ތުނޑީ ފުޓްސަލް ޗެލެންޖް 2023: ފޯރިގަދަ ކުއާޓާގެ މެޗުތައް ނިމި ސެމީއަށް ދިޔަ ޓީމުތައް ކަށަވަރުވެއްޖެ.

ލ. ގަމު ތުނޑީ އަވަށުގައި މިހާރު ކުރިއަށްދާ ތުނޑީ ފުޓްސަލް ޗެލެންޖް 2023 ގެ ފޯރިގަދަ ކުއާޓާ ފައިނަލް މެޗުތައް ނިމި، ސެމީ ފައިނަލް މެޗުތައް ޔަގީން ވެއްޖެއެވެ.

ތުނޑީ ފުޓްސަލް ދަނޑުގައި ކުރިއަށްދާ މި މުބާރާތުގައި ރޭ ކުޅެފައިވަނީ ކުއާޓާ ފައިނަލުގެ ފަހު ދެ މެޗެވެ.

އެއީ ޑިޓްރޮއިޓްސް އާއި ފެނަކަ މަބައިދޫ ބްރާންޗް ބައްދަލުކުރި މެޗާއި، ބެސްޓް އަދި ފޮއެމަތި ބައްދަލުކުރި މެޗެވެ. ރޭގެ މެޗުތަކަށްފަހު ސެމީ ފައިނަލް ޔަގީންވެފައިވާ ޓީމުތަކަކީ، ޖީޖީ އެސްސީ އާއި ސްޕާކް ޕްލަގް އަދި ފެނަކަ މާބައިދޫ ބްރާންޗް އާއި ފޮއެމަތި ޓީމްއެވެ.

ރޭ ކުޅުނު ކުއާޓާގެ ފުރަތަމަ މެޗުގައި ފެނަކަ މާބައިދޫ އިން ޑިޓްރޮއިޓްސް ބަލިކުރީ މެޗު 2-2 އިން އެއްވަރުވެ ޕެނަލްޓީގައި 7-6 ގެ ނަތީޖާއަކުންނެވެ.

މި މެޗުގައި ފުރަތަމަ ދެ ލަނޑު ޖަހާ ލީޑު ނެގީ ޑިޓްރޮއިޓްސް އިންނެވެ. ނަމަވެސް ފެނަކަ މާބައިދޫ އިން ވަނީ ފަހަތުން އަރައި ދެ ލަނޑު ޖަހާ މެޗުގެ ނަތީޖާ ހަމަހަމަކޮށްފައެވެ. މެޗުގެ ފުރިހަމަ ވަގުތު ހަމަވިއިރުވެސް ދެޓީމު 2-2 އިން އެއްވަރުވެފައި އޮތުމުން ނަތީޖާ ނެރުނީ ޕެނަލްޓީ ޖަހައިގެންނެވެ. ޕެނަލްޓީގައި ކުރިހޯދާ ސެމީ ކަށަވަރުކުރީ ފެނަކަ މާބައިދޫ އިންނެވެ.

މި މެޗުގައި ޑިޓްރޮއިޓްސް އަށް ލަނޑުތައް ޖަހައިދިނީ ހަސަން ޝިހުބާން އާއި މުހައްމަދު އައިހަމްއެވެ. ފެނަކަ މާބައިދޫ އަށް ކަނޑުތައް ޖަހައިދިނީ އަލީ ރިޝާންއެވެ. މެޗުގެ މޮޅު ކުޅުންތެރިޔަކީ ނި މެޗުގައި މޮޅުކުޅުމެއް ދައަކާ ގިނަ ސޭވްތަކެއް ކުރި ފެނަކަ މާބައިދޫގެ ގޯލްކިޕަރު ޝަމްހާޒް މޫސާއެވެ.

ރޭ ކުޅުނު އަނެއް މެޗުގައި 1-0 އިން ބެސްޓް ބަލިކޮށް، ފޮއެމަތި ޓީމް ވަނީ ސެމީ އިން ޖާގަހޯދާފައެވެ. މެޗުގައި ޓީމް ފޮއެމަތި އަށް ލަނޑު ޖަހައިދިނީ މުހައްމަދު ރަޒާންއެވެ. މި މެޗުގެ މޮޅު ކުޅުންތެރިއަކީ ވެސް އޭނާއެވެ.

މިއަހަރުގެ މުބާރާތް ކުރީ އަހަރަށްވުރެ ފޯރިގަދަވުމުގެ އިތުރުން އިންތިޒާމުތައްވެސް ފުރިހަމަވާނެ ކަމަށް މުބާރާތް އިންތިޒާމް ކުރި ތުނޑީ ޒުވާނުން މައުލޫމާތު ދެއެވެ.

މުބާރާތުގެ ޗެމްޕިއަން ޓީމަށް ދޭ ފައިސާގެ އިނާމަކީ 10،000 ރުފިޔާއެވެ. އަދި ރަނަރަޕް ޓީމަށް ދޭ ފަައިސާގެ އިނާމަކީ 3000 ރުފިޔާއެވެ

މުބާރާތުގެ އޮންލައިން މީޑިއާ ޕާޓްނަރަކީ ”ފެންވަރު“ އެވެ. މިފަހަރުގެ ފޯރިގަދަ މުބާރާތުގެ އެންމެފަހުގެ މައުލޫމާތުވެސް ”ފެންވަރު އޮންލައިން“ އިން ގެނެސްދެވޭނެއެވެ.

ސެމީ ފައިނަލް މެޗުތައް (28 ނޮވެމްބަރު 2023)

ސްޕާކް ޕްލަގް – ޖީޖީ އެސްސީ (20:30)
ފެނަކަ މާބައިދޫ ބްރާންޗް – ފޮއެމަތި (21:30)