މިހާރު ކޫޅެމުންދާ ސާފް ޗެމްޕިއަންޝިޕް ފުޓްބޯޅަ މުބާރާތުގައި ބަންގްލަދޭޝް ބަލިކޮށް މުބާރާތުގައި ކުރިޔަށް ދިއުމުގެ އުންމީދު ރާއްޖެ އާކޮށްފިއެވެ.
މިރޭ ގަލޮޅު ދަނޑުގައި ކުޅުނު މެޗްގައި ރާއްޖެ ބަންގްލަދޭޝް ބަލިކޮށްފައިވަނީ 2-0 ގެ ނަތީޖާއަކުން ނެވެ.
މެޗްގެ ފުރަތަމަ ހާފްގައި ބަންގްލަދެޝް އިން މޮޅުކުޅުމެއްދެއްކިއެވެ. އެގޮތުން ރާއްޖޭގެ ގޯލަށް ނުރައްކާތެރި ހަމަލާއެއް މެޗްގެ ވަރަށް ކުރީކޮޅު ބަންގްލަދޭޝްގެ ބިޕްލޯ އަޙްމަދު ފޮނުވާލި ނަމަވެސް ރާއްޖޭގެ ގޯލްކީޕަރު ފައިސަލް ވަނީ ދިފާއުކޮށްފައެވެ.
ފުރަތަމަ ހާފްގެ 27 ވަނަ މިނެޓްގައި ރާއްޖޭގެ އަސްއަދު އަލީ( އަޑުބަރޭ) އަށް އަނިޔާވެގެން ވަނީ ބާލާފައެެވެ.
ފުރަތަމަ ހާފް ނިމެންދިޔައިރު ރާއްޖެގެ ކުޅުން ބަންގްލަދޭޝް ގެ ކުޅުމަށްވުރެ ރަގަޅު ކުރިއިރު، ފުލުފުލުގައި ބަންގްލަދޭޝް ގެ ގޯލަށް ރާއްޖެއިން އައީ ނުރައްކާ ކުރަމުންނެވެ. އެގޮތުން ފުރަތަމަ ހާފެ ގެ ފަހުކޮޅުގައި ހުސެއިން ނިހާން އަށް ލިބުނު ފުރުސަތު ފާހަގަ ކޮށްލެވެއެވެ. އަދި ހާފް ގެ އިތުރު ވަގުތުގައި ދަނގަޑޭ ބަންލްދޭޝްގެ ގޯލަށް ފޮނުވާލި ނުރައްކާތެރި ހަމަލާ އެޓީމުގެ ގޯލްކީޕަރު ވަނީ ދިފާއުކޮށްފައެވެ.
ދެވަނަ ހާފް ފެށިގެން ފެނުނީ ރާއްޖޭގެ ކުޅުން ވަރަށް ބޮޑުތަން ރަގަޅު ކޮށްގެން ކުޅުނު ތަނެވެ. އެގޮތުން މެޗް ކޮންޓްރޯލް ކޮށްގެން ގިނަވަގުތު ބޯޅަ ހިފަހައްޓައިގެން ގިނަ ހަމަލާތަކެއް އައީ އުފައްދަމުންނެވެ.
މެޗުގައި ރާއްޖޭން ލީޑު ނަގާފައިވަނީ ދެވަނަ ހާފު ފަށައިގެން 10 ވަނަ މިނެޓުގައެވެ. އެލަނޑު ކާމިޔާބު ކޮށްދިނީ ހަމްޒާ މުޙައްމަދު (ހަމްޕު) އެވެ. އެއީ އޭރިއާ ތެރެއިން ފޮނުވާލި އޯވަހެޑް ކިކަކުންނެވެ. ރާއްޖޭގެ ދެވަނަ ލަނޑު މެޗްގެ 73 ވަނަ މިނެޓްގައި ލިބުނު ޕެނެލްޓީއަކުން ކާމިޔާބުކޮށްދިނީ އަލީ އަޝްފާގު( ދަނގަޑޭ) އެވެ. އެއީ ޕެނެލްޓީ އޭރިއާގެތެރެއިން ރާއްޖޭގެ ހަސަން ނާއިޒު(ދާދު) އަށް ކުރި ފައުލަކާއި ގުޅިގެން ރެފްރީ ދިން ޕެނެލްޓީއެކެވެ.
މިރޭގެ މެޗުން މޮޅުވުމާއިއެކު ރާއްޖެ އޮތީ 3 ޕޮއިންޓާއިއެކު 3 ވަނައިގައެވެ. އެއްވަނަގައި 6 ޕޮއިންޓާއިއެކު އޮތީ ނޭޕާލް އޮތް އިރު ބަންގްލަދޭޝް އޮތީ 4 ޕޮއިންޓާއި އެކު 2 ވަނައިގައެވެ. އިންޑިއާ 2ޕޮއިންޓް އާއި އެކު 4 ވަނައިގައެވެ.
