ކުޑަކުދިންނަކީ ޤައުމުގެ ކުރިމަގަށްޓަކައި މުޑުވައްކުރާ ނިރުތަކެއް: ރައީސުލްޖުމްހޫރިއްޔާ

ކުޑަކުދިންނަކީ ޤައުމުގެ ކުރިމަގަށްޓަކައި މުޑުވައްކުރާ ނިރުތަކަކަށް ވާއިރު، އެ ކުދިން ތަރުބިއްޔަތުކުރުމުގައި، އެ ވަގުތަކު ޤައުމުގައި ހުރި އިޖުތިމާޢީ ހުރިހާ މައްސަލަތަކަށް ރިޢާޔަތްކުރަންޖެހޭކަމުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެ އެވެ. އެމަނިކުފާނު މިހެން ވިދާޅުވީ، މިއަދު ފާހަގަކުރާ ދިވެހިރާއްޖޭގެ ކުޑަކުދިންގެ ދުވަހުގެ މުނާޞަބަތުގައި ފޮނުއްވި ޚިޠާބުގަ އެވެ.

ރައީސުލްޖުމްހޫރިއްޔާގެ ހިޠާބުގައި ވިދާޅުވީ، މިއަދު އަޅުގަނޑުމެން އެންމެ ބޮޑު ސަމާލުކަމެއް ދޭންޖެހެނީ، އެކުދިންގެ ހިތްތަކުގައި އިސްލާމް ދީނުގެ ޞައްޙަ ޢަޤީދާ އާއި ޤައުމީ ލޯބި ފުރިހަމައަށް ބިންވަޅު ނަގައިދިނުމަށް ކަމުގަ އެވެ. އަދި ކުޑަކުދިންނަށް އޯގާތެރިވުމަށާއި، ބޮޑެތި މީހުންނަށް އިޙްތިރާމް ކުރުމުގެ ރީތި އާދަ އަށަގެންނެވުމަށް ސަމާލުކަން ދޭންޖެހޭކަމުގއިވެސް ރައީސުލްޖުމްހޫރިއްޔާ ވިދާޅުވި އެވެ.

އެމަނިކުފާނުގެ ހިޠާބުގައި ތަފާތު ވިސްނުންތަކާ އެކުގައިވެސް ބައިބައިނުވެ އެކަތިގަނޑެއްގެ ގޮތުގައި އިޖުތިމާޢީ ގުޅުން ދެމެހެއްޓުމަށާއި، މިކަންކަމުގައި އެ ކުދިންނަށް މަގުދައްކައިދޭން ތިބީ، މައިންބަފައިންނާއި ބެލެނިވެރިންނާއި މުދައްރިސުން ކަންވެސް ފާހަގަކުރައްވާފައިވެއެވެ.

”ކުޑަކުދިންގެ ދުވަސް ފާހަގަކުރުމާ ގުޅިފައިވާ އަނެއް ކަމަކީ، ޢާއިލާގެ ތެރެއިންނާއި މުޖުތަމަޢުގެ ތެރެއިން އެ ކުދިންނަށް ލިބެންވާ ރައްކާތެރިކަން ކަށަވަރުކޮށްދިނުން. މުޖުތަމަޢުގައި ހިމެނޭ އެންމެ ނާޒުކު ބަޔަކީ، އެ ތަނެއްގައި ދިރިއުޅޭ ކުޑަކުދިން ކަމަށްވާތީ، އެ ކުދިންގެ އިންސާނީ ކަރާމާތާއި އެ ކުދިންގެ ސަލާމަތާއި ރައްކާތެރިކަން ކަށަވަރު ކޮށްދިނުމުގެ ޒިންމާ އެޅިފައިވަނީ އެ މުޖުތަމަޢެއްގައި ދިރިއުޅޭ ބޮޑެތި މީހުންގެ ކޮނޑުގަ.“ ރައީސުލްޖުމްހޫރިއްޔާގެ ހިޠާބުގައި ވިދާޅުވެފައިވެ އެވެ.

އަޅުގަނޑުމެން ކޮންމެ މީހަކު ޢަޒުމް ކަނޑައަޅަންވީ، ތިމާގެ އަތުން އެހެން ކުޑަކުއްޖަކަށް އެއްވެސް ގޯނާއެއް ނުވަތަ އަނިޔާއެއް ނުދިނުމަށާއި، އަދި ކޮންމެ ކުއްޖަކީ ތިމާގެ ފަރާތުން ފުރިހަމަ ޙިމާޔަތާއި ރައްކާތެރިކަން ލިބިގެންވާ ކުއްޖެއްކަމުގައި ހެދުމަށް ކަމުގައިވެސް ރައީސުލްޖުމްހޫރިއްޔާގެ ހިޠަބުގައި ވިދާޅުވެފައި ވެއެވެ.

މިއަދު ފާހަގަކުރާ، ދިވެހިރާއްޖޭގެ ކުޑަކުދިންގެ ދުވަހުގެ މުނާޞަބަތުގައި ރައީސުލްޖުމްހޫރިއްޔާ ފޮނުއްވި ޚިޠާބުގައި ވަނީ، ދިވެހިރާއްޖޭގެ ކުޑަކުދިންނަށާއި، މައިން ބަފައިންނަށާއި ބެލެނިވެރިންނަށް އަދި މުދައްރިސުންނަށްވެސް، ދުވަހުގެ ހެޔޮއެދުމާއި ތަހުނިޔާ ފޮނުއްވާފައެވެ.