ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ”ޗައިލްޑް ސޭފްގާޑިން“ ޕޮލިސީ މިއަދު އިފްތިތާހު ކޮށްފިއެވެ.
އެފްއޭއެމް ފައުންޑޭޝަންގެ ބެލުމުގެ ދަށުން އެފްއޭއެމް ޗައިލްޑް ސޭފްގާޑިން ޕޮލިސީ އިފްތިތާހްކޮށްދެއްވަމުން ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަހުމަދު ވިދާޅުވީ ކުދިން ސޭފްގާޑް ކޮށްދިނުމުގެ މަޤްޞަދަކީ ނުރައްކާތެރިކަމަށް ކުދިން ހުށަހެޅުމުގެ ފުރުޞަތު ނުދީ، ރައްކާތެރިކަމުގެ ވެށީގައި ކުދިން ދެމެހެއްޓުންކަމަށާއި ކުޅިވަރުގެ ތެރޭގައި ހަރުދަނާ ޗައިލްޑް ސޭފްގާޑިން ފިޔަވަޅުތަކެއް އެކަށައަޅާފައި އޮންނަން ޖެހޭނެ ކަމަށެވެ.
އެކަމަނާ އިތުރަށް ވިދާޅުވި ގޮތުގައި މިއީ ކުޑަކުދިންގެ ޙައްޤުތައް ރައްކާތެރިކުރުމުގެ ޤާނޫނާއި ކުޑަކުދިންގެ ޢަދުލުގެ ޤާނޫނަށް އަމަލުކުރަން ފެށިފަހުން އައި އެންމެ އުފާވެރި އެއް ދުވަސްކަމަށެވެ.
ކުޑަކުދިންނާ ގުޅޭ މިފަދަ މުހިންމު ޕޮލިސީއެއް އެކުލަވާލުމުގައި އެ ކުދިންގެ މަޝްވަރާއާ ބައިވެރިވުން ހޯދާފައިވާތީ އެކަން ފާހގަކޮށް، މި ޕޮލިސީ އެކުލަވާލުމުގައި ބައިވެރިވި ފަރާތްތަކަށް އެކަމަނާ ވަނީ ޝުކުރު އަދާކުރައްވާފައެވެ. އަދި ޗައިލްޑް ސޭފްގާޑިންގެ މުހިންމުކަން ފާހަގަކުރައްވައި ކުޅިވަރުގެ ތެރެއިން މި ކަމަށް ޙައްލެއް ހޯދަން ދުރާލާ ވިސްނާ މިކަން ފެށީތީ އެފްއޭއެމްއަށްވެސް ޝުކުރު އަދާކުރެއްވިއެވެ.
މިޕޮލިސީގެ މުހިންމުކަމާއި ބެހޭގޮތުން ވާހަކަފުޅު ދައްކަވަމުން އެކަމަނާ ވިދާޅުވީ މިފަދަ ޕޮލިސީއެއް އޮތުމުން ކަންކުރަންވީ ގޮތާއި ނުކުރަންވީ ކަންތައްތައް އެންމެނަށްވެސް އެގިގެންދާނެކަމަށެވެ. އަދި ކަމެއް ދިމާވެއްޖެ ހާލަތެއްގައި ރިޕޯޓްކުރަންވީ ގޮތާއި އެހީތެރިކަން ހޯދަންވީ ފަރާތްތައް އެކުދިންނަށް އެގިގެންދާނެއެވެ.
އެފްއޭމްގެ ޗައިލްޑް ސޭފްގާޑިން ޕޮލިސީއަކީ އެފްއޭއެމް ފައުންޑޭޝަން އަދި އެފްއޭއެމްއާ އާރކް ޖަމުޢިއްޔާ ގުޅިގެން އަދި ޔުނިސެފް މޯލްޑީވްސްއާ ސަރުކާރުގެ ކަމާގުޅުންހުރި އިދާރާތަކުގެ ބައިވެރިވުމާއެކު އެކުލަވާލާފައިވާ ޕޮލިސީއެކެވެ.
