދެމެދު އެއްވެސް ފަރާތަކަށް 200 ނޯޓިކަލް މޭލު ހަމަނުވެ، ޚާއްޞާ އިޤްތިޞާދީ ސަރަޙައްދު ފުށުއަރާ ގާތްގަނޑަކަށް 95،000 އަކަ ކިލޯމީޓަރުގެ ސަރަހައްދެއް އޮވެއެވެ. ޗާގޯސްގެ ސިޔާދަތީ ބާރުގެ މައްސަލައަކީ ޒަމާނުއްސުރެ ފެންމަތިވެފައިވާ ބޮޑު މައްސަލައެކެވެ. އެހެންކަމުން އެއްވެސް އިރެއްގައި އެތަނުގެ އިން ވަކިކޮށްފައެއް ނުވެއެވެ.
