ވަފާތެރި މަވީމޭ- 10 ވަނަބައި

ޝައިންގެ- ވަފާތެރި މަވީމޭ- 10 ވަނަބައި

ޝާނީވެސް އޭނާދެކެ ލޯބިވެޔޭ ބައެއް ފަހަރު އޭނާގެ ހިތަށް އަރައެވެ. ނަމަވެސް އަނެއްބައި ފަހަރު އޭނާގެ ހިތްބުނަނީ އެއީ ހަމްދަރުދީ ކަމުގައެވެ. ކުޑައިރުވެސް ޝާނީ އޭނާއަށް ހަމްދަރުދީވެއެވެ. އެނޫން ނަޒަރަކުން އަންހެން ކުއްޖަކު އޭނާއާ ދިމާ ބަލާފާނެ ހެއްޔެވެ؟ އޭނާފަދަ އުނި މީހަކުދެކެ ލޯބި ވެދާނެ ހެއްޔެވެ؟ އޭނާއަށް ޝައްކެވެ. ޝާނީގެ ލޯބި ޔަޤީންކުރަން އޭނާ ހަދާނީ ކިހިނެއް ހެއްޔެވެ؟ ސުވާލުކުރާނީ ހެއްޔެވެ؟ ނޫނީ އޭނާ ލޯބި ހުށަހަޅާފައި ޖަވާބަކަށް އިންތިޒާރުކުރަން ވީ ހެއްޔެވެ؟ ނޫނެކެވެ. ބަދުނާމު ވާކަށް އޭނާ ބޭނުމެއްނޫނެވެ. ވިސްނާ ފިކުރުކުރުމުގައި ރޭދެބައިވާންދެން ޖިނާހް ތުނޑީގައި އޮތުމަށްފަހު އޭނާ ގެޔަށްއައީ ފަތިސްވުމާއި ގާތްވުމުންނެވެ.

ޖެހިގެން އައި ދުވަހުގެ ހެނދުނުގެ ވަގުތެވެ. ގޯތިތެރެ ކުނިކަހާ ނިމިގެން ސައިބޯން ދިޔައިރު، ޝާނީ ހުރީ ނިދިއައިސްގެން ހަލާކުވާ ވަރުވެފައެވެ. ކާމޭޒުދަށުގައި އިންއިރުވެސް އިރުއިރުކޮޅުން އޭނާ ތާއްޔާ ޖެހެއެވެ.

“ ދަރިފުޅާ! ތެލިތައްހުރީ ވަރަށް ހަޑިވެފަ….މިއަދު ދޭބަލަ ތެލިތައް ދޮވެލަދޭން….“ ނިދި ޖެހެމުން ދިޔަ ޝާނީ ސިހުނީ މަންމަގެ އަޑުންނެވެ.

“ މަންމަ މިއަދު މިއުޅެނީ ބަނބުކެޔޮ ތެލުލަން….އެއްކަލަ ބޮޑުތާސްވެސް ދޮވެލަން ޖެހޭނެއްނު…ކުރީ ދުވަހު ފަތް ތެލުލިގޮތަށް މަންމައަށް ދޮންނަންވެސް ނުދެވިގެން މިއުޅެނީ….ދަރިފުޅު އެދޮވެގެން އަންނަންވާއިރަށް ބަނބުކެޔޮ ކޮށާލެވޭތޯ މަންމަ ބަލާނަން…ސަލްމާވެސް އަންނާނަމޭ ބުނި “ ޝާނީ ޖަވާބެއްނުދީ އިންދައި އަނެއްކާވެސް މަންމަ ވާހަކަ ދެއްކިއެވެ.

ކިތަންމެ ނިދިއައި ނަމަވެސް އޭނާއަކީ ދުވާލު ނިދާ އުޅޭ ކުއްޖެއްނޫންކަމުން ނިދާކަށް އޭނާ ބޭނުމެއްނުވިއެވެ. އެހެންކަމުން އޭނާ ސައިބޮއެގެން މަންމަ ބުނިފަދައިން ތެލިދޮވުމަށްޓަކައި ތެލިތައް ބަރޯއަށް އަޅައިގެން ތުނޑީމަގަށް މިސްރާބު ޖެހިއެވެ. އެމަގަށްދާން އޭނާ ގަސްތުކުރީ އެއީ ގެޔާއި އެންމެ ކައިރިމަގުކަމަށް ވީތީއެވެ. ލަސްހިނގުމެއްގައި ގޮސް ގޮނޑުދޮށަށް ފޭބިއިރު، އެއްވެސް މީހަކު ފެންނާކަށް ނެތެވެ. އޭނާ ތެލިތައް ހިފައިގެން އައިސް ރާޅުޖެހިއަސް ނުތެމޭ ހިސާބުގައި ތެލިތައް ބެހެއްޓިއެވެ. އަދި އެތަނުން ތެއްޔެއް ހިފައިގެން ގޮސް ލޮނުއަޅައިގެން އައިސް އިށީނެވެ. އަދި ތެތްޔެއްގެ ތެރޭގައިވާ ދޮންނަކުނޑި  އެޅި ނާށިވެސް ނަގާ ވެލިގަނޑުމަތީގައި ބެހެއްޓިއެވެ.

“ އަދި ނަރުގަނޑު ނުލާ މިއާދެވުނީ…“ ނަރުގަނޑު ނަގަން ބެލިއިރު ނެތުމުން  އޭނާއަށް ބުނެވުނެވެ.

އޭނާ އިންތަނުން ތެދުވެގެން ގޮސް ހޭޅިފަށުން ބޮނބިފަޅިއެއް ހޯދައިގެން އެއިން ކިފުޅިގަނޑެއް ނައްޓާލިއެވެ. އެހިފައިގެން އައިސް އަނެއްކާވެސް އޭނާ ކުރިން އިންތަނުގައި އިށީނދެ ތެލިދޮންނަން ފެށިއެވެ. ޖެހެމުން ދިޔަ ނަލަ ނަލަ ރޯޅީގެ ސަބަބުން އޭނާގެ އެސްފިޔަތައް ބަރުވަމުން ދިޔަނަމަވެސް އޭނާ ކެތްތެރިކަމާއެކު ތެލިދޮންނަމުން ދިޔައެއެވެ. ހުރިހާ ތެއްޔެއް ދޮވެ މޫދު ކައިރިއަށް ގޮސް ވެލިފިލުވާ ހަދާނިމުނުއިރު، އޭނާ ވަރުބަލިވެ ލޮޑުވާގޮތް ވެއްޖެއެވެ. އެހެންކަމުން ތެލިތައް ބަރޯއަށް ލުމަށްފަހު އޭނާއައިސް ކާނިގަސްދޮށު، ދޮންވެލިގަނޑުމަތީގައި އޮށޯވެލީ ވަރުބަލި ފިލުވާލުމަށެވެ. އޭނާ ފުންނޭވާއެއް ދޫކޮށްލަމުން ކާނިގަހަށް ނަޒަރު ހުއްޓާލިއެވެ. ވަޔާއެކު ކާނިގަހުގެ ފަތްތައް ހެލޭ މަންޒަރު ބަލަން އޮއްވައި މަޑުމަޑުން އޭނާގެ ލޯމެރެންފެށިއެވެ. ގަދަ ހަދަ ހަދާހުރި އެސްފިތަތައް ތިރިވެ، އިސާހިތަކު ނިދި އޭނާގެ މައްޗަށް ސަވާރުވިއެވެ.

އަތިރިއަކަށް ދާންޖެހިގެން ގޮނޑުދޮށަށް ފައިބާ އުޅެފައި ގެޔަށް ދިއުމަށްޓަކައި ތުނޑީމަގުން އެއްގަމަށް މިސްރާބުޖެހި އަރީފްއަށް ހުއްޓެވުނީ ކާނިގަސްދޮށުގައި އުޑުތިލަމަތިން އޮތް ޝާނީ ފެނުމުންނެވެ. ލޯމަރައިގެން އޮތްނަމަވެސް ޝާނީއޮތީ ނިދާފައިކަމެއް އަރީފްއަކަށް ޔަޤީނެއްނޫނެވެ. އަރީފް މަޑުމަޑުން ގޮސް ޝާނީގެ ގާތަށް ހުއްޓުމުންވެސް އެއްވެސް ހިލަމެއް ޝާނީއަކަށް ނުވިއެވެ. ޝާނީ ނިދާފައިތޯ ޔަޤީންކޮށްލުމުގެ ގޮތުން އަރީފް ކަރުކެހިލިއެވެ. މިފަހަރުވެސް ޝާނީ އެއޮތްގޮތަށް އޮތެވެ.

“ ހަމަ ރަނގަޅަށްވެސް ނިދާ މަރުވެފަދޯ މިއޮތީ؟….ދެންވެސް މަގޭ އަތްލައިފިއްޔާ މަ ގޯސްވާނީ…މިހާ ހާމަކަންބޮޑު ތަންތާނގަ މިހެން އޮންނާނީ މަކަހަލަ މީހުން މަގުފުރައްދާކަށް ނޫންތަ އަޅެ…“ އަރީފް އޭނާގެ އަމިއްލަ ނަފްސާ މުޚާތަބުކުރަމުން ޝާނީގެ ގާތުގައި އިށީނެވެ. ޝާނީގެ މޫނަށް ބަލަން އިރުކޮޅަކު އިނުމަށްފަހު ދެކޮޅު ހޯދާ ބަލާލުމަށްފަހު ޝާނީގެ މޫނާ ދިމާއަށް ގުދުވިއެވެ. އޭނާ ބޭނުންވީ ޝާނީގެ ރީތިތުންފަތުގެ މީރުކަން ކުޑަހިނދުކޮޅަކަށް ނަމަވެސް ލިބިގަންނާށެވެ. ޝާނީގެ މޫނާއި އިންޗިއެއްހައިތަނަށް ގާތްވެފައި ހުއްޓައި ކުއްލިއަކަށް އޭނާގެ ބޮލުގައި އެއްޗަކުން ޖެހުމާއެކު ސިހިފައި އޭނާއަށް އަވަސް އަވަހަށް ތެދުވެވުނެވެ.

“ ހޫމް…ކާނިއޮށެއްދޯ؟…“ އޭނާގެ ގާތަށް ވެއްޓިފައި އޮތް ކާނިއޮށް ނަގައި އެއްލާލަމުން ހީލާފައި އޭނާ ބުންޏެވެ. އޭނާ ފުންނޭވާއެއް ދޫކޮށްލަމުން އަނެއްކާވެސް ޝާނީއާއި ދިމާއަށް ގުދުވިއެވެ. ނަމަވެސް މިފަހަރު ކުރިޔަށްވުރެ ބާރަށް އޭނާގެ ބޮލުގައި އެއްޗަކުން ޖެހުމުން ސިހިފައި އޭނާ ވެލިގަނޑުމައްޗަށް ވެއްޓުނެވެ.

“ އަތްދިއްޔޯ….މަގޭ ބޯ ފަޅައިގެން ކަންނޭނގެ އެދިޔައީ….“ ބޮލުގައި ފިރުމަމުން ތެދުވެ އޭނާއަށް ބުނެވުނެވެ. މިފަހަރު އޭނާގެ ބޮލުގައި ޖެހުނީ ކާނިއޮށެއް ނޫންކަން އޭނާއަށް ޔަޤީންވިއެވެ.  ބޮލުގައި އަތްލިއިރު ތަންކޮޅެއްވަނީ ގޮނބިލައިގެން އަރާފައެވެ. އޭނާ މަޑުމަޑުން އިންތަނުން ތެދުވެ ދެކޮޅު ހޯދަން ފެށިއެވެ. ކޮންމެވެސް މީހަކު ފިލާހުރެ އޭނާގެ ބޮލުގައި ގާކޮޅަކުން ޖެހީކަމުގައި އޭނާއަށް ހީވިއެވެ. އޭނާ މަޑުމަޑުން ކާނިގަހުގެ ބިއްދޮށުން ހޭޅިތެރެއަށް ވަނެވެ. ތަންކޮޅަކަށް ވަދެވުމާއެކު އޭނާ ސިހިފައި ފަހަތަށް ޖެހުނީ އޭނާގެ ކުރިމައްޗަށް ނުކުތް ޖިނާހް ފެނުމުންނެވެ. އޭރުވެސް ޖިނާހްގެ އަތުގައި ގާބުރިއެއް އޮތެވެ. އޭނާ ބަލާލުމާއެކު ގާބުރި މަޅާލިގޮތުން ގަތްބިރުން އޭނާއަށް ދުއްވައިގަނެވުނެވެ.

“ މި މަންމަނު ކަލޭގެ ދޯ މިއުޅެނީ؟…ކަލޭ ކީއްތިކުރަނީމިތާ؟…“ ހަރުކަށިކަން މޫނަށް ގެންނަމުން އިޝާރާތުން އަރީފް އަހާލިއެވެ.

“ ކަލޭ ކީއްކުރަނީ މިތާ؟“ ހަމަ އެކުލަވަރު މޫނަށް ގެންނަމުން ޖިނާހްވެސް އިޝާރާތުން އަރީފްއާ ސުވާލުކޮށްލިއެވެ.

“  މަ ނުކުރަން ކަމެއް….“ ޖިނާހް ބަލަންހުރި ގޮތުން ޖެހިލުންވެފަ އަރީފް ބުނެލިއެވެ.

“ ދޭ މިތަނުން….އެހެން ނޫނީ މިގާބުރިން ޖަހާނީ…“ އަރީފް ބިރުގަންނަވާލުމަށްޓަކައި ގާބުރިމަޅާލަމުން ޖިނާހް ބުނުމާއެކީ އަރީފް ފަހަތަށް ޖެހުނެވެ.

“ މިއަދި ހާދަ ކަންތައްބޮޑު ސޮރެކޭ…މިސޮރު ފަހަކަށް ނުދާނެ މަގޭ މަރާކަށްވެސް….“ އަރީފް ކުދި ކިޔަމުން ހޭޅިފަށުން ނުކުމެ އެއްގަމަށް އެރިއެވެ.

އަރީފްއަށްވުރެ އެތައް އަހަރެއް ހަގުނަމަވެސް ހަށިގަނޑާއި އިސްކޮޅުވެސް އޭނާގެ ދެގުނަ ޖިނާހް ބޮޑެވެ. އެހެންކަމުން ޖިނާހްގެ އަތުން އަނިޔާއެއް ލިބިދާނެކަމުގެ ބިރު އޭނާއަށް ހީވިއެވެ. ހަމަގައިމުވެސް ޖިނާހްއާއި ހިފައިގެން އޭނާ ގަދަނުވާނެކަން އޭނާއަށް ޔަޤީނެވެ. އަނެއްކޮޅުން އޭނާއަކީ މިރަށަށް ނިސްބަތްވާ މީހެއްވެސް ނޫނެވެ. ޖިނާހްފަދަ މުއްސަނދި އާއިލާއެއްގެ ކުއްޖަކާ ކުޅެލާފައި އޭނާއަށް ސަލާމަތުން ނުވެސް ހުރެވޭނެއެވެ. މިހުރިހާ އެއްޗެއް ހިތަށްއެރުމުން އޭނާ ބޭނުންވީ އަވަހަށް އެތަނުން ދާށެވެ.

އަރީފް އެއްގަމަށް އަރައިގެން ދިއުމުން ޖިނާހް ގޮނޑުދޮށަށް ފޭބިއެވެ. އޭރުވެސް ޝާނީ އެއޮތްގޮތަށް ހަމަހިމޭންކަމުގައި ނިދާފައި އޮތެވެ.

“ ޝާނީވެސް ރޭހަތަރުދަމު ނުނިދަނީތަ؟…މިތަނަށް އައިސް ނިދާފަ މިއޮތީ؟…އަދި ނިދިވެސް ގަދަ ކުއްޖެހޭ މަހިތަށްއަރާ….ރޮލުން ކާލިނަމަވެސް ނޭނގުނީސް…“ ޝާނީގެ ގާތަށް ހުއްޓި އެމައުސޫމު މޫނަށް ބަލަންހުރެ ހިތާ ހިތާ އޭނާ ކިޔާލިއެވެ.

މިވަގުތު އޭނާއަށް ނާދެވުނުނަމަ އަރީފް ކޮންމެފަދަ ކަމެއްވެސް ޝާނީއަށް ކޮށްފީހެވެ. އޭނާ ، މަންމަބުނެގެން ލޮނުވެލި ބާލިދީއެއް ބަލާ އައީ ޝާނީއާއި ދިމާވާނެ ކަމަކަށް ނޫނެވެ. ނަމަވެސް އޭނާ ގޮނޑުދޮށަށް ފައިބަން ދިމާކޮށްލި ވަގުތު ބަރޯފެނުމުން ކޮންމެވެސް މީހަކު އެބައުޅޭކަން އެނގި، ކާކުތޯ ބަލާލުމަށްޓަކައި ހޭޅިއަށް ވަދެ ފިލާހުރެ ސިއްރު ބެލިއިރު އެއީ ޝާނީއެވެ. ޝާނީ ތެލިދޮންނަން އިންދައި ފެނުމުން ޝާނީގެ ގާތަށް ދާން ބޭނުންވި ނަމަވެސް ދާން ނުކެރިފައިހުރީ، ރޭގައި ޝާނީގާތު ތުނޑިއަށް އަންނަން ބުނެވުނީތީ ޝާނީއާއި ކުރިމަތިލާން ޖެހިލުންވެފައެވެ. އެހެންކަމުން އޭނާ ބޭނުންވީ މިވަގުތު ޝާނީއަށް ނުފެނި ހުރުމަށެވެ. އޭނާ ޝާނީގެ ހަރަކާތްތަކަށް ބަލަން ހުއްޓައި، ތެލިދޮވެ ނިންމާލުމަށްފަހު ކާނިގަސްދޮށުގައި ޝާނީ އޮށޯތެވެ. ނަމަވެސް ގިނައިރުތަކެއްނުވެ އަރީފް އަންނަ މަންޒަރު ފެނުނެވެ. އަރީފް ޝާނީގެ ގާތަށް އައުމުން އޭނާ ކުރާކަމެއް ބަލާލުމަށްޓަކައި ޖިނާހް ސަމާލުވެގެން ހުއްޓެވެ. އަރީފްއަކީ ޝާނީގެ ބޮޑުބޭބެ ދޮންދަރިއަކަށް ވީތީ އޭނާ ފުރަތަމަ ހީކުރީ ޝާނީއެތާ އޮތުމުން ކަންބޮޑުވެގެން ގޮވަން އުޅުނީ ކަމުގައެވެ. ޝާނީގެ ގާތުގައި އަރީފް އިށީނދެ ޝާނީއާ ދިމާއަށް ގުދުވުމުން އޭނާގެ މަޤުސަދު ރަނގަޅުނޫންކަން ޖިނާހްއަށް އެނގުނެވެ. އަދި ޝާނީ ހަރަކާތެއް ނުކޮށް އޮތުމުން އޭނާ އެއޮތީ ނިދާފައިކަންވެސް ޔަޤީންވިއެވެ. އަރީފްގެ ބޮލުގައި ގާކޮޅުން ޖެހީމަ އަރީފް އޭނާ ހޯދަން ނައިނަމަވެސް އޭނާ އެތަނުން ނުކުމެގެންވެސް އަރީފް މަތަކުރީހެވެ. އެއީ އެހާ ގޮތްކުޑަމީހެއްކަމެއް ކުރިން އޭނާއަކަށް ނޭނގެއެވެ. ނަމަވެސް ދެން އޭނާ ވިސްނާނެއެވެ.

އެއްވެސް ފިކުރެއް ޚިޔާލެއްނެތި ނިދާފައި އޮތް ޝާނީގެ މޫނަށްބަލަން ޖިނާހްއަށް ހުރެވުނެވެ. އޭނާގެ އަތުގައި ކެމެރާއޮތް ނަމަ މިވަގުތުކޮޅުގެ ހިތްގައިމުކަން އޭނާގެ ކެމެރާގައި ރައްކާކުރީހެވެ. އެހެނަސް މިމަންޒަރު އޭނާގެ ހިތުގައި އަބަދަށް ފޮރުވިއެވެ.  

“ ޝާނީ.. ރޭގަ ނުނިދާ ކުރީ ކީއްބާއޭ؟ އަހަރެންނާމެދު ވިސްނީބާއޭ؟…ޝާނީ ހަޤީގަތުގައިވެސް އަހަރެންދެކެ ލޯބިވޭ ހެއްޔެވެ؟..“ ޖިނާހް ހިތާ ހިތާ ކިޔާލިއެވެ.  ނޫނެކެވެ. މިއީ އޭނާއަށް ކުރެވޭ ފޮނި އުއްމީދެކެވެ. އޭނާ ކިތަންމެ ވަރަކަށް ވިސްނިއަސް އެސުވާލުގެ ޖަވާބު ޔަޤީންކަމާއެކު އޭނާއަކަށް ނޭނގޭނެއެވެ.

ޖިނާހް ވިސްނަން ހުއްޓައި ޝާނީ އެއްފަރާތަކަށް ފުރޮޅިލާފައި ހަމަޖެހިލަމުން އަނެއްކާވެސް ނިދީގެ ތެރެއަށް ގެނބުނެވެ. މިހާރު އޭނާގެ ހުޅިގަނޑުގައިވެސް އޮތީ ހުސް ވެއްޔެވެ. ދެއަތުގައިއާއި ހެދުމުގައިވެސް ވެއްޔެވެ. ނަމަވެސް ޝާނީއަށް މިއިންކަމެއް ރޭކާނުލައެވެ. ޝާނީގެ އެމައުސޫމު ކަމަށްޓަކައި ޖިނާހްއަށް ހިނިތުންވެވުނެވެ.

“ ދެން އެކަމަކު މީހުން ނިދާނެ ތަނެއްތަމީ؟…އަނެއްކާވެސް ކޮންމެވެސް ފިރިހެނަކަށް ޝާނީ މިހެންއޮއްވާ ފެންނާނީ….ޝާނީ ހޭލައްވަންވީ ކަންނޭނގެ….“ ޖިނާހް ވިސްނަމުން ދިޔައެވެ. ރޭގައި ނުނިދާހުރުމުގެ ސަބަބުން ޚުދު އޭނާވެސް އެބަ ނިދިއާދެއެވެ. ޝާނީގެ ގާތުގައި އޮށޯވެސް ނިދާލަންވެސް އޭނާގެ ހިތް އެދުނެވެ. ނަމަވެސް އެފަދަ ވިޔާނުދާކަމެއް އޭނާ ނުކުރާނެއެވެ.

ހަދާނެގޮތަކާމެދު ޖިނާހް ވިސްނަމުން ދިޔައެވެ. ޝާނީއަށް ގޮވަން ހިތަށްއަރާފައިވެސް ޖެހިލުންވަނީއެވެ. ޝާނީ އަމިއްލައަށް ހޭލަންދެން ބާއްވާފައިދާކަށް ވެސް އޭނާއަކަށް ނުކެރޭނެއެވެ. ކުއްލިއަކަށް އޭނާއަށް މޮޅު ޚިޔާލެއް އައެވެ. އޭނާ ދުވެފައި ގޮސް ޝާނީ ގެނައި ބަރޯކައިރިއަށް ހުއްޓުނެވެ. އަދި އޭގައިވާ ތެލިތައްނަގައި ފޫޓަކަށްވުރެ މައްޗަށް ހިއްލާލުމަށްފަހު ބަރޯތެރެއަށް ދޫކޮށްލިއެވެ. ތެލިތައް ބަރޯތެރެއަށް ފައިބައިގެން އަޑުފައްގަނޑާއެކު ސިހިފައި ފުންމައިގެން ޝާނީއަށް ތެދުވެވުނެވެ. ޖިނާހްއަށް އެއަޑު ނީވުމު ނަމަވެސް ޝާނީ ތެދުވި މަންޒަރު ފެނުމާއެކު ޖިނާހް ދުވެގޮސް ހޭޅިތެރެއިން ގަހެއްގެ ބިއްދޮށަށްވަދެ ފިލައިފިއެވެ.

“ ޔާ ރައްބީ…މަށަށް ނިދިފަ އޮންނަތާ ކިހާއިރެއް ވެއްޖެބާ؟….“ ހަލުވި ފިޔަވޅުތަކެއްގައި އެއްގަމަށް އެރި ޝާނީހުރީ ފާޑަކަށް ބިރުގެންފައެވެ. އެއިވުނު އަޑާމެދު ހައިރާންވެގެން ހުރެ، އޭނާ ކޮޅުކޮޅު ހޯދަމުން އައިސް ބަރޯކައިރިއަށް ހުއްޓި ތެލިތަކަށް ބަލާލިއެވެ.

“ މިތެލިތަކާ މީހަކު ކުޅެފަބާ މިހުރީ….ނޫނީ އަމިއްލައަށް ތެލިތައް ވެރުނީތަ؟…“ ޝާނީ އިރުކޮޅަކު ވިސްނަން ހުރުމަށްފަހު ބަރޯގެ އަތްގަނޑުގައި ހިފަމުން ހަލުވިކަމާއެކު ހިނގައިގަތީ ހިތަށްވެރިވި ބިރުވެރި ޚިޔާލަކުންނެވެ. ގޮނޑުދޮށުގައި ނިދުމަކީ ގޯސްކަމެކޭ މަންމަ އަބަދުވެސް ބުނެއެވެ. ޖިންނި ޝައިތޯނުންގެ ގޯނާ ލިބޭނެކަމުގައިވެސް ބުނެއެވެ. އޭނާގެ ތެލިތަކާ ބެހުނީވެސް ޝައިތޯނަކަށް ވެދާނެއޭ އޭނާގެ ހިތަށްއެރިއެވެ. އޭނާ ބިރުގަތްވަރުން އަވަށާއި ހަމައަށް އާދެވެންދެންވެސް އާޔަތުލް ކުރުސީ ކިޔެވެ. ބޮޑުމަގުން ވަކި ހިސާބަކަށް އާދެވުނުއިރު އޭނާގެ މަންމަ އޭނާ ލަސްވެގެން ހޯދަން އަންނަނީއެވެ.

“ މީހަކު ހައިރާނެއްނުވާނެތަ އަޅެ….މިހާރު ގަޑިޔަކުއިރަށްވުރެ ގިނަވީއޭ ޝާނީ ތެލިދޮންނަން ދިޔަފަހުން…މަ މިހާރު ބަނބުކެޔޮ ކޮށާނިމިގެން، އުނދުންވެސް ރޯކޮށްފިން….ޝާނީއަށް އަދި ކިރިޔާތަ ތެލިތައް ތިދޮވެވުނީ؟….ޝާނީއަށް ދަރުކޮށަށް ނޭނގުނަސް، ތެލިދޮންނަން އެނގޭނެކަމަށް މަންމަ ހީކުރީ…“ މަންމަ ހިތްހަމަ ނުޖެހިފައިކަން އެނގުމުން ޝާނީ ބަހެއްވެސް ނުބުނެ އެދިޔަގޮތަށް ތެލިތައް ހިފައިގެން ގޮސް ގިފިއްޔަށް ވަނެވެ. ތެލިތަކުގައި ފެންލައިގެން އައިސް ބަދިގެޔަށް ވަތްއިރު ސަލްމާވެސް ބަދިގެތެރޭގައި އިނެވެ.

“ މަށަށް ހީވަނީ ޝާނީ ތެލިދޮންނަން ގޮސް އިނދެ ނިދީހެން….ބަލާބަލަ މޫނުވެސް ހުރިގޮތް…މުޅި ބޮލުގަވެސް ވެލި…“ ޝާނީއަށް ރަނގަޅަށް ބަލާލަމުން ސަލްމާ ބުންޏެވެ.

“ ދޮންތަ މިހާ ހެނދުނާ މިތާ ކީއްތިކުރަނީ؟…“ ސަލްމާ ބުނި އެއްޗެއް އެނގޭކަމަށްވެސް ނުހަދާ ޝާނީ ބުނެލިއެވެ.

“ ނުފެނޭތަ ކުރާކަމެއް؟…ބަނބުކެޔޮ ކޮށަނީނު…އެހެންނޫނަސް ހެނދުނުވިއްޔާ މަށަށް މިގެޔަށް އާދެވިގެން ނުވޭތަ؟ މަ ބޭނުން ކޮންމެ ގަޑިއަކު މަށަށްވެސް އާދެވޭނެދޯ….މަގޭވެސް ގެވިއްޔަ….“ ރާގުލާފައި ސަލްމާ ބުނެލިގޮތުން ޝާނީއަށް ހެވުނެވެ.

“ ގައިމު މަންމަބުނި މިހާރު ބަނބުކެޔޮ ކޮށާ ނިމިއްޖެއޭ…އަދިވެސް ތިކޮށަނީނު؟“ ކައިރީގައި ހުރި ގޮނޑީގައި އިށީއްނަމުން ޝާނީ ބުނެލިއެވެ.

“ އައްޗީޑި…ދެން މިހުރިހާ ބަނބުކެޔޮތަކަށް ވެލިނާޅާ ނުކުމެ، ތި ވެލިތައް ފޮޅައިގެންއާދޭ….“ ނުރުހުންވެފައި ސަލްމާ ބުނުމުން ޝާނީ ބަދިގެން ނުކުމެ އޭނާގެ ގައިން ވެލިފޮޅަން ފެށިއެވެ.

“ މަށަށް ހަމަ ހީވަނީ މީނަ އެތާއޮވެ ނިދީހެން…ބަލާބަލަ ބޯވެސް ފުރިފަ ވެލި…“ ޝާނީގެ ބޮލަށް އިޝާރާތްކުރަމުން ސަލްމާ ބުންޏެވެ. ސަލްމާއަށް ލޯއަޅައިގެންހުރެ ޝާނީ އޭނާ އިސްތަށިގަނޑުވެސް ނިއުޅާލިއެވެ. ތެދެކެވެ. މުޅިބޮލުގައިވެސް ވެއްޔެވެ. ހަޤީގަތުގައިވެސް އޭނާ ނިދިކަން އެނގިއްޖެނަމަ މަންމަ ވަރަށް ރުޅިއަންނާނެއެވެ. އެހެންކަމުން އޭނާ ދިޔައީ އަވަހަށް ފެންވަރައި ހެދުން ބަދަލުކުރާށެވެ.

ޝާނީ ފެންވަރައިގެން ނުކުތްއިރު، ބަނބުކެޔޮ ތެލުލާވަހުން މުޅި ސަރަހައްދުވަނީ އެއްވަސް ކުރުވާފައެވެ. އޭނާ ބޮލުގައި ތުވާލިއޮޅައިގެން ހުރެގޮސް ބަދިގެޔަށް ބޯކޮށްޕާލިއެވެ.

“ ދީބަލަ އެތިކޮޅެއް….ދެން ނުކުރެވޭނެ އެތިކޮޅެއް ކާނުލައެއް…“ ކުޑަކުއްޖަކު ފަދައިން އަތްދިއްކުރަމުން ޝާނީ ބުނެލިއެވެ.

“ އޭތް މިރޭ ފަތިހު މަށާއެކީ ވަލަށްދާން ޖެހޭއެބަ…އަންނާނަން ޝާނީބަލާ…“ ބަނބުކެޔޮ ކޮޅެއް ޝާނީގެ އަތަށް ލައިދެމުން ސަލްމާ ބުންޏެވެ.

“ ފަތިހުއޭ…އެހާ އަވަހަށް؟…“ ހައިރާންވެފައި ޝާނީ އަހާލިއެވެ.

“ އާނ…ދަރުކޮށާކަށް ނޫނޭ…ފަންހޮވަން….ފަތިސްނަމާދު ބަންގިވެސް ނުގޮވަނީސް ބައެއްމީހުން ވަލަށްދާނެ…މަދަނީ ނަމާދުކޮށްގެން…“ ސަލްމާ އޮޅުން ފިލުވައިދިނެވެ.

“ އެކަމަކު އެހާ އަވަހަށް ގޮސްގެން ކޯއްޗެއް ފެންނާނީ އަނދިރީގަ…“ ޝާނީ ބުނެލިއެވެ.

“ ޓޯޗް ބައްތި ހިފައިގެންނޭ ދަނީ…ޖިނާހް ގެންގުޅޭނެ ވަރަށް އަލިގަދަ ބައްތިއެއް….އެހިފައިގެންދާނީ…ޖިނާހްވެސް ދާނެ އަހަރެމެންނާއެކީ…“ ސަލްމާ އިތުރަށް ބުނެލިއެވެ.

“ އޯހ…އެންމެ ރަނގަޅު ދާނަން…ދޮންތަ އަންނާތި އަހަރެންބަލާ…“ ޝާނީ އެދުނެވެ.

“ ފަހެއްޖަހާއިރު އަންނާނަން….އެންމެ ލަސްވެގެން ފަސްގަޑިބައިގަ ވަލަށް ވަންނަން ޖެހޭނެ…އެހެންނޫނީ އެންމެ ފަނެއްވެސް ނުލިބޭނެ….ވަރަށް އަވަހަށް ފަންގަންނަ މީހުން އަންނަ ޚަބަރު ލިބިފައޮތީ…އެހެންވެ އެންމެންވެސް ހޭވައްޓާލާ އެކަމާ އުޅެނީ….ޝާނީވެސް މިފަހަރު ޖެހޭނެ ފަންގިވިންނަން ދަސްކުރަން….“ ފޯރިޔާއެކު ސަލްމާ ބުނެލިއެވެ.

“ ދޮންތަ ކީއްކުރަން އެވަރަކުން ފަން ވިންނަނީ؟…ރަށުގަހުރި އެންމެ މުއްސަނދި ގޭގަ ވިއްޔަ ތިއުޅެނީ…“ ޖެއްސުން ކޮށްލުމުގެ ގޮތުން ޝާނީ ބުނެލިއެވެ.

“ އަހަރެންގެ އަމިއްލަ މަސައްކަތުން އެއްޗެއް ލިބުނީމަ އެލިބޭ ހިތްހަމަޖެހުން ޝާނީއަށް އެނގޭތަ….ކިތަންމެ މުއްސަނދި ގެއެއްގަ އަހަރެން އުޅުނަސް އަހަރެންގެ މައިންބަފައިންނަކީ ފަޤީރުންކަން އަބަދުވެސް އަހަރެން ހަނދާން ބަހައްޓަން….އަހަރެންނަށް ލިބޭ އެއްޗެއް އެމީހުންނަށް ދެވުނަސް އެވެސް ކިހާބޮޑު ހިތްހަމަ ޖެހުމެއް…ޝާނީއެއްނު ތިހުންނަނީ ނަލަހެދިގެން ހަވީރު ފިންޏަށް ހިނގާލަ ހިނގާލާ….ތިހެން ހުންނައިރު ކަންކަން ދަސްކޮށްބަލަ….ފަހުން ފައިދާކުރާނެ…“  ސަލްމާ ނަސޭހަތުގެ ފަތިވަރެއް އަމުނާލުމުން ޝާނީ ލޯހަނިކޮށްލިއެވެ.

“ ދޮންތައާ މަންމަ ބުނާގޮތުން ވިއްޔާ މަމީ ދެން އެއްވެސް ކަމެއް ނޭނގޭ މީހެއް….ތިއެއްނު ހުރިހާ ކަމެއް އެންމެ މޮޅަށް އެނގޭމީހަކީ…“ ހިތްހަމަ ނުޖެހިފައި ޝާނީ ބުނެލިގޮތުން ސަލްމާއަށް ހެވުނެވެ. ދެކުދިންގެ ވާހަކަ އަޑުއަހަން ބޭރު އަށިމަތީގައި ޑަބިޔާތަކެއް  ފުހެ ސާފުކުރަން އިން އާބިދާގެ ގާތަށްވެސް ހިނިއައެވެ. އެދެކުދިން ބައެއް ފަހަރު ދެބަސްވީ ނަމަވެސް، އެކުދީން އެކަކު އަނެކަކު ދެކެ އިންތިހާއަށް ލޯބިވާކަން ވެސް އޭނާއަށް ޔަގީންވެއެވެ.

“ ހާރިޝް ހޭލަންވާއިރަށް ގެޔަށްވެސް ދާންޖެހޭނެ….ޝާނީވެސް ތި އިސްތަށިގަނޑުން ފެންހިއްޔާ އައްސާ ހަދައިގެން އާދެބަލަ ދޮންތައަށް އަތްގާތް ކޮށްލަދޭން….އޭރުންނެއްނު އަވަސް ވާނީ….“ ތެޔޮތާހަށް ބަނބުކެޔޮ މުށެއް އަޅާލަމުން ސަލްމާ ބުނެލިއެވެ.

ހާރިޝްގެ ނަން އިވުމުން ކުއްލިއަކަށް ކުރީރޭގެ ހާދިސާ ޝާނީއަށް ހަނދާންވިއެވެ. އޭނާ ދޮންތަގާތު އެވާހަކަ ބުނަން ހިތަށްއަރާފައިވެސް ޖެހިލުންވިއެވެ. މިވަގުތު ދޮންތަގެ މޫނުގައިވި އުފާވެރިކަމާއި ހިތްހަމަޖެހުން ފިލާދާކަށް އޭނާ ބޭނުމެއްނުނެވެ. ނަމަވެސް މުނާސަބު ވަގުތަކުން އޭނާ އެވާހަކަ ބުނާނެއެވެ. ދޮންތައަށް ހަޤީޤަތް ހާމަކުރާނެއެވެ.

ނުނިމޭ- ވާހަކަ ކަމުދިޔަ ނަމަ fenvaru.mv ގެ އެފްބީ ޕޭޖަށް ލައިކެއް ދެއްވާ. އަދި ވާހަކަ ޝެއަރ ކޮށްލަދެއްވާ.