ބޯމަތިވަމުން އަންނަ ރައްޔިތުންގެ މަޖިލިސް 2024 އިންތިޚާބުގައި ވާދަކުރެއްވުމަށް އިލެކްޝަންސް ކޮމިޝަން (އީސީ)އަށް ފޯމް ހުށަހަޅުއްވާފައިވާ ކެންޑިޑޭޓުންގެ ތެރެއިން އެބޭފުޅެއްގެ ނަންފުޅު އަނބުރާ ގެންދަވަން ބޭނުންފުޅުވާ ފަރާތްތަކަށް ހުޅުވާލާފައިވާ ފުރުޞަތު މާދަމާ ބަންދުވާނެ އެވެ.
އީސީން ހާމަކުރެއްވި ގޮތުގައި އަންނަ ރައްޔިތުންގެ މަޖިލީހަށް ވާދަކުރެއްވުމަށް އީއީއަށް ފޯމް ހުށަހަޅުއްވާފައިވާ ފަރާތްތަކުގެ ތެރެއިން އެބޭފުޅެއްގެ ނަންފުޅު އަނބުރާ ގެންދަވަން ބޭނުންފުޅުވާ ފަރާތްތަކަށް އެ ފުރުޞަތު ވަނީ މާދަމާ މެންދުރުފަހު 2:00 ގެ ނިޔަލަށް ހުޅުވާލާފަ އެވެ.
”ރައްޔިތުންގެ މަޖިލިސް އިންތިޚާބަށް ކުރިމަތިލާ އެދި އިލެކްޝަންސް ކޮމިޝަނަަށް ނަން ހުށަހަޅާފައިވާ މީހަކު ކެންޑިޑޭޓުންގެ ނަންތައް އިޢޫލާން ކުރުމުގެ ކުރިން ކޮންމެ ވަގުތަކުވެސްއެމީހެއްގެ ނަން އެ އިންތިޚާބަކުން އަނބުރާ ގެންދިއުމުގެ އިޚްތިޔާރު އެމީހަކަސް ލިގެންވޭ. މިވަގުތު އޮތީ އަންނަ ހުކުރު ދުވަހުގެ މެންދުރު ފަހު 2:00 އާ ހަމައަށް“ އިލެކްޝަންސް ކޮމިޝަނުން ހާމަކުރައްވަ އެވެ.
މަޖިލިސް އިންތިހާބަށް ކުރިމަތިލުމުގެ މުއްދަތު ހަމަވި އިރު 381 ފަރާތަކުން ވަނީ އަންނަ ރައްޔިތުންގެ މަޖިލިސް އިންތިޚާބުގައި ވާދަކުރަން ފޯމު ހުށަހަޅުއްވާފަ އެވެ.
މަޖިލިސް އިންތިހާބަށް ޕާޓީތަކުގެ ފަރާތުންނާއި އަމިއްލަ ގޮތުން ވެސް ކެންޑިޑޭޓުން ވާދަކުރަން ހުށަހަޅާފައިވެ އެވެ.
އަންނަ ރައްޔިތުންގެ މަޖިލިސް އިންތިޚާބުގައި ސިޔާސީ ޕާޓީތަކުން ވާދަކުރައްވާ ކެންޑިޑޭޓުންގެ ތެރޭގައި ސަރުކާރު ހިންގާ ކޯލިޝަން، ޕްރޮގްރެސިވް ކޯލިޝަންގެ ފަރާތުން 90 ކެންޑިޑޭޓަކު ވާދަކުރައްވަ އެވެ. އަދި އިދިކޮޅު މައި ޕާޓީ، މޯލްޑިވްސް ޑިމޮކްރެޓިކް ޕާޓީ، އެމްޑީޕީން 89 ބޭފުޅުން ވާދަކުރައްވަ އެވެ. މީގެ އިތުރުން ކުރީގެ ރައީސް އަބްދުﷲ ޔާމީން އުފައްދަވަން މަސައްކަތްކުރައްވާ ޕީއެންއެފަށް ނިސްބަތްވާ 49 ކެންޑިޑޭޓުންވާއި، ދަ ޑިމޮކްރެޓްސްގެ ފަރާތުން 41 ކެންޑިޑޭޓުން ވާދަކުރައްވަ އެވެ. އަދި ޖުމްހޫރީ ޕާޓީން 10 ކެންޑިޑޭޓުންނާއި، އަދާލަތު ޕާޓީން 04 ކެންޑިޑޭޓުން ވެސް އަންނަ މަޖިލިސް އިންތިޚާބުގައި ވާދަކުރެއްވުމަށް ވަނީ ފޯމު ހުށަހަޅުއްވާފަ އެވެ.
އިލެކްޝަންސް ކޮމިޝަނުން އަންނަ މަހުގެ 17 ވަނަ ދުވަހު ބޭއްވުމަށް ހަމަޖައްސަވާފައިވާ ރައްޔިތުންގެ މަޖިލިސް އިންތިޚާބު، މާރިޗު މަހުގެ 17 ވަނަ ދުވަހަކީ ރޯދަމަހުގެ ދުވަހަކަށް ވުމުން ރޯދަމަސް ނިމޭތާ 10 ދުވަސް ފަހުން މި އިންތިޚާބު ބޭއްވުމަށް ރައްޔިތުން މަޖލީހުން މިހާރު ވަނީ ފާސްކުރައްވާފަ އެވެ.
މިހާރު ހިނގަމުންދާ ރައްޔިތުންގެ މަޖިލީހުގައި 87 މެންބަރުން ތިއްބެވި ނަމަވެސް 20 ވަނަ ރައްޔިތުްނގެ މަޖިލީހަށް 93 މެންބަރުން އިންތިޚާބު ކުރައްވާނެ އެވެ.
