ސިފަހުތުރު ޞަހާބީ- ފުރަތަމަބައި
ރަސޫލާ ޞައްލަﷲ ޢަލައިހި ވަސައްލަމަގެ ސަޙާބީބޭކަލުންގެ ތެރޭގައި ހަސަބާއި ނަސަބުގެ ގޮތުން މާތް ބޭކަލުންނާއި ފަޤީރު ދެރަ ނިކަމެތި ބޭކަލުންވެސް ތިއްބެވިއެވެ. އެގޮތުން ބައެއްބޭކަލުންގެ މަތިވެރިކަމާ މާތްކަމުގެ ސަބަބުން އެބޭކަލުންގެ ނަންތައްވަނީ އިސްލާމީ ތާރީޚްގެ ފަތްފުށްތަކުގައި ލިޔެވިގެން ގޮސްފައެވެ.
މީގެ ތެރެއިން ބައެއްބޭކަލުންނަކީ އެބޭކަލުންގެ ވަރުގަދަ ޝަހުސިއްޔަތު ސަބަބުން ފާހަގަ ކުރެވޭ ބޭކަލުންނަށްވާއިރު އަނެއްބައިބޭކަލުންނަކީ އެބޭކަލކުންގެ ފަޤީރުކަމާއި ނިކަމެތިކަމާއި އެކުވެސް ނަބިއްޔާ ސައްލަﷲ އަލައިހި ވަސައްލަމްގެ ލޯތްބާއި އިޙުތިރާމް އިންތިހާ ދަރަޖައަށް ހޯދާފައިވާ ބޭކަލުންނެވެ.
އެއީ އެބޭކަލުންގެ މަޑުމައިތރިކަމާއި މާތްކަމާއި ތެދުވެރިކަމާއި ވިސްނުންތޫނުކަމުގެ ސަބަބުންނެވެ. އިސްލާމްދީނާއި ނަބިއްޔާއަށްޓަކައި ވެވަޑައިގެންނެވި ބޮޑެތި ޤުރުބާނީއާ ދެއްވި މަތިވެރި އަހަމިއްޔަތުކަމުގެ ސަބަބުންނެވެ.
ޖުލޭބިބްއަކީ ރަސޫލާ ޞައްލަﷲ ޢަލައިހި ވަސައްލަމަ އިންތިހާ ދަރަޖައަށް ލޯބިފުޅުވި ޞަހާބީއެކެވެ. ނަމަވެސް ޖުލޭބިބް އަކީ ކުރިން މިދަންނަވާލި އިސްލާމީ ތާރީޚްގެ ތެރޭގައި މަތިވެރިކަމާއި މާތްކަމަށް ނަންގަނެވެފައިވާ ޞަހާބީންގެ ތެރޭގައިވާ ބޭކަލެއްނޫނެވެ.
ސަބަބަކީ އެކަލޭގެފާނަކީ ޔަތީމު، ފަޤީރު އަދި ސިފަ ހުތުރު ބޭކަލަކަށް ވާތީއެވެ. އެކަލޭގެފާނަކީ ހަސަބާއި ނަސަބުގެ ގޮތުން ދެރަ ބޭކަލެކެވެ. މުޖުތަމައުގެ ތެރޭގައި އެކަލޭގެފާނު ކަނޑައަޅާފައިވަނީ އެއްވެސް ގިންތިއަކަށް ނިސްބަތްނުވާ ވަރަށް ދަށު ދަރަޖައިގެ ބޭކަލެއްގެ ގޮތުގައެވެ.
އެކަލޭގެފާނުގެ ސިފަބަޔާން ކުރައްވާފައިވަނީ ވަރަށް ކުރު، ބެލުމަށް ހުތުރު މީހެއްގެ ގޮތުގައެވެ. ސަހާބީބޭކަލުން ވިދާޅުވެފައިވާގޮތުގައި ޖުލޭބިބް އަކީ ސިފަ ހުތުރު ބޭކަލެކެވެ. އެކަލޭގެފާނަށް ބައްލަވާ މީހުން އެކަލޭގެފާނުގެ ސިފަ ހުތުރު ކަމުން އަނެއްފަރާތަށް މޫނު އަބުރައިލައްވައެވެ.
އެގޮތުން ސިފަހުތުރުކަމާއި ނިކަމެތިކަމުގެ ސަބަބުން މުޖުތަމައުންވަނީ އިހާނެތިގޮތުގައި އެކަލޭގެފާނު އެކަހެރިކުރެއްވާފައެވެ. އެހެނީ އޭރުގައި ޤަދަރާއި އިއްޒަތް ދެވެނީ އެމީހެއްގެ ހަށިގަނޑާއި ބުރުސޫރައަށް ބެލުމަށްފަހުގައެވެ.
ޖުލޭބިބް އުފަންވީއްސުރެ އޭނާގެ ސިފަހުތުރުކަމުގެ ސަބަބުން މީސްތަކުންގެ މަލާމާތާއި ފުރައްސާރައާއި ކުރިމަތިވަމުން ދިޔައެވެ. ހަސަބާއި ނަސަބުގެ ގޮތުން ދެރަ ބޭކަލަކަށްވެފައި ސިފަހުތުރުކަމުގެ ސަބަބުން މީސްތަކުން އެކަލޭގެފާނު އެކަހެރިކޮށް ބާކީކުރަމުންދިޔައވެ. ހުތުރު މީހާގެ ނަމުން މުޚާތަބު ކުރެވެމުން ދިޔައެވެ. މިކަމުގެ ސަބަބުން އެކަލޭގެފާނުވަނީ ދިރުއުޅުމާމެދު ނާއުންމީދުވެފައެވެ. ލޯތްބާއި އިޙްތިރާމަކީ އެކަލޭގެފާނަށް ދުވަހަކުވެސް ލިބޭނޭ އެއްޗެއްތޯ ސުވާލު އުފައްދަމުން ދިޔައެވެ.
މިސުވާލުތަކަށް ޖަވާބުލިބެގެން ދިޔައީ އެކަލޭގެފާނު އިސްލާމްދީން ޤަބޫލު ކުރެއްވި ހިސާބުންނެވެ. އެހިސާބުން ފެށިގެންއެކަލޭގެފާނުގެ ދިރިއުޅުން ބަދަލުވެގެން ދިޔައެވެ. އެކަލޭގެފާނަކީ ﷲގެ މަގަށް ތަބާވެގެން ހުންނެވިޞާލިހް އަޅަކަށްވިއެވެ. އަދި ރަސޫލާ ޞައްލަﷲ ޢަލައިހި ވަސައްލަމައަށް ޙިދުމަތްކުރައްވާ އެކަލޭގެފާނުގެ ގާތް ޞަހާބީއަކަށް ވެވަޑައިގަތެވެ.
އެކަލޭގެފާނުގެ ތެދުވެރިކަމާއި، ވަރުގަދަ އަޤީދާއާއި ދީންދެކެވާ ލޯތްބެއްގެ ސަބަބުން ރަސޫލާ ޞައްލަﷲ ޢަލައިހި ވަސައްލަމަ އެކަލޭގެފާނުދެކެ ލޯބިފުޅުވެ އިހްތިރާމްކުރެއްވިއެވެ. އެހެންކަމުން ޖުލޭބިބް ލޯތްބާއި، އިހްތިރާމް ލިބުމަށް ދެކެމުން އައި ދިގުހުވަފެން ހަޤީގަތްކަށްވެގެންދިޔައެވެ. އެގޮތުން ރަސޫލާ ޞައްލަﷲ ޢަލައިހި ވަސައްލަމަ ޖުލޭބިބް އަށް ވަރަށް އޯގާތެރިކަމާއި އަޅާލުމާއެކު ކަންތައްތައް ކޮށްދެއްވާ އެކަލޭގެފާނުގެ ބޭނުންފުޅުތަކަށް ފަރުވާތެރިވެ ސަމާލުކަންދެއްވައެވެ.
އިމާމްއަހުމަދު ޞަހީހް މުސްލިމުގައި ރިވާކުރައްވާފައިވާ ހަދީޘްއެއްގައިވެއެވެ. އެއްދުވަހަކު ރަސޫލާ ޞައްލަﷲ ޢަލައިހި ވަސައްލަމައަށް ޖުލޭބިބް ފެނިވަޑައިގަތެވެ. އޭރު ޖުލޭބިބްވަނީ އުމުރުންދުވަސްވެފައެވެ. ރަސޫލާ ޞައްލަﷲ ޢަލައިހި ވަސައްލަމަ ޖުލޭބިބް އާއި ސުވާލުފުޅު ކުރެއްވިއެވެ. ”އޭ ޖުލޭބިބް އެވެ! ކަލޭގެފާނުގެ ޙާލުކޮޅުކިހިނެއްތޯއެވެ.“ އެހިނދު ޖުލޭބީބް ދެންނެވިއެވެ.
”ޔާ ރަސޫލައްﷲ އެވެ! ކަލޭގެފާނަށް ހީފުޅުވާގޮތެއް ވިދާޅުވެބައްލަވާށެވެ. އަޅުގަނޑަށް ހަމައެކަނި ލިބޭނެ އަންހެނަކީ ސުވަރުގެއިން ހޫރުލް އީން އެއްހެއްޔެވެ؟“ ފަހެ ރަސޫލާ ޞައްލަﷲ ޢަލައިހި ވަސައްލަމައަށް ޖުލޭބިބް ބުނަންއުޅޭވާހަކަ ވިސްނިވަޑައިގަތެވެ. އެއީ ޖުލޭބިބް އަށް މިދުނިޔެމަތީގައި އިންނާނެ މީހަކުނުވެ މަރުވުމުގެ ބިރެވެ. އަދި ސުވަރުގެއިން ޙޫރުލް އީން އަކާބައްދަލުވުމުގެ އުއްމީދެވެ.
އެހިނދު ރަސޫލާ ޞައްލަﷲ ޢަލައިހި ވަސައްލަމަ ޖުލޭބިބް އަށް ހަދީޘް ކުރެއްވިއެވެ. “ ނޫނެކެވެ. އިންޝާ ﷲ ! ތިބާއަށް މިދުނިޔޭން އިންނާނެމިހަކާއި އަދި އާޙިރަތުގައި ސުވަރުގެއިން ހޫރުލް އީން އެއް ލިބިވަޑައިގަންނަވާނެއެވެ.“ ދެންއެއަށްފަހު ހަދީޘްކުރެއްވިއެވެ. “ އޭ ޖުލޭބީބް އެވެ. މިވެނި މިވެނި އަންސާރުބޭކަލެއްގެ ގެއަކަށް ދާށެވެ. އަދި އޭނާގެ ގާތުގައި އޭނާގެ އަންހެންދަރިއަކު ހުރިތޯ އައްސަވާށެވެ.“
ދެންފަހެ ޖުލޭބިބް ރަސޫލާ ސައްލަﷲ އަލައިހި ވަސައްލަމަ އެންގެވިގޮތައް އެމީހާގެ ގެއަށް ދިޔައެވެ. ނަމަވެސް އެމީހާ އެކަލޭގެފާނު ޤަބޫލުފުޅު ނުކުރެއްވިއެވެ. މޫނުފުޅު އަނބުރާލެއްވިއެވެ. އެހެންކަމުން ޖެހިގެން އައި ދުވަހު ރަސޫލާ ޞައްލަﷲ ޢަލައިހި ވަސައްލަމަ އެ އަންޞާރީގެ ގެއަށް ވަޑައިގަތެވެ. އަދި ޙަދީޘް ކުރެއްވިއެވެ.
”ތިމަންކަލޭގެފާނު ތިބާގެ އަރިހަށް މިވަޑައިގަތީ ތިބާގެ ދަރިކަނބަލުންގެ ކައިވެންޏަށް އެދިވަޑައިގަތުމަށެވެ.“ އެވަގުތު އެބޭކަލަކު ދެންނެވިއެވެ. ”ﷲއަކްބަރު ،ޔާ ރަސޫލުﷲ އެވެ. ކޮންފަދަ އުފާވެރި ހަބަރެއްތޯއެވެ. އެކަމުގެ ސަބަބުން ތިމަންގެ ހިތް އުފަލުން ފުރިއްޖެއެވެ.“ އެހިނދު ރަސޫލާ ޞައްލަﷲ ޢަލައިހި ވަސައްލަމަ އަނެއްކާވެސް ހަދީޘް ކުރެއްވިއެވެ. ”ތިމަންކަލޭގެފާނު މިއެދިވަޑައިގަންނަވަނީ ކަލޭގެފާނުގެ ދަރިކަނބަލުން ތިމަންކަލޭގެފާނާއި ކައިވެނިފުޅު ބައްލަވައިގަންނަވާކަށް ނޫނެވެ.“ އެހެންކަމުން އެބޭކަލަކު ދެންނެވިއެވެ.
ދެންއެހެންވީރު ކާކާތޯއެވެ؟ ޖަވާބުގައި ރަސޫލުﷲ ގެފާނު ހަދީޘްކުރެއްވިއެވެ. ”އެއީ ތިމަންކަލޭގެފާނުގެ އަޚް ޖުލައިބީބް އެވެ.“ ފަހެ އެކަލޭގެފާނު މިހެން ހަދީޘްފުޅުކުރެއްވުމުން އެމީހާގެ މޫނުމަތީގައި ހުރި އުފައުވެރިކަމުގެ ކުލަވަރު ވަގުތުން ބަދަލުވެގެން ދިޔައެވެ. މޫނުމަތިން ނުރުހުންތެރިކަން ފާޅުވެގެން ދިޔައެވެ. އަދި ދެންނެވިއެވެ. ”ޔާ ރަސޫލުﷲ އެވެ. އަޅުގަނޑު އަނބިކަނބަލުންނާއި މަޝަވަރާ ކޮށްލެއްވުމަށްފަހު ޖަވާބެއް ދެއްވާނަމެވެ.“
ދެންފަހެ މިއަންޞާރު ބޭކަލުން އެކަލޭގެފާނުގެ އަނބިކަނބަލުންގެ އަރިހަށް ގޮސް ދެންނެވިއެވެ. ”އޭ އަނބިކަމަނާއެވެ. ރަސޫލާ ޞައްލަﷲ ޢަލައިހި ވަސައްލަމަ އަހަރެމެންގެ ދަރިކަނބަލުންގެ ކައިވެންޏަށް އެދި ހުށައަޅުއްވައިފިއެވެ.“ ފަހެ އެއަންހެންމީހާ އުފަލާއެކު ބުންޏެވެ. ”ﷲއަކްބަރެވެ. ކޮންފަދަ ބޮޑު ޝަރަފެއްތޯއެވެ.
ތިޚަބަރުގެ ސަބަބުން އަހުރެންގެ ލޮލަށާއި ހިތައް ފިނިކަންގެނުވާފިއެވެ.“ އެހިނދު ފިރިކަލުން ދެންނެވިއެވެ. ”އެކަލޭގެފާނު އެދިވަޑައިގަތީ އެކަލޭގެފާނާއި ކައިވެނިފުޅު ބައްލަވައިގަންނަވާކަށް ނޫނެވެ.“ އަނބިކަމަނާ އެއްސެވިއެވެ. ”އެހެންވީރު ކާކާތޯއެވެ؟“ ފިރިކަލުން ޖަވާބުގައި ދެންނެވިއެވެ. ”އެކަލޭގެފާނު އެދިވަޑައިގަތީ ތިމަންމެންގެ ދަރިކަނބަލުން ޖުލައިބީބް އާ ކައިވެނިކޮށްދެއްވުމަށެވެ.“
އެހިނދު އެކަލޭގެފާނުގެ އަނބިކަނބަލުން އެކަމަށް އިންކާރުކުރަންފެށިއެވެ. އަދި ބުންޏެވެ.“ ސުބްހާނައްﷲއެވެ. ޖުލައިބީބްއަށް ވުރެ މާފުރިހަމަ އެތައް މީހުންނެއް ތިމަންމެންގެ ދަރިކަނބަލުންގެ ކައިވެންޏަށް އެދުނު އިރު ޤަބޫލު ނުކުރީމެވެ. އެތައް މަތިވެރި އާއިލާތަކުން ކައިވެންޏަށް އެދި ހުށައެޅުމުންވެސް އެކަން ބަލައިނުގަނެ މުޖުތަމައުގަ ހުރި އެންމެ އެންމެ ދަށްފެންވަރުގެ، ހުތުރުމީހާއަށް އަހަރުމެންގެދަރި ދޭންވީހެއްޔެވެ؟ ނޫނެކެވެ. ތިޔަކަމެއް ނުވާނެއެވެ.“
އެހިނދު އެދެމަފިރިކަނބަލުން ދެއްކެވިވާހަކަ އަޑުއިވޭ ފަށުގައި ދަރިކަނބަލުން ހުންނެވިއެވެ. އަދި ކައިރިޔަށް ޖެހިވަޑައިގެން ދެންނެވިއެވެ. ”އޭ މަންމާ، ބައްޕާއެވެ. އަހަންނަށް މި އަޑުއިވެނީ ކޮންވާހަކަތަކެއްތޯ؟ ރަސޫލާ ޞައްލަﷲ ޢަލައިހި ވަސައްލަމަ އެހެންމީހަކަށްޓަކައި، އަހަރެންގެ ކައިވެންޏަށް އެދިވަޑައިގަންނަވާ ހިނދު މަންމައާއި ބައްޕަ އެކަލޭގެފާނުގެ ހުށަހެޅުއްވުމަކަށް ނޫނެކޭ ބުނަނީހެއްޔެވެ؟
އަހަރެން ﷲ ގަންދީ ހުވާކޮށްފައިބުނަމެވެ. އަހަރެން ރަސޫލާ ޞައްލަﷲ ޢަލައިހި ވަސައްލަމަ ގެ ހުށަހެޅުއްވުމަކަށް ނޫނެކޭ ނުބުނާނަމެވެ. އަހަރެން ހަމައެކަނި ކައިވެނިކުރާނެ މީހަކީ ޖުލައިބީބް އެވެ. ހަމަކަށަވަރުން ރަސޫލުއްﷲ ގެފާނުގެ ހުށަހެޅުއްވުމެއް ޤަބޫލުކުރައްވައިގެން އަހަނަށް ލިބޭނެ ދެރައެއް ނޯންނާއެވެ.“
ނުނިމޭ
