ޙައްޤަކާ ނުލައި އަންހެނަކު ބަދުނާމުކޮށް ފަޟީޙަތްކުރަން އުޅުނު އަންހެނަކަށް ދިމާވި ހިތާމަވެރި ހާދިސާއަކުން ސަލާމަތްވި ގޮތުގެ ވާހަކައެވެ.
އަޅުގަނޑަކީ އެކަނިވެރި މައަކީމެވެ. ވަޒީފާ އަދާކުރަމެވެ. ލިބޭ މުސާރައިން ދެކޮޅު ޖެހެއެވެ. މާގިނަ ރުފިޔާތަކެއް ބާކީ ނުކުރެވުނު ނަމަވެސް މީހެއްގެ ގާތު ކަމަކު ނުކިޔައި އުޅެލެވޭވަރުވެއެވެ. ވީމާ އަޅުގަނޑު ދެކެނީ އަޅުގަނޑަކީ ތަނަވަސް މީހަކު ކަމަށެވެ.
އަޅުގަނޑު ހުޅުމާލެއިން ފްލެޓެއް ކުއްޔަށް ހިފީމެވެ. ދަރިފުޅު ގޮވައިގެން ދިރިއުޅުނީ އެކަންޏެވެ. މިހެން ބުނި ނަމަވެސް އަނހެން ކޮއްކޮއަކު އެކުގައި ގެންގުޅެމެވެ.
ހަމަ އެ ފްލޯއިން ފިރިހެނަކާއި ބައްދަލުވާންފެށިއެވެ. ބައްދަލުވުން ”އައްސަލާމް ޢަލައިކުމް- އަވަށްޓެރިޔާ!“ އެވެ ބުނެލައެވެ.
އަޅުގަނޑުވެސް ހަމަ އެމޭރުމުން ޖަވާބު ދެމެވެ. ދެދުވަހަކު އެތަން އޭނާގެ އަނބިމީހާއަށްވެސް ފެނުނެވެ. އެއީ އޭނާ ބަަލަން ހުއްޓައި ސަލާމް ގޮވުމުންނެވެ. އެކަމަކަށް އަޅުގަނޑު ސަމާލުކަމެއް ނުދެމެވެ. އަނބިމީހާއަށްވެސް ހިނިތުންވެލަމެވެ.
އެހެނަސް އެކަން އަނބިމީހާއަށްވީ ވަރަށް ބޮޑު ކަމަށެވެ. ލިފްޓުން އަރާއިރު އެކުގައި ތިބެން ޖެހުނަސް އެއްޗެތި ގޮވަން ފަށައިފިއެވެ. މީހުންގެ ފިރިން ނޫނީ އަތު އަޅުވާލަން ނުލިބެނީތޯ ސުވާލުވެސް ކުރެއެވެ. އޭނާ ދައްކާ ވާހަކައަކަށް އަހަރެން ޖަވާބެއް ނުދެމެވެ.
އެއްދުވަހު އޮފީސް ނިމިގެން ގެއަށް އައިއިރު ދޮރުފަތުގައި ކަރުދާސްގަނޑެއްގައި ލިޔެފައި ތަތްކޮށްފައި ހުއްޓެވެ.
”ފްރީ މަސާޖް“! މި ލިއުންކޮޅުވެނިފައި އަހަރެން ހައިރާންވިއެވެ. އަދި މިއީ އަވަށްޓެރިޔާގެ ކަމެއްކަން ވިސްނި ވަރަށް ދެރަވިއެވެ. އެކަމަކުވެސް އަޅައެއް ނުލަމެވެ. ޖެހިގެން އައި މަހު އެހެން ޢިމާރާތަކުން ފްލެޓެއް ހިފައިގެން ބަދަލުވީމެވެ.
އެފްލެޓުގައި އުޅޭތާ 3 މަސްވަރުވީތަނާ އެއްދުވަހަކު ހަވީރު ގެއަށް އައިއިރު އެ އަންހެން މީހާ ދޮރުމަތީގައި ހުއްޓެވެ. ފެންނަ ކަމަށް ނުހަދައި ވަންނަން ފެށުމުން އައިސް ބުންޏެވެ.
”އަހަރެން މިއައީ މާފަށް އެދެންވެގެންނެވެ. ކަލެއާއިމެދު ކުރެވުނީ ނުބައި ތުހުމަތުތަކެކެވެ. ކަންކަން ކުރެވުނީވެސް ވަރަށް ގޯސްކޮށެވެ. އެކަމުގެ ހިތިކަން ފެނިއްޖެއެވެ.“
އަޅުގަނޑު އޭނާއަށް ދަޢުވަތުދީ ފްލެޓަށް ވެއްދީމެވެ. ވެގެން އުޅޭ ގޮތަކާއިމެދު ސުވާލުކުރުމުން ބުންޏެވެ. ”އަހަރެންގެ ހިތުގައި އުފެދުނު ހަސަދައިގެ ސަބަބުން ކޮންޓްރޯލް ނުކުރެވިގެން އެ ލިޔުންކޮޅު ހަރުކުރެވުނުތާ 2 ދުވަސް ނުވަނީސް އަތް އައްސިވާން ފަށައިފިއެވެ. މިހާރު މިއުޅެނީ އަތުން ކަމެއްވެސް ނުކުރެވިގެން ނެވެ. ދެތިން ޑޮކްޓަރުންނަށް ދައްކައިގެންވެސް ފަރުވާއެއް ނުލިބުމުން ރުޤްޔާކުރާ މީހެއްގެ ގާތަށް ގޮސް ކިޔައިދިނީމާ ބުނީ އެއްވެސް މީހަކަށް ނުބައިކޮށް ކަމެއް ކުރެވިފައިވާކަން އެނގޭނަމަ އެމީހެއްގެ ކިބައިން މާފަށް އެދުމަށެވެ. އަހުރެންގެ މުޅި ޢުމުރުގައިވެސް ކަލޭ ނޫން މީހަކަށް އެއްވެސް ނުބައިކަމެއް ނުކުރަމެވެ. އެހެންވެ އަހަރެން މިއައީ މާފަށް އެދޭށެވެ.“
އަޅުގަނޑު ބުނީމެވެ. ”ތިއަ ދެއްކި ވާހަކައަށް ބުނާނެ އެއްޗެއް ނުއެނގެއެވެ. އެކަމަކު އަހުރެންގެ ހިތްސާފެވެ. މާފަށް އެދުނީތީ މާފުވެސް ކޮށްފީމެވެ. މިއަދުން ފެށިގެން ތިއައީ ހަމަ އަހުރެންގެ އުޚުތެކެވެ.“
އެއިގެ ހަފަތާއެއްހައި ދުވަސްފަހުން އަނެއްކާވެސް ޢެނާ އަޅުގަނޑާއި ބައްދަލުކޮށްފައި ބުންޏެވެ. ”ވަރަށް ބޮޑުތަން މިހާރު ރަނގަޅެވެ. އަދިވެސް އުނދަގޫ މުޅިއަކުން ނުފިލައެވެ. “ ޖަވާބުގައި އަހަރެން ބުނީމެވެ. ”އިރާދަކުރެއްވިއްޔާ އެކުގައި ރަނގަޅުވާނެއެވެ.“ އެއިގެ ދުވަސްކޮޅެއްފަހުން ބައްދަލުކޮށްފައި މުޅިން ރަނގަލުވެއްޖެ ކަމަށް ބުންޏެވެ.
މިވާހަކަ ނާހިދު ލިޔާ ވާހަކަތައް ކިޔާ ކިޔުންތެރިންނަށް މިކިޔައިދިނީ އަޅުގަނޑަކީ މާމޮޅު މީހަކަށް ހެދޭކަށް ނޫނެވެ.
އަޅުގަނޑަށް ވަރަށް ނުބައިކޮށް ކަންތައްކުރި އެކުވެރިންވެސް އެބަ އުޅެއެވެ. އެއިން މީހަކަށް އެއްވެސް ކަމެއްވެސްވީކަމެއް ނުއެނގެއެވެ. ނަމަވެސް ބުނެލަން ބޭނުންވަނީ ކަންކަން މެދުވެރިވާނެ ގޮތެއް ނުއެނގޭނެއެވެ. ކިތަންމެ ދެރަ ނިކަމެތި މީހަކަށް ކުރެވޭ ކަމަކުންވެސް ކިތްނަމެ ބޮޑުކަމެއްވެސް ވެދާނެއެވެ. އެހުންނަނީ ނުއެނގޭނެ ކަންކަމެވެ. ވީމާ އެއްވެސް މީހަކަށް ޙަސަދަ ނުލާށެވެ. އެކަން އެނބުރި ތިމާއަށް އަންނާނީ ކޮން ގޮތަކަށްކަން ނުވެސް އެނގޭނެއެވެ.
އެއްވެސް ޙައްޤެއް ނެތި މީހުންނަށް ޙަސަދަލައިގެން އުޅޭ މީހުންނަށް މިވާހަކައިގައި ޢިބްރަތެއްވާކަމަށް ދެކެމެވެ.
ނިމުނީ
