ބޯމަތިވަމުން އަންނަ ރިޔާސީ އިންތިޚާބުގައި ޕްރޮގުރެސިވް ޕާޓީ އޮފް މޯލްޑިވްސް ޕީޕީއެމްގެ ރިޔާސީ ކެނޑިޑޭޓް ރައީސް ޢަބްދުﷲ ޔާމީން ޢަބްދުލް ޤައްޔޫމަށް ވާދަނުކުރެއްވޭ ހާލަތެއްގައި އިދިކޮޅު ޕްރޮގްރެސިވް ކޯލިޝަނުން ވާދަކުރައްވަން ނިންމަވާފައިވާ ޕީއެންސީގެ ރިޔާސީ ކެނޑިޑޭޓް ޑރ.މުޙައްމަދު މުޢިއްޒުގެ ރަނިންގމޭޓަކަށް ރައްޔިތުންގެ މަޖިލީހުގެ ފަރެސްމާތޮޑާ ދާއިރާގެ ޢިއްޒަތްތެރި މެންބަރު ޙުސައިން މުޙައްމަދު ލަތީފް (ސެންބެ) ހަމަޖައްސަވަން ނިންމަވައިފި އެވެ.
ޑރ. މުޙައްމަދު މުޢިއްޒު މިއަދު ކުރެއްވި ޓްވީޓެއްގައި ވިދާޅުވެފައިވަނީ އެމަނިކުފާނުގެ ރަނިންގމޭޓުގެ ގޮތުގައި ބޭފުޅަކު ހަމަޖައްސަވައި، އެޕްލިކޭޝަން ތައްޔާރުކުރުމަކީ އެމަނިކުފާނުގެ ޒިންމާ އެއްކަމުގައި ދެކކިލައްވާ ހިނދު، ރަނިންމޭޓްގެ ގޮތުގައި (ސެންބެ) ހަމަޖައްސަން ނިންމަވާފައިވާފައިވާ ކަމުގަ އެވެ. އަދި ރަނިންގމޭޓްގެ ގޮތުގައި ހަމަޖައްސަވަން ނިންމަވާފައިވާ ބޭފުޅަކީ ޒުވާން، ތަޢުލީމީ، ޤާބިލް ޚިދުމަތްތެރިއެއްކަމަށްވެސް މުޢިއްޒުގެ މެސެގިގައި ވިދާޅުވެފައި ވެއެވެ.
“ މާތް ﷲ ގެ އިރާދަފުޅާ ވާގިފުޅުން ރައީސް ޔާމީނަށް މިއަހަރު އޮންނަ ރިޔާސީ އިންތިޚާބުގައި ވާދަކުރެވޭނެ. ރައީސް ޔާމީނަށް ވާދަކުރުމުގެ ފުރުސަތު ނުދީފިނަމަ، އެ މަނިކުފާނު ދެއްވާފައިވާ އިރުޝާދާއެކު، ވާދަކުރާނޭ ”ބެކްއަޕް“ ކެނޑިޑޭޓެއްގެ ގޮތުގައި ޕީ.އެން.ސީ ގެ ކެނޑިޑޭޓެއް ހޮވުމަށް ޕީ.އެން.ސީ ސެނެޓުގައި ބޭއްވުނު އިންތިޚާބުގައި އަޅުގަނޑު ހޮވުމުން، އަޅުގަނޑުގެ ރަނިންގމޭޓުގެ ގޮތުގައި ބޭފުޅަކު ހަމަޖައްސާ، އެޕްލިކޭޝަން ތައްޔާރުކުރުމަކީ އަޅުގަނޑުގެ ޒިންމާއެއްކަމުގައި ދެކޭ ހިނދު، އަޅުގަނޑުގެ ރަނިންގމޭޓްގެ ގޮތުގައި ފަރެސްމާތޮޑާ ދާއިރާގެ ޢިއްޒަތްތެރި މެންބަރު ޙުސައިން މުޙައްމަދު ލަޠީފް (ސެންބެ) ހަމަޖައްސަން ނިންމިކަން ދަންނަވަން. އެމަނިކުފާނަކީ، ޒުވާން، ތަޢުލީމީ، ޤާބިލް ޚިދްމަތްތެރިއެއް.
އަޅުގަނޑުގެ ދުޢާއަކީ، 7 އޯގަސްޓުގެ ވަގުތު ހަމަވުމުގެ ކުރިން، އަޅުގަނޑުމެންގެ ކެނޑިޑޭޓް ރައީސް ޔާމީން އަށް ވާދަކުރުމުގެ ފުރުސަތު ލިބިގެން ދިޔުން. އަދި މި ތައްޔާރުކުރެވޭ ”ބެކްއަޕް“ އެޕްލިކޭޝަން ލާންނުޖެހުން.“
ޕްރޮގުރެސިވް ކޯލިޝަންގައި ހިމެނޭ ޕީއެންސީގެ ފަރާތުން ރިޔާސީ އިންތިޚާބުގައި ވާދަކުރާނެ ކެނޑިޑޭޓެއް ހޮވުމަށް އެ ޕާޓީގެ ސެނެޓްގައި ނެގި ވޯޓް ޑރ. މުޙައްމަދު މުޢިއްޒު ކާމިޔާބު ކުރައްވާފައިވަނީ ކުރީގެ ޑިފެންސް މިނިސްޓަރ އަދި ރައްޔިތުންގެ މަޖިލީހުގެ ރ. އަތޮޅު މަޑުއްވަރީ ދާއިރާގެ ޢިއްޒަތްތެރި މެމްބަރު އާދަމް ޝަރީފް ޢުމަރު އާއި ވާދަކުރަށްވައި 2 ވޯޓްގެ ތަފާތަކުން ކާމިޔާބު ކުރައްވައިގެނެވެ.
ޕީއެންސީ ސެނެޓުގައި 48 މެމްބަރުންގެ މެދުގައި ނެގިވޯޓުން ޑރ މުއިއްޒުއަށް ލިބިވަޑައިގެންނެވީ 25 ވޯޓް އެވެ. އަދި އާދަމް ޝަރީފް އަށް ލިބިވަޑައިގަތީ 23 ވޯޓެވެ.
މިއަހަރުގެ ރިޔާސީ އިންތިޚާބަށް ކުރިމަތިލުމުގެ މުއްދަތު އަންނަ ހޯމަ ދުވަހުގެ މެންދުރު ފަހު 2:00އަށް ހަމަވާނެއެވެ.
އަންނަ ރިޔާސީ އިންތިޚާބުގެ ވޯޓް ލުން އޮންނާނީ އަންނަ ސެޕްޓެމްބަރ މަހުގެ 09 ވަނަ ދުވަހު އެވެ.
