ދިވެހިރާއްޖޭޣެ ޤައުމީ ބޭންކް، ބޭންކް އޮފް މޯލްޑީވްސް (ބީއެމްއެލް)ގެ އޯޓީޕީ ކޯޑް ވަޓްސްއެޕް މެދުވެރިކޮށް ލިބޭގޮތަށް ބީއެމްއެލްއިން ހަމަޖައްސަވައިފިއެވެ.
ބޭންކުން ނެރުނު ނޫސްބަޔާނެއްގައި ބުނެފައިވަނީ ބީއެމްއެލްގެ އޮންލައިން ޓްރާންސެކްޝަންތަކަށް ވަން-ޓައިމް ޕާސްވޯޑް (އޯޓީޕީ) ލިބޭ ރަސްމީ ޗެނަލްއެއްގެ ގޮތުގައި ވަޓްސްއެޕްވެސް މިހާރު އިތުރުކޮށްފައިވާ ކަމުގައެވެ.
ބީއެމްއެލްގެ ބަޔާނުގައި ބުނެފައިވާގޮތުން އެ ބޭންކުގެ ކަސްޓަމަރުން ބޭންކުގައި ރަޖިސްޓާކޮށްފައިވާ ނަންބަރަށް ވަޓްސްއެޕް މެދުވެރިކޮށް ފަސޭހަމަކާ އެކު އޯޓީޕީ ލިބޭނެ ކަމުގައެވެ.
ބޭންކްއޮފް މޯލްޑިވްސްގެ ރަސްމީ އޯޓީޕީ ޗެނަލެއްގެ ގޮތުގައި މިހާތަނަށް ހިމަނާފައިވާ އެސްއެމްއެސް އާއި އީ-މެއިލް އަދި އޮތެންޓިކޭޓަރުގެ އިތުރުން ވަޓްސްއެޕް ހިމެނުމާ އެކު، ބީއެމްއެލްގެ ކަސްޓަމަރުންނަށް މުއާމަލާތްތައް ހިންގަން އިތުރަށް ފަސޭހަ ވާނެ ކަމަށް ވެސް ބީއެމްއެލްގެ ބަޔާނުގައި ބުނެފައިވެއެވެ.
ބީއެމްއެލްގެ ސީއީއޯ މުހައްމަދު ޝަރީފް ވިދާޅުވީ ޑިޖިޓަލް ބޭންކިންގެ ބޭނުންތައް އިތުރުވަމުންދާ އިރު، އަބަދުވެސް މަސައްކަތް ކުރަނީ ކަސްޓަމަރުންނަށް އީޖާދީ އަދި ރައްކާތެރިކަމާ އެކު، ފައިސާ ދެއްކޭނެ މަގުތައް ފޯރުކޮށްދިނުމަށް ކަމުގައެވެ.
”އޯޓީޕީ ލިބޭ ވަސީލަތެއްގެ ގޮތުގައި ވަޓްސްއެޕް ބޭނުންކުރެވޭނެ ގޮތް ހެދުމަކީ އަޅުގަނޑުމެންގެ ކަސްޓަމަރުންނަށް ބޭންކިންގެ ހިދުމަތްތައް ރައްކާތެރިކަމާއެކު އަދި ފަސޭހަކަމާއެކު ލިބޭނެ މަގު ފަހިކޮށްދޭނެ ކަމެއް“ ޝަރީފް ވިދާޅުވި އެވެ.
ބީއެމްއެލްގެ ބަޔާނުގައި ބުނެފައިވަނީ ވަޓްސްއެޕް މެދުވެރިކޮށް އޯޓީޕީ ހޯދަން ބޭނުންވާ ކަސްޓަމަރުންނަށް އިންޓަނެޓް ބޭންކިން ނުވަތަ މޯބައިލް ބޭންކިން އެޕް މެދުވެރިކޮށް އޯޓީޕީ ލިބެން އިހުތިޔާރުކުރާ ގޮތް ބަދަލު ކުރެވޭނެ ކަމުގައެވެ.
ބީއެމްއެލްގެ އޯޓީޕީ ޗެނަލް ވަޓްސްއެޕަށް ބަދަލު ކުރުމުގެ މަރުހަލާގައި ކަސްޓަމަރުންގެ ރައްކާތެރިކަން ކަށަވަރު ކުރުމަށް ކަސްޓަމަރުން މިހާރު ބޭނުންކުރާ އޯޓީޕީ ޗެނަލްއެއް ބޭނުންކުރަން ޖެހޭނެކަމަށް ވެސް ބީއެމްއެލްއިން ހާމަކުރައްވައެވެ.
ބޭންކް އޮފް މޯލްޑިވްސްގެ މޯބައިލް އެޕްލިކޭޝަން މެދުވެރިކޮށް ފައިސާ ޓްރާންސްފާކުރަން ކިއުއާރް ކޯޑް ބޭނުން ކުރެވޭ ގޮތް ވެސް އެ ބޭންކުން މިހާރުވަނީ ހަމަޖަައްސަވާފައެވެ.
