މާލެސިޓީ ކައުންސިލުން މާލޭގެ 14 މަގެއްގައި ހަލާކުވެފައިވާ ކާނުމަތި ތަކުގެ ތެރެއިން 174 ކާނުމަތި ބަދަލުކޮށްފިއެވެ.
މާލެސިޓީ ކައުންސިލްގެ އާންމު ޚިދުމަތްތަކާއިބެހޭ ބައިން މާލޭގެ މަގުތަކުގައި ހަލާކުވެފައިވާ ކާނުމަތިތައް ދެނެގަތުމުގެ ތެރެއިން މިހާތަނަށް 239 ކާނުމަތި ހަލާކުވެފައިވާކަން ވަނީ ފާހަގަކުރެވިފައެވެ.
އާންމު ޚިދުމަތްތަކާއި ބެހޭ ބައިގެ މަސައްކަތްތަކާއި ހަވާލުވެ ހުންނެވި ކައުންސިލަރ އާދަމް ރަމީޒް ވިދާޅުވީ އޭގެތެރެއިން 174 ކާނުމަތި މިހާތަނަށް ވަނީ ބަދަލުކުރެވިފައިވާ ކަމަށެވެ. އަދި ފާހަގަ ކުރެވުނު ކާނުތަކުގެ ތެރެއިން 65 ކާނުމަތި ބަދަލު ކުރަންޖެހޭ ކަމަށެވެ.
އޭނާ ވިދާޅުވި އެކަންވެސް ހަލުވި ސްޕީޑެއްގައި ކުރިއަށް ދާނެ ކަމަށެވެ.
މާލެސިޓީ ކައުންސިލުން ކާނުމަތިތައް ބަދަލުކުރި 14 މަގަކީ އަމީރު ޢަހްމަދުމަގު (ނަސަންދުރަ ކައިރި)، ކޮއިމަލާ ހިނގުން (މާލެހިޔާ 2 ކައިރި)، ބުރުޒުމަގު (ޝަމްރަތު ކައިރި)، ވައިދެރި ހިނގުން ، ޗާންދަނީ މަގެވެ. އަދި ކަޅުހުރާ މަގު، އިރުދޭމާ ހިނގުން، އަބަދަށްއުފާ މަގުގެ ކާނުމަތިތައް ވެސް ވަނީ ބަދަލުކޮށްފައެވެ.
މީގެ އިތުރުން ލޮނުޒިޔާރަތް މަގާއި ޖަނަވަރީމަގާއި މުތީގޯޅި އާއި ކާސިންޖީމަގާއި ބޮޑުތަކުރުފާނު މަގާއި ރިންގް ރޯޑުގެ ވެސް ވަނީ ބަދަލުކޮށްފައެވެ.
ހަތަރުވަނަ ދައުރުގެ ކައުންސިލުން މާލެސިޓީގެ މުނިސިޕަލް ޚިދުމަތްތަކުގެ ފެންވަރު ރަނގަޅުކުރުމާއި، މާލެސިޓީގެ މަގުތަކަކީ އަމާން ރައްކާތެރި އަދި ހިތްފަސޭހަ މަގުތަކަކަށް ހެދުމަށްޓަކާ ގިނަގުނަ މަސައްކަތްތަކެއް ދަނީ ކުރަމުންނެވެ.
އެގޮތުން މާލެ އައި ވިލިމާލޭގެ މުނިސިޕަލް ކަންކަން ރަނގަޅުކުރުމަށް މިހާތަނަށް ގިނަ މަސައްކަތްތަކެއް ވަނީ ކުރެވިފައެވެ.
