ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތް ކަމުގެ މައްސަލަ މިފަހަރު ދީލައިލުމެއް ނެތް ކަމަށް ރައްޔިތުންގެ މަޖިލީހުގެ ދުވާފަރު ދާއިރާގެ މެންބަރު އިސްމާއިލް އަހްމަދު ވިދާޅުވެއްޖެއެވެ.
ވެރިކަން ކުރާ ކޯލިޝަންގެ އެންމެ މައި ޕާޓީ، އެމްޑީޕީ އަށް ނިސްބަތްވާ އިސްމާއިލް ވިދާޅުވީ ރައީސް ނަޝީދުގެ އިތުބާރު ނެތްކަމުގެ މައްސަލަ އަނެއްކާ ވެސް އެމްޑީޕީން ހުށައެޅުމަށް ތައްޔާރުވެ، އެ ޕާޓީގެ ޕީޖީ ގްރޫޕުގެ އަޣުލަބިއްޔަތުން އެކަން ފާސްކޮށްފައިވަނިކޮށެވެ.
އޭނާ ވިދާޅުވީ ރައިސް ނަޝިދުގެ އިތުބާރު ނެތްކަމުގެ މައްސަލަ ހުށައެޅުމުގެ ބޭނުމަކީ، މަޖިލީހުގެ އަޣުލަބިއްޔަތު އެމްޑީޕީއަށްއޮވެ، މަޖިލީހުގެ ރައީސަކަށް ހުންނަވަންޖެހޭނީ އެޕާޓީގެ ބޭފުޅެއްކަމަށްވާތީ ކަމަށެވެ. އަދި އެ މަގާމަކީ އެޕާޓީ އަށް މުހިންމު މަގާމެއް ކަމަށް ވެސް އޭނާ ވިދާޅުވިއެވެ.
މަޖިލީހުގެ ރައީސްއާއި ނައިބު ރައީސްގެ އިތުބާރު ނެތްކަމަށް އެމްޑީޕީގެ ޕީޖީ ގްރޫޕުން 54 މެމްބަރުންގެ ސޮޔާއިއެކު ހުށަހެޅިނަމަވެސް ރިޔާސީ އިންތިޚާބުގެ ފުރަތަމަ ބުރުގައި ރައީސް ސާލިހަށް ލިބިވަޑައިގެންނެވި ދަށް ނަތީޖާއާއެކު، އެމްޑީޕީން ޑިމޮކްރެޓްސްއާއި އެކު ގުޅިގެން މަސައްކަތްކުރުމުގެ ބޭނުމުގައި އެ މައްސަލަތައް އަނބުރާ ނެގިއެވެ. އެ މައްސަލަތައް އަނބުރާ ނެގިނަމަވެސް ޑިމޮކްރެޓްސްއިން އެމްޑީޕީއަށް ތާޢީދުކޮށްފައެއް ނުވެއެވެ.
އިތުބާރު ހުރި މަސްދަރަކުން މައުލޫމާތު ލިބިފައިވާ ގޮތުގައި ނަޝީދުގެ އިތުބާރު ނެތްކަމުގެ މައްސަލަ ހުށައެޅުމަށް ބޭނުންވާ އަދަދަށް މިހާރުވަނީ ސޮއި ހަމަވެފައެވެ.
މަޖިލީހުގެ ރައީސް ނުވަތަ ނައިބު ރައީސްގެ މަގާމުގައި ހުންނަވާ ބޭފުޅަކު އެ މަގާމުން ވަކިކުރަން ހުށަހެޅޭނީ ޖުމުލަ މެމްބަރުންގެ ހަތަރުބައިކުޅަ އެއްބަޔަށް ވުރެ މަދު ނޫން އަދަދެއްގެ ސޮޔާއިއެކުއެވެ. އެއީ މިހާރު ތިއްބެވި 87 މެންބަރުންގެ ތެރެއިން 22 މެމްބަރުންގެ ސޮޔެވެ. އެމްޑީޕީގެ 55 މެންބަރުން މަޖިލީހުގައި ތިއްބަވައެވެ.
