ފީފާވޯލްޑް ކަޕް ގުރޫޕް ސްޓޭޖް ފަހުމެޗްގައި ފަހަތުން އަރާ ޕޯޗްގަލް ބަލިކޮށް ހަނިފުރުސަތަކުން ސައުތު ކޮރެއާ މުބާރާތުގެ ދެވަނަ ބުރަށް ދަތުރުކޮށްފިއެވެ.
މރޭގެ މެޗަށް ކޮރެއާ ނިކުތްއިރު ރައުންޑް އޮފް 16 އަށް ދެވެންއޮތް ގޮތަކީ ޕޯޗްގަލް ބަލިކޮށް، އަދި މިގުރޫޕްގައި ދެން ކުޅޭ މެޗުގައި ގާނާގެ މައްޗަށްދެ ގޯލްގެ ތަފާތުން މޮޅުވުމެވެ. އުރުގުއާއީ އެއަށްވުރެ އިތުރަށް ގޯލް ޖެހިނަމަ ކޮރެއާއަށް ޖެހޭނީ މުބާރާތުން އަލްވަދާއު ކިޔާށެވެ.
މިރޭގެ މެޗްގައި ފުރަތަމަ ގޯލެއް ޖަހާ ލީޑް ނެގީ ޕޯޗްގަލް އިންނެވެ. އެއީ މެޗްގެ 5ވަނަ މިނެޓްގައި ރިކާޑޯ ކާމިޔާބުކޮށްދިން ގޯލެކެވެ. އެއަށް ފަހުންވެސް ޕޯޗްގަލަށް ގޯލް ޖަހާނެ ގިނަފުރުސަތުތަކެއް ލިބުނުނަމަވެސް ގޯލެއް ކާމިޔާބުކުރެވޭގޮތް ނުވިއެވެ. ދެ ޓީމުގެ ފަރާތުން ވަރުގަދަ ކުޅުމެއް ފެނިގެންދިޔަ މި މެޗްގައި ކޮރެއާއިން ގޯލެއް ޖަހާ މެޗްގެ ނަތީޖާ 1-1 ށް ބަދަލު ކުރީ މެޗްގެ 27 ވަނަ މިނެޓްގައެވެ. މި ގޯލް ކާމިޔާބުކޮށްދިނީ ކިމް ޔޮންގް ގްވާން އެެވެ.
މެޗްގެ ދެވަނަ ހާފްގައިވެސް ވާދަވެރިކުޅުމެއް ފެނުނު ނަމަވެސް ޕޯޗްގަލްއަށް ގޯލެއް ކާމިޔާބު ނުކުރެވުނެވެ. އަދި ކޮރެއާއަށް މާރަގަޅު ހަމަލާތަކެއް ގޯލަށް ފޮނުވާލެވޭގޮތެއް ނުވިއެވެ. ކޮރެއާ މެޗުން މޮޅުވެ، ދެވަނަ ބުރަށް ދަތުރުކޮށްދިން ގޯލް ޖަހައިދިނީ މެޗްގެ ފުރިހަމަ ވަގުތު ހަމަވެ، ދިން އިތުރު ވަގުތުގައި އެޓީމުގެ ހްވަންގް ހީ ޗަން އެވެ.
މި މޮޅާއިއެކު ކޮރެއާ ދެވަނަ ބުރަށް ދަތުރުކުރީ ގުރޫޕްގެ ދެވަނަ ޓީމްގެ ގޮތުގައެވެ. މި މެޗުން ޕޯޗްގަލް ބަލިވިނަމަވެސް ގުރޫޕްގެ އެއްވަނަ ޓީމްގެ ގޮތުގައި ދެވަނަ ބުރަށް އެޓީމް ވަނީ ދަތުރުކޮށްފައެެވެ. މި ގުރޫޕުން ތިންވަނަގައި އޮތް އުރުގުއާއީ އަށްވެސް ކޮރެއާ އެކޭ އެއްފަދައިން ލިބިފައިވަނީ 4 ޕޮއިންޓް އެވެ. ނަމަވެސް ގޯލްގެ ތަފާތުން ދެވަނަ ލިބުނީ ކޮރެއާއަށެވެ. މި ގުރޫޕުން ފުލުގައި އޮތީ 3 ޕޮއިންޓާއި އެކު ގާނާ އެވެ.
