ސިޔާސީ މަސައްކަތް ތި ކުރައްވަނީ އިޚްލާޞްތެރިކަމާއި ތެދު ނިޔަތާއިއެކު ރައްޔިތުންނަށް ހެޔޮއެދިގެން ކަމަށް ވާނަމަ ރައްޔިތުންނަށް ލާބަޔާ މަންފާ ހުރި އެއްވެސް ކަމަކަށް ހުރަސް ނާޅުއްވާ! އެއީ ތިބޭފުޅުންނާއި އެއްފިކުރެއްގެ ތެރެއިން ނުވަތަ އިދިކޮޅޮ ފިކުރެއްގެ ތެރެއިން އަންނަ ކަމެއް ކަމުގައިވިޔަސް މެއެވެ.
އެވަގުތަކު ވެރިކަމުގައި ތިބިބަޔަކު ރައްޔިތުންގެ ލޯތްބާއި ތާއިދު ލިބޭފަދަ ކަމެއް އަދި އެކަމަކީ ރައްޔިތުންނަށްވެސް ނުހަނު ބޭނުންތެރި ކަމަކަށް ވާހިނދު އެކަމެއް ކުރަން އުޅުމުން އަނެއްކޮޅުގައި ތިބި ބަޔަކު އެކަންކަމަށް ހުރަސް އަޅައި އެކަން ވިޔަ ނުދިނުމަށް ކުރެވެން ހުރި ހުރިހާކަމެއް ކުރަން އުޅުމަކީ ރައްޔިތުން ދެކެ ލޯބިވުންތޯ؟ ނޫންނަމަ ރައްޔިތުންނަށް ހެޔޮއެދިގެން ކަންކަން ކޮށްދޭން އުޅުންތޯ؟
ނޫން! އެއީ ލޯބިވުމެއްނޫން! އަދި ރައްޔިތަކަށް ރަނގަޅު ގޮތެއްވާން އެދުމެއްވެސް ނޫން! އެއީ އަމިއްލަ އެދުންވެރިކަމާއި ބޮޑެތި މަޤާމުތަކަށް އެދުންވެރިވެފައިވާ މިންވަރު! ރައްޔިތުންނަށް ހެޔޮ އެދިގެން ސިޔާސީ ކަންކަމުގައި އުޅޭމީހާ އަބަދުވެސް އެންމެ އިސްކަންދޭނީ މާތްވެގެންވާ އިސްލާމްދީނަށް! އެއީ އެދީނުގައި އިންސާނުންގެ އެންމެހާ ކަންކަން އެންމެ ފުރިހަމައަށް ބަޔާންކޮށްފައި ވަތީ!
އަދި އެމީހެއްގެ އަމިއްލަ މަސްލަޙަތައްވުރެއް މުޅިރައްޔިތުންގެ މަސްލަޙަތަށް، ސިޔާސީ ފިކުރާއި ޕާޓީގެ މަސްލަޙަތައްވުރެވެސް ރައްޔިތުންގެ މަސްލަޙަތަށް އަދި އޭނާގެ އަމިއްލަ އެދުންތަކަށްވުރެ ބޮޑަށް ރައްޔިތުންގެ ބޭނުންތައް ފުއްދައި ދިނުމަށާއި ރައްޔިތުންނަށް ލާބަޔާ މަންފާ ކުރާ ކޮންމެ ކަމެއް ކޮންމެ ބަޔަކު ކުރިކަމުގައިވިޔަސް އެކަމަކީ އިސްލާމްދީނުގައި ހުއްދަކަމެއް ކަމުގައިވަނީނަމަ އެފަދަ މީހަކު އެކަންކަމަށް މަރުޙަބާ ކިޔާނެ!
ރައްޔިތަކަށް ކަމައް ކޮށްދޭން ޖެހޭހިނދު އޭނާއަކީ ކޮން ކުލައެއްގެ ކޮންފިކުރެއްގެ މީހެއްތޯ އެފަދަ މީހުން ނުބަލާނެ! ފިތުނަފަސާދައަށް ޖާގަދީ މަކަރުވެރި ރޭވުންތައް ރާވާ ރައްޔިތުން ޤުރުބާންކޮށް ސިޔާސީ މަންފާ ހޯދާކަށް ނޫޅޭނެ! މިވާހަކަ މިގޮތަށް ދައްކާލަން މި ޖެހުނީ ”އެއީ ސިޔާސީ ކަންކަމޭ، އެކަންކަން ހުންނާނީ އެގޮތަށޭ، އެކަހަލަ ކަންތަކާ ނުބެހޭށެ“ ބުނާ އަޑުތައް ގަދަވެ، ”ސިޔާސީ“ މި ބަސް ބޭނުންކޮށްގެން ކޮންމެފަދަ ކަމެއްވެސް ކުރުމަކީ ”އޯކޭ“ ކަމަކަށް ވާތަން މި މުޖުތަމަޢުން ފެންނަމުން ދާތީ!
އަހަރެންމީ އާދައިގެ ދިވެހި ރައްޔިތަކީމު! މުސްލިމް ދިވެހި ރައްޔިތެއްގެ ޙައިސިއްޔަތުން ސިޔާސީ މީހުންނަށް ދަންނަވާލަން! ސިޔާސީ މަޤާމުތަކެއް ލިބި ސިޔާސީ މީހެއްގެ ގޮތުގައި ލޭބަލްވުމަކީ ތިބޭފުޅުން ބޭނުންހާ ވާހަކައެއް ދައްކާ ބޭނުންހާ ކަމެއްކުރަން ލިބޭ ލައިސަންސެއް ނޫން! މިހެން މިދަންނަވާލީ އަހަރެމެން މީއީ އިންތަކަކާއި މިންތަކެއްގެ ތެރޭ ތިބެންޖެހޭ މުސްލިމުންކަން ބައެއް ބޭފުޅުން މިއަދު ހަނދާން ނެތެމުން ދާތީ! އެ ދީނުގެ މަތިވެރި އަސާސްތަކާއި އުޞޫލުތައް ކަމުނުގޮސް އަމިއްލަ ގޮތްތައް އިސްކޮށް އެގޮތްތައް ޕްރޮމޯޓު ކުރަން އުޅޭތަން ފެންނަމުން ދާތީ!
ސިޔާސީ ކަންކަމާހެދި ރަޙިމުގެ ގުޅުންފަދަ މަތް ގުޅުންތައް ކެޑި މުޖުތަމަޢު ފަސާދަވެ ތަރައްޤީއާ ތަހުޒީބަށް އެޅިގެންދާ ހުރަހަކަށްވެސް އެކަންތައްތައް ވަމުން ދާތީ! ސިޔާސީ ބަރުވެރިވެރިކަމުގެ ނާޖާއިޒް ފައިދާނަންގަވައިގެން ސިއްރާއި ފާޅުގައި މުންކަރާތްތަކަށް ގޮވާލަމުން ދާތީ! ފާޙިޝް ކަންތައްތަކަށް މަގުފަހިވާ ފަދަ އެތައް ކަމެއް ހުއްދަކޮށްގަތުމަށް ފާޅުކަންބޮޑު ގޮތެއްގައި މަސައްކަތް ކުރަމުން ދާތީ! މިއީ ތިބޭފުޅުންގެ ކިބައިން އަހަރެމެން ދެކެން ބޭނުންވި ކަންތައްތަކެއް ނޫން!
ރައްޔިތުންގެ ބައިތުލްމާލުން ބޮޑުހޭދައެއް ތިބޭފުޅުންނަށް ކުރައްވާއިރު ތިބޭފުޅުންނަކީ މުސްލިމުންކަން ދަނެ މާތް ﷲ އަށް ބިރުވެތިވެ ތަޤުވާވެރިވެ އިސްލާމްދީނަށާއި އެދީނުގެ އެންމެހާ ޙުކުމްފުޅުތަކަށް ބޯލަނބައި އެދީނަށް ނަޞްރުދީ އަމިއްލަ ނަފްސަށާއި އަނެކުންގެ ޙައްޤުތަކަށް އަމާނާތްތެރިވެ އަމިއްލަ އެދުންތަކުން އެއްކިބަވެ ތިބެ ތިބޭފުޅުންގެ ކޮނޑުގައި އެޅިފައިވާ މައްސޫލިއްޔަތު ތެދުވެރިކަމާއި އަމާނަތްތެރިކަމާއެކު އޭގެއެންމެ ފުރިހަމަ ގޮތުގައި އަދާކުރުމަށް ނަޞޭޙަތްތެރިވަން!
