ޕީއެންސީ އިން ސަރުކާރު އެކުލަވާލުމަށް ޑިމޮކުރެޓުންގެ ހިޔާލާއި މަޝްވަރާ ހޯދައިފިއެވެ.
އިންތިޤާލީ ކޮމެޓީގެ ޗެއަރ އަދި ޕީއެންސީގެ ޗެއަރޕާސަން އަބްދުއްރަހީމް (އަދުރޭ) ވިދާޅުވީ ގައުމެއް ގައުމެއްގެ ގޮތުގައި ކުރިއަރައިގެން ދިޔުމުގައި އެންމެ މުހިންމު ކަމެއްގެ ގޮތުގައި އޮންނާނީ އެތަނެއްގައި އަދުލު އިންސާފާއި ހަމަހަމަކަން ގާއިމުވެފައި އޮތުން ކަމަށެވެ.
އެހެންވެ، އަލަށް އުފައްދާ ސަރުކާރަކީ އަދުލު އިންސާފު ގާއިމުވެފައި އޮތް، ހަމަހަމަކަމާއެކީގައި ހިދުމަތް ފޯރުކޮށްދޭ ސަރުކާރަކަށް ހެދުމަށް އިންތިހާބީ ރައީސްގެ އޮފީހުން ޑިމޮކުރެޓުންގެ ހިޔާލާއި މަޝްވަރާ ހޯދާފައިވާ ކަމަށް އޭނާ ވިދާޅުވިއެވެ.
އަބްދުއްރަހީމް ވިދާޅުވީ އެ ބައްދަލުވުމުގައި މަޝްވަރާ ކުރީ އަދުލުއިންސާފު ގާއިމްވެފައި އޮތް ހަމަހަމަކަމާ އެކީ ހިދުމަތް ފޯރުކޮށްދޭ ސަރުކާރެއް އެކުލަވާލުމާ ބެހޭ ގޮތުން ކަމަށާއި އެކަމާ ބެހޭ ގޮތުން ޑިމޮކްރެޓްސްގެ ހުރި ވިސްނުންތައް ހިއްސާ ކުރެއްވި ކަމަށެވެ.
މީގެ އިތުރުން އެމްޑީޕީގެ ސަރުކާރުގައި ދިމާވެފައި ހުރި އެކިއެކި މައްސަލަތަކާ ގުޅިގެން ކުރަންޖެހުނު ތަޖުރިބާއާއި އެކަންކަމުގެ އަލީގައި ކުރިއަށް ދާނެ ގޮތާމެދު ޑިމޮކުރެޓުންގެ ހިޔާލު ހުރިނެތް ގޮތް ވެސް ޑިމޮކްރެޓުންގެ ފަރާތުން ހިއްސާ ކުރި ކަމަށް އަދުރޭ ވިދާޅުވިއެވެ.
