އުރީދޫ ސާފް ޗެމްޕިއަންޝިޕް 2021 ގައި މިރޭ ރާއްޖެ އަާއި ނޭޕާލް ބައްދަލުކުރި މެޗް ނޭޕާލް މޮޅުވެއްޖެ.
މިއީ ބައިނަލްއަޤްވާމީ މުބާރާތެއްގައި ރާއްޖެ އަތުން ނޭޕާލް މޮޅުވި ފުރަތަމަ ފަހަރެވެ. މިރޭގެ މެޗުން ރާއްޖޭގެ މައްޗަށް ނޭޕާލް ކުރި ހޯދާފއިވަނީ 1-0 ގެ ނަތީޖާ އަކުންނެވެ.
މެޗުގެ ފުރަތަމަ ހާފްގައި ލަނޑެއް ނުފެނުނު ނަމަވެސް ކުޅުމަށް ބަލާލާއިރު ފުރަތަމަ 10 މިނެޓްގައި ރާއްޖެ ވަނީ މޮޅުކުޅުމެއް ދައްކާ ގިނަ ފުރުސަތުތަކެއް ހޯދާފައެވެ. އެގޮތުން ހަވަނަ މިނެޓުގައި ހަމްޒާ މުޙައްމަދު (ހަމްޕު) އާއި އަލީ ފާސިރު (ސެންޓޭ) ފޮނުވާލި ހަމަލާތަށް ވަނީ ނޭޕާލުގެ ޑިފެންޑަރުން ދިފާއުކޮށްފައެވެ. މީގެ އިތުރުންވެސް ފުރަތަމަ ހާފްގައި ލަނޑު ޖަހާނެ ގިނަ ފުރުސަތުތަކެއް ދިވެހި ޤައުމީ ޓީމަށް ވަނީ ލިބި ބޭނުންނެކުރެވިފައެވެ.
ދެޓީމުގެ ވަކިވަކި ކުޅުންތެރިންނަށް ބަލާއިރު ނޭޕާލް ޓީމަށްވުރެ ކުޅުންތެރިންގެ ހުނަރު ފެނިގެންގޮސްފައިވަނީ ވެސް ރާއްޖޭގެ ޓީމުންނެވެ.
މެޗްގެ ހަމައެކަނި ލަނޑު ނޭޕާލު ޓީމުން ޖަހާފައިވަނީ މެޗްގެ 85 ވަނަ މިނެޓްގައި ލިބުނު ކައުންޓަ އެޓޭކެއްގައި މި ލަނޑު އެ ޓީމަށް ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި މަނީޝް ޑަންގީއެވެ.
މުބާރާތުގައި ރާއްޖެ ދެން ކުޅެންޖެހޭނީ އަންނަ ބުރާސްފަތި ދުވަހު ބަންގްލަދޭޝް އާއެވެ. ބަންގްލަދޭޝް ވަނީ އެމީހުންގެ ފުރަތަމަ މެޗުން ސްރީލަންކާ ބަލިކޮށްފައެވެ.
