ދީނާއި ޤައުމާއި ރަައްޔިތުންނާއި މިނިވަންކަމުގެ ދިފާއުގައި ނުތެދުވާ ބަޔަކު ވަކި ވަކި ފަރުދުންގެ ދިފާއުފައި ތެދުވަންވީ ކީއްވެތޯ ޕީއެންސީގެ ރައީސް އަދި ރައްޔިތުންގެ މަޖިލީހުގެ ލ.ފޮނަދޫ ދާއިރާގެ ކުރީގެ މެމްބަރު ޢަބްދުއްރަޙީމް ޢަބްދުﷲ ސުވާލު އުފައްދަވައިފި އެވެ. ޢަބްދުއްރަޙީމް މިކަމާ ސުވާލު އުފައްދަވައި ވާހަކަފުޅުދައްކަފާއިވަނީ ޕްރޮގްރެސިވް ކޮންގްރެސް ކޯލިޝަނުން، ޕީޕީއެމް އޮފީހުގައި ރޭ ބޭއްވި ޖަގަހަ ޖަލްސާގައި ވާހަކަފުޅުދައްކަވަމުންނެއެވެ.
ރޭގެ ޖަލްސާގައި ވާހަކަފުޅުދައްކަވަމުން ޢަބްދުއްރަހީމް ވިދާޅުވީ ރާއްޖޭގެ އެހެން ސިޔާސީ ޕާޓީއަކުން، ޕީޕީއެމްއަށް ހެޔޮ އެދޭނެކަމަށް ޤަބޫލު ނުކުރައްވާ ކަމުގަ އެވެ. އަދި އެހެން ޕާޓީތަކުން، ޕީޕީއެމްގެ ދިފާއުގައި މަސައްކަތް ކޮށްފާނެ ކަމަށް ދެކެވަޑައިނުގަންނަވާ ކަމަށްވެސް ޢަބްދުއްރަޙީމް ވިދާޅުވި އެވެ.
ސަރުކާރު ކޯލިޝަނުގައި ހިމެނޭ ޖުމްހޫރީ ޕާޓީ(ޖޭޕީ)ގެ ލީޑަރު، ޤާސިމް އިބްރާހީމްގެ އެޑްވައިޒަރ، އިލްހާމް އަޙްމަދަށް ރައްދު ދެއްވައި ވާހަކަފުޅުދައްކަވަމުން ޢަބްދުއްރަޙީމް ވިދާޅުވީ އަޅުގަނޑުމެން މިތިބީ، ޤައުމީ ރޫހުގައި ގައުމީ ފޯރީގައި ކަމުގަ އެވެ. އަދި ޢަޒުމާއި ހިތްވަރުގައިކަމަށްވެސް ވިދާޅުވިއެވެ.
”އަޅުގަނޑު ދަންނަވާލަން ބޭނުންވާ ވާހަކަ އަކީ، ތިޔަ ބޭފުޅުން، ޔަޤީން ކުރައްވާށޭ، ރައީސް ޔާމީނާއި، ރައީސް ޔާމީންގެ ޓީމު، ރޫޅާލެވޭވަރުގެ އިތުރު ބަޔަކު މި ރާއްޖެއަކު ނޫޅޭނެ.“ ރައްޔިތުންގެ މަޖިލީހުގެ ފޮނަދޫ ދާއިރާގެ ކުރީގެ މެމްބަރު ޢަބްދުއްރަހީމް ޢަބްދުﷲވިދާޅުވިއެވެ.
ވަރަށް ޖޯޝުގައި ވާހަކަފުޅުދައްކަވަމުން ޢަބްދުއްރަހީމް ވިދާޅުވީ، ޕީޕީއެމް-ޕީއެންސީ އަކީ އެއްވެސް ބަޔަކަށް ގުޑުވާލެވޭވަރަށްވުރެ މާ ބަދަހި ކޯލިޝަނެއް ކަމަށާއި، އެ ކޯލިޝަނުން ރައީސް ޔާމީނާއެކު ކުރަމުން އަންނަ މަސައްކަތަށް އެއްވެސް ބަދަލެއް ނުގެނެވޭނެ ކަަމުގައެވެ.
މިދިޔަ ޖުލައި މަހުގެ 31 ވަނަ ދުވަހުގެ ރޭ އޮތް ޕީޕީއެމް ޕީއެންސީ ކައުންސިލް ބައްދަލްވުމުގައި ބައިވެރިވި މެންބަރުންގެ އިއްތިފާގުން ވަނީ ކުރިއަށް އޮތް ރިޔާސީ އިންތިޚާބުގައި ވާދަކުރެއްވުމަށް އިިދިކޮޅު ކޯލިޝަންގެ ރިޔާސީ ޓިކެޓް ރައީސް ޔާމީން އަށް އެރުވުމަށް ނިންމަވާފަ އެވެ.
އަންނަ ރިޔާސީ އިންތިޚާބުގައި ޕީޕީއެމް އިން ވާދަ ކުރައްވާނެ ކެންޑިޑޭޓަކީ ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް ކަމަށް، ޕީޕީއެމް އާއި ޕީއެންސީގެ ޖޮއިންޓް ސެނެޓުން ނިންމެވުމަށްފަހު އަންނަ ރިޔާސީ އިންތިޙަބުގެ ޓިކެޓް ވަނީ ރައީސް ޔާމީން އަށް ރަސްމީކޮށް ހަވާލު ކުރައްވާފަ އެވެ.
