ރައީސް ސާލިހު ވަނީ ތަރައްގީގެ މާ އުސްމިންގަނޑެއް ކަނޑައަޅުއްވާފައި ކަމަށް ސްޓެލްކޯގެ މެނޭޖިންގ ޑިރެކްޓަރ އަހްމަދު ޝަރީފް ވިދާޅުވެއްޖެއެވެ.
އޭނާ މިފަދައިން ވިދާޅުވެފައިވަނީ ރައީސް ސާލިހު، މާލެއަތޮޅުގެ 3 ރަށަކަށް ކުރެއްވި ދަތުރުފިޅުގެ ތެރެއިން މާފުށީގައި ބޭއްވި ޖަލްސާގައި ވާހަކަ ދައްކަވަމުންނެވެ.
ރައީސް ސާލިހުގެ މި ދަތުރުފުޅަކީ އެމްޑީޕީގެ ރިޔާސީ ކެންޑިޑޭޓުގެ ހައިސިއްޔަތުން ކެމްޕެއިން ކުރެއްވުމަށް ކުރެއްވި ދަތުރުފުޅެކެވެ.
މާފުށީގައި ވާހަކަ ދައްކަވަމުން ޝަރީފް ވަނީ ބައެއް ފަރާތްތައް ހިޔަންޏަށް މުޑި ނަގާހެން ކެމްޕެއިން ކުރަމުންދާކަމަށް ވިދާޅުވެފައެވެ. އޭނާގެ މި ވާހަކަތައް ރައްދުވާ ސީދާ ފަރާތެއް ވިދާޅުނުވިޔަސް އެއީ އޭނޭގެ ކުރީގެ ޕާޓީ ޕިޕީއެމް އަށް އަމާޒުކޮށް ދެއްކެވި ވާހަކަތަކެއްކަން ދޭހައެވެ.
އެގޮތުން ޝަރީފް ވަނީ އެ މީހުންގެ ކެނޑިޑޭޓަކު ފެންނަން ނެތް ނަމަވެސް ކެމްޕެއިން ފަށައިފައިވާ ކަމަށާއި ކެންޑިޑޭޓެއް ދެއްކުމަށް ގޮވާލައްވާފައެވެ. އަދި ވާދަކުރަން ތައްޔާރަށް ތިބި ކަމަށާއި އިންތިހާބުގައި ބަލި ކުރާނެ ކަމަށް ވެސް އޭނާ ވިދާޅުވިއެވެ.
މީގެ އިތުރުން ޝަރީފް ވިދާޅުވީ ރާއްޖޭގައި ތަރައްގީގެ ގިނަ މަސައްކަތް ކުރެއްވީ ރައީސް އަބްދުﷲ ޔާމީން ކަމަށް ހީކުރެވުނު ނަމަވެސް، ރައީސް އިބްރާހިމް މުހައްމަދު ސާލިހް ވަނީ ތަރައްގީގެ މާ އުސްމިންގަނޑެއް ކަނޑައަޅުއްވާފައި ކަމަށެވެ.
ރައީސް ސާލިހަށް 2 ވަނަ ދައުރެއް ދީފިނަމަ އެއަށް ފަހު ރައީސަކަށް ވަޑައިގަންނަވާ ފަރާތަކުން ކުރާނެ ތަރައްގީއެއް ނޯންނާނެ ކަމަށް ވެސް ޝަރީފް ވިދާޅުވިއެވެ.
މިހާރު ފެށިފައިވާ މަސައްކަތްތަކުގެ އިތުރުން އެމްޑީޕީގެ ޕްލޭންގައިވާ އިތުރު މަސައްކަތްތައް ކުރުމަށް އަދި އެއް ދައުރު ބޭނުންވާ ކަމަށް އޭނާ ވިދާޅުވިއެވެ.
