ރިވެތި އަޚްލާޤުން ޒީނަތްތެރިވެ، ފުރިހަމަ އިސްލާމީ ތަރުބިއްޔަތެއް ލިބިފައިވާ ޒުވާނުންތަކެއް ބިނާކުރުމަށް މަސައްކަތް ފެށުން މާ ރަނގަޅުވެފަ ފައިދާ ބޮޑުވާނެ! އެފަދަ ޒުވާނަކު އަބަދާއި އަބަދުމެ އޭނާ ހެއްދެވިފަރާތަށް ބިރުވެތިވެ ހުރިހާ ނުބައިކަމަކުން ދުރުހެލިވާނެ، އަމާނާތްތެރިވާނެ!
ރިވެތި ގޮތުގައި ﷲ އަށް އަޅުކަންކުރުމުގައި ޤާއިމުވެ ހުންނާނެ! ﷲ އާއި އެކަލާނގެ ރަސޫލާއަށް އުރެދުމެއްނުވާ ކޮންމެ ކަމަކަށް ކިޔަމަންތެރިވާނެ! ވަގުތަށް ކަމޭހިތާނެ! މަސައްކަތައް ފަރުވާތެރިވާނެ! މަސްތުވާ ތަކެއްޗާއި އެހެންވެސް ފާޙިޝް ކަންތައްތަކާއި ދުރުހެލިވާނެ!
ވައްކަމެއް ނުކުރާނެ! މީހުންގެ މުދާ ފޭރި މާރާމާރީއެއް ނުހިންގާނެ! މަކާރާއި ޙީލަތް ހަދައި އޮޅުވައެއް ނުލާނެ! ދޮގެއް ނުހަދާނެ! މީހުންނަށް އުނދަގޫކޮށް މަގުމައްޗަށް ގިނަވެގެންނެއް ނޫޅޭނެ! އެހެންމީހުންނަށް އަޅާލައި އޯގާތެރިވާނެ! އެފަދަ ޒުވާނަކު ހުރިހާކަމެއްވެސް ކުރާނީ ﷲ ތަޢާލާ އޭނާއަށް އަބަދުވެސް ބައްލަވާވޮޑިގެންވާކަން ދަނެ އެކަލާނގެ ރުހިވޮޑިގަތުން ހޯދުމުގެ ނިޔަތުގަ! މިދުނިޔޭގައި ދާއިމަށް ނުހުރެވޭނެކަން ދަނެ އާޚިރަތް ވެސް ބާއްޖަވެރި ކުރުމުގެ މަޤުސަދުގަ!
މި ސިފަތަކުން ޒީނަތްތެރިވެފައިވާ ޖީލެއް ބިނާ ކުރެވިއްޖެނަމަ މުޖުތަމަޢުގައި މިވާ އިޖުތިމާޢީ އެތައް މައްސަލަތަކެއް ނެތިގެން ދާނެ! މިއީނޫންތޯ ޤައުމަށް ބޭނުންވާ ޒުވާނުންގެ ކިބައިގައި ހުންނަންވީ ސިފަތަކަކީ! ޒުވާނުން އެމީހުން ހިތްރުހޭހާ ކަމެއް ކުރަން ދޫކޮށްލީމަ މި ޤައުމުގެ މުސްތަޤުބަލު ބަނަވެގެން ދާނެވަރު ވިސްނާލުން ކީއްތޯ؟
މިވެނި އެވެނި ކަމަކީ އަހަރެމެންގެ ދިރިއުޅުމާއި ގުޅިފައިވާ އަދި އެކަންކަމުން އަހަރެމެން ދުރުވެގެންފިނަމަ އަހަރެމެން ނިކަމެތިވާނޭ އަދި އެކަންކަމަކީ އެއާނުލައި ދިރިއުޅެން އުނދަގޫވެފައިވާ ކަންކަމޭ ބުނެ ދުނިޔޭގެ އެންމެން އެކަންކަން ކުރިކަމުގައިވިޔަސް ޙަރާމްކަމެއް ވާނީ ޙަރާމްކަމަކަށް! ގޯސްކަމެއްވާނީ ގޯސްކަމަކަށް!
ފާޙިޝްކަންކަމަށް މަގުފަހިވާ ކަންކަން ވާނީ ފާޙިޝް ކަންކަމަށް މަގުފަހިވާ ކަންކަމަށް! އެކަންކަން ހުއްދަކުރެވޭނެ އެއްވެސް މީހަކު މި ދުނިޔެމައްޗަކު ނުވޭ! އެއީ އިންސާނުންނަށް ލިބިގެންވާ ޙައްޤެއް ނޫން! ކުރުކޮށް ދަންނަވާނަމަ ދަންނަވަން އޮތީ އެއްވެސް ކަމަކީ ﷲ އާއި ރަސޫލާ ރުހިވޮޑިނުގަންނަވާ ކަމެއްނަމަ އެކަމެއް އަހަރެމެންނަކަށް ނުކުރެވޭނޭ!
އެކަން ކުރާބަޔަކަށް އަދި އެކަންކަން ހުއްދަކޮށް ޢާއްމުކޮށް ފަތުރާ ބަޔަކަށް އެބަޔަކު ތައުބާ ނުވާހާ ހިނދަކު އެކަމަށް ކަނޑައެޅިފައިވާ ޙައްޤު އަދަބު އެބަޔަކަށް ލިބޭނެ! އެފަދަ ކަންކަން ފަތުރާ އާއްމުކޮށްގެން މި ދުނިޔެއިން އަދި އެދުނިޔެއިންވެސް ލިބޭނެ އެއްވެސް މޮޅެއް ނޯންނާނެ!
އިޖުތިމާޢީ ބޮޑެތި މައްސަލަތަކެއްގެ ތެރެއަށް މުޖުތަމަޢު ވެއްޓިގެންދިޔުން ނޫން ކަމެއް ނުވާނެ! އެއީ ﷲ އާއި ރަސޫލާ ރުހިވޮޑިނުގަންނަވާ ކަމަކުން ދާއިމީ ރަނގަޅު އެއްވެސް ނަތީޖާއެއް ނުނިކުންނާނެތީ!
ޒުވާނުންނަށް ކަމެއް ކޮށްދޭނަމަ ރިވެތި އަޚްލާޤާއި ފުރިހަމަ އިސްލާމީ ތަރުބިއްޔަތެއް އެމީހުންނަށް ހޯދައިދެވޭނެ ކަންތައްތަކެއް ރާވާ ޒުވާންޖީލަށް ގެދޮރުވެރިކަމާއި ވަޒީފާގެ ފަހި ފުރުޞަތުތައް ލިބޭނެ މަގުތައް ފަހިކޮށްދީ ޙަލާލު އަމިއްލަ ވިޔަފާރިތަކަށް އިންވެސްޓް ކުރެވޭނެ މަގުތައް ކޮށައިދިނުން މާ ރަނގަޅުވާނެ!
އެފަދަ ޒުވާނުން ބިނާ ކުރުމަށް ކުރެވޭ އިންވެސްޓަކީ ދެދުނިޔޭގެ ބާއްޖަވެރިކަން ލިބިގަތުމަށް ކުރެވޭނެ އެންމެ ރަނގަޅު އެއް އިންވެސްޓް!
