މި ޤައުމުގެ ތަރައްޤީއަށްޓަކައި ކުރާ ކޮންމެ ކަމެއްގައި އެންމެ އިސްވެ އެކަމަށް ތާޢީދުކުރާނީ އަޅުގަނޑުމެން ކަމަށާއި، ރައްޔިތުންގެ މަޖިލީހުގެ މެޖޯރިޓީ ހޯދަނީ ސަރުކާރަށް އުނދަގޫކޮށް ދުއްތުރާކުރަން ނޫންކަމުގައި ކުރީގެ ރައީސް އިބްރާޙީމް މުޙައްމަދު ޞާލިޙް ވިދާޅުވެއްޖެ އެވެ. 
އެމިކުފާނު މިހެން ވިދާޅުވީ އައްޑޫސިޓީ ހުޅުދޫ ދާއިރާއަށް އެމްޑީޕީ ޓިކެޓުގައި ވާދަކުރައްވާ ކެންޑިޑޭޓު ސާމިއު އަންވަރުގެ ކެމްޕޭން ޙަރަކާތުގައި ވާހަކަ ދައްކަވަމުން ނެވެ.
”މި ޤައުމުގެ ތަރައްޤީޢަށްޓަކައި ކުރާ ކޮންމެކަމެއްގައި އެންމެ އިސްވެ އެކަމަށް ތާއިދު ކުރާނީ އަޅުގަނޑުމެން. ރައްޔިތުންގެ މަޖިލީހުގެ މެޖޯރިޓީ މިހޯދަނީ ކޮންމެހެން ސަރުކާރަށް އުނދަގޫކޮށް ދުއްތުރާކުރާކަށެއް ނޫން. ރައްޔިތުންގެ ތަރައްގީޢަށް ޓަކައި. ކުރީގެ ރައީސް އިބްރާހީމް މުޙައްމަދު ޞާލިޙް ވިދާޅުވި އެވެ.
ރައީސް ޞާލިޙް ވިދާޅުވީ ރާއްޖޭގެ މަސްލަހަތާއި، ރައްޔިތުންގެ ޙައްޤުތައް ނަގާލާކަމަށް ވާނަމަ އެންމެ ފުރަތަމަ ތެދުވެ އެކަން ހަމަމަގަށް އަޅުވާނީވެސް އެމްޑީޕީން ކަމުގަ އެވެ.
ރައްޔިތުންގެ މަޖިލީހުގައި އިދިކޮޅު މެމްބަރުން ތިބޭނެ ކަމަށާއި، އަދި އިދިކޮޅު މެމްބަރުން ތިބެން ޖެހޭ ކަމަށް ވިދާޅުވި އެވެ. އެހެންކަމުން ރައްޔިތުންގެ މަޖިލީހުގެ ނިޒާމް ރަނގަޅަށް ހިނގާނީވެސް ސަރުކާރު ޖަވާބު ދާރީ ކުރުވިގެންކަމަށްވެސް ރައީސް ޞާލިޙް ވިދާޅުވި އެވެ.
އެމްޑީޕިން ވާދަކުރައްވާ މެމްބަރުންގެ ހިތްވަރު އެކަމުގައި ހުންނާނެ ކަމަށާއި އަދި އެކަންކަން ކުރަން ވެސް ކެރޭނެ ކަމަށް ވިދާޅުވަމުން ރައީސް ޞާލިޙް ވިދާޅުވީ ސަރުކާރުން ކުރާ ކަންތައްތައް ބަލާ ފާރަވެރިވާން ޖެހޭކަަމުގަ އެވެ.
