ސިފަހުތުރު ޞަހާބީ- ދެވަނަބައި

ސިފަހުތުރު ޞަހާބީ- ދެވަނަބައި

ސުބްހާނައްﷲއެވެ. ޖުލައިބީބްއަށް ވުރެ މާފުރިހަމަ އެތައް މީހުންނެއް ތިމަންމެންގެ ދަރިކަނބަލުންގެ ކައިވެންޏަށް އެދުނު އިރު ޤަބޫލު ނުކުރީމެވެ. އެތައް މަތިވެރި އާއިލާތަކުން ކައިވެންޏަށް އެދި ހުށައެޅުމުންވެސް އެކަން ބަލައިނުގަނެ މުޖުތަމައުގަ ހުރި އެންމެ އެންމެ ދަށްފެންވަރުގެ، ހުތުރުމީހާއަށް އަހަރުމެންގެދަރި ދޭންވީހެއްޔެވެ؟ ނޫނެކެވެ. ތިޔަކަމެއް ނުވާނެއެވެ.“

އެހިނދު އެދެމަފިރިކަނބަލުން ދެއްކެވިވާހަކަ އަޑުއިވޭ ފަށުގައި ދަރިކަނބަލުން ހުންނެވިއެވެ. އަދި ކައިރިޔަށް ޖެހިވަޑައިގެން ދެންނެވިއެވެ. ”އޭ މަންމާ، ބައްޕާއެވެ. އަހަންނަށް މި އަޑުއިވެނީ ކޮންވާހަކަތަކެއްތޯ؟ ރަސޫލާ ޞައްލަﷲ ޢަލައިހި ވަސައްލަމަ އެހެންމީހަކަށްޓަކައި،

އަހަރެންގެ ކައިވެންޏަށް އެދިވަޑައިގަންނަވާ ހިނދު މަންމައާއި ބައްޕަ އެކަލޭގެފާނުގެ ހުށަހެޅުއްވުމަކަށް ނޫނެކޭ ބުނަނީހެއްޔެވެ؟ އަހަރެން ﷲ ގަންދީ ހުވާކޮށްފައިބުނަމެވެ. އަހަރެން ރަސޫލާ ޞައްލަﷲ ޢަލައިހި ވަސައްލަމަ ގެ ހުށަހެޅުއްވުމަކަށް ނޫނެކޭ ނުބުނާނަމެވެ. އަހަރެން ހަމައެކަނި ކައިވެނިކުރާނެ މީހަކީ ޖުލައިބީބް އެވެ. ހަމަކަށަވަރުން ރަސޫލުއްﷲ ގެފާނުގެ ހުށަހެޅުއްވުމެއް ޤަބޫލުކުރައްވައިގެން އަހަނަށް ލިބޭނެ ދެރައެއް ނޯންނާއެވެ.“

ފަހެ ދަރިކަނބަލުންގެ މިވާހަކަތައް އަޑުއެއްސެވުމަށްފަހު މޮޅިވެރިކަމާއި އެކު އެކަނބުލޭގެ މަންމަ ބުންޏެވެ. ”ދަރިފުޅާއެވެ. އިތުރަށް ދެންނުބުނާށެވެ. ތިބަސްތަކުން ފުދިއްޖެއެވެ. މަންމައަށް މިކުރެވުނީ ކޮންފަދަ ބޮޑުފާފައެއްތޯއެވެ. ހާސްފަހަރު މަންމަ މިކަމުން ﷲގެ ހަޒުރަތުގައި ތަޢުބާވަމެވެ. މިވަގުތުން ފެށިގެން ދަރިފުޅު ކައިވެނިކޮށްދެއްވުމަށް ޖުލައިބީބް ނޫން މީހަކު މަންމަ ނޭދެމެވެ.“

ދެންފަހެ މިކަމުގެ ޚަބަރު ޖުލައިބީބްގެފާނަށް ލިބުމުން އެކަލޭގެފާނު ނުހަނު އުފާފުޅުކުރެއްވިއެވެ. އަދި ރަސޫލާ ޞައްލަﷲ ޢަލައިހި ވަސައްލަމަ އެކަލޭގެފާނުގެ ސަހާބީންގެ އަރިހުން ޖުލައިބީބް ގެ ކައިވެންޏަށްޓަކައި އެކަލޭގެފާނަށް އެހީތެރިކަން ފޯރުކޮށްދެއްވުމަށް އެދިވަޑއިގަތެވެ.

އެގޮތުން އުޘްމާން ބިން ޢައްފާން އާއި އަލީ ބިން އަބީ ތާލިބް ޖުލައިބީބްގެފާނުގެ ކައިވެނީގެ ވަލީމާ ހަމަޖެއްސެވުމަށާއި، އުޅޭނެތަނެއް ހޯދުމަށްޓަކައި އެކަލޭގެފާނަށް ފައިސާ ހަދިޔާކުރެއްވިއެވެ. އެއަށްފަހު މާތް ނަބިއްޔާ ސައްލަﷲ އަލައިހި ވަސައްލަމް ޖުލައިބީބްއާއި އަންސާރުގެފާނުގެ ހަނދެއްފަދަ ރީތި ދަރިކަނބަލުންނާއި ކައިވެނި ކޮށްދެއްވިއެވެ.

ދުވަސްތައް ފާއިތުވެގެންދިޔައެވެ. މިގޮތުގެމަތީން އިސްލާމް ދީނަށްޓަކައި ކުރެވުނު ހަނގުރާމަތަކުގެ ތެރެއިން ހަނގުރާމައަކާ ކުރިމަތިލާންޖެހުނެވެ. މިހަނގަރާމައަށް ނިކުން ބޭކަލުންގެ ތެރޭގައި ޖުލައިބީބްވެސް ހުންނެވިއެވެ. އަދި ރަސޫލާ ޞައްލަﷲ ޢަލައިހި ވަސައްލަމަވެސް އެމައިދާނުގައި ހުންނެވިއެވެ. ހަނގުރާމަ ނިމެގެންދިޔައީ މުސްލިމުންނަށް ފަތަހައާއި ކާމިޔާބީ ލިބިގެންނެވެ.

މިހަނގުރާމައިގައިވެސް އެތައް މާތް ސަހާބީންނެއް ދުނިޔެދޫކުރެއްވިއެވެ. އަދި އެހެންނެކޭވެސް އެއްފަދައިން ހަނގުރާމަ ނިމުމުން ރަސޫލާ ޞައްލަﷲ ޢަލައިހި ވަސައްލަމަ ހަނގުރާމައިގެ މައިދާންގެ އުޅުއްވި ސަހާބީންގެ ހާލުކޮޅު ބައަލަވަން ނިކުމެވަޑައިގަތެވެ. އެހިނދު ހަނގުރާމައަގެ މައިދާނުގައި މީސްތަކުން އެމީހުންގެ ބޮޑުބެއިންނާއި، ބޭބެއިންނާއި ދަރީން ހޯދަމުންގެންދިޔައެވެ.

ނަމަވެސް ރަސޫލާ ޞައްލަﷲ ޢަލައިހި ވަސައްލަމަ ހަމައެކަނި އައްސަވަމުން ގެންދެވީ އެއްމެ ސުވާލެކެވެ. އެއީ “ ތިމަންކަލޭގެފާނުގެ ޖުލައިބީބް ކޮބާހެއްޔެވެ؟“ ދެން އެންމެހާބޭކަލުން ޖަވާބުގައި ދަންނަވައެވެ. ތިމަންބޭކަލުންނަކަށް އެނގިވަޑައި ނުގަނެއެވެ. އެކަލޭގެފާނަކީ ޔަތީމްބޭކަލަކަށްވެފައި އާއިލާގެ މީހަކުވެސް ނެތްކަމުން އެކަލޭގެފާނަށް ވީގޮތެއް ބައްލަވާނެ އެއްވެސް މީހަކު ނެތެވެ.

ރަސޫލާ ޞައްލަﷲ ޢަލައިހި ވަސައްލަމަ ފިޔަވައެވެ. އަދި މީސްތަކުން ރަސޫލުއްﷲގެފާނުގެ އަރިހުގައި އެބައިމީހުންގެ އާއިލާގެ މެންބަރުން ފެނިވަޑައިގަތްތޯ ސުވާލު ކުރައްވަމުންގެންދަވައެވެ. އެހެން ނަމަވެސް އެކަލޭގެފާނު ނޫނެކޭ ވިދާޅުވުމަށްފަހު، އަނެއްކާވެސް ޖުލައިބީބްގެފާނު ވީތަނަކާމެދު ސުވާލު ކުރައްވައެވެ. އަދި މީސްތަކުން އެބައިމީހުންނަށް އެކަލޭގެފާނު ވީތަނެއް އެނގިވަޑައި ނުގަންނަވާކަމަށް ބުނަމުންގެންދެއެވެ.

ދެންފަހެ ރަސޫލުއްﷲގެފާނު ހަނގުރާމައިގެ މައިދާނުގައި ގަތުލުވެފައިވާ މީސްތަކުންގެ ތެރެއަށް ނުކުމެވަޑައިގެން ޖުލައިބީބުގެފާނު ފެނިވަޑައިގަންނަވާތޯ ހޯއްދަވަމުން ގެނދެވިއެވެ. މިގޮތުގެ މަތީން ހޯއްދަވަމުން ގެންދަވަނިކޮށް އެކަލޭގެފާނަށް ފެނިވަޑައިގަތީ ޖުލައިބީބްގެފާނު ޝަހީދުވެވަޑައިގެންފައި ވަނިކޮށެވެ. އޭރު ޖުލައިބީބްގެފާނުގެ ހަށިކޮޅު ވަށައިގެން މަރުވެފައިވާ ދުޝްމިނުންގެ ހަތްމީހުން ވެއެވެ.

މިމަންޒަރު ފެނުމުން ރަސޫލާ ޞައްލަﷲ ޢަލައިހި ވަސައްލަމަ ޖުލައިބީބްގެފާނުގެ ހަށިކޮޅަށް މޮޅިވެރިކަމާއި އެކު ބައްލަވަން ހުންނެވިއެވެ. އެހިނދު އެކަލޭގެފާނުގެ ލޯފުޅު ކަރުނުން ފުރިގެންދިޔައެވެ. އަދި ހަދީޘް ކުރެއްވިއެވެ. “ ޖުލައިބީބްގެފާނު އިސްލާމްދީނުގެ ދުޝްމިނުންގެ ތެރެއިން 7 މީހުން ޤަތުލު ކުރެއްވިއެވެ. އަދި އެއަށްފަހު އެކަލޭގަފާނުވަނީ ޝަހީދުވެފައެވެ.“

އަދިވެސް ހަދީޘްކުރެއްވިއެވެ. ”ޖުލައިބީބްގެފާނުވަނީ ތިމަންކަލޭގެފާނުގެ އާއިލާގެ ފާރާތްޕުޅުންނެވެ. އަދި ތިމަންކަލޭގެފާނުވަނީ ޖުލައިބީބްގެފާނުގެ އާއިލާގެ ފަރާތްޕުޅުންނެވެ.“ މިހެން ތިންފަހަރު ހަދީޘްކުރެއްވުމަށްފަހު ރަސޫލާ ޞައްލަﷲ ޢަލައިހި ވަސައްލަމަ އެކަލޭގެފާނުގެ އަތްދަނޑި ކޮޅުގެމަތީގައި ޖުލައިބީބް އުފުއްލަވައިގެން ގެންދެވިއެވެ. އޭރު އެކަލޭގެފާނު ކީރިތި ކުރައްވަމުންގެންދެވިއެވެ. ދެން ކުއްލިއަކަށް އެކަލޭގެފާނުގެ ކީރިތިކުރެއްވުން ހިނުތުންވުމަކަށް ބަދަލުވިއެވެ. އަދި ހިނިތުންވުމާއިއެކު އެކަލޭގެފާނު މޫނުފުޅު އެހެންދިމާއަކަށް އަނބުރާލެއްވިއެވެ.

އެއަށްފަހު ރަސޫލާ ސައްލަﷲ އަލައިހި ވަސައްލަމް އެކަލޭގެފާނުގެ ބަރަކާތްތެރި އަތްޕުޅުން ޖުލައިބީބްގެ ހަށިކޮޅު ފަސްދާނުލެއްވިއެވެ. އެހިނދު ސަހާބީން އެކަލޭގެފާނުގެ އަރިހަށް ވަޑައިގެން ސުވާލުދެންނެވިއެވެ. ”ޔާ ރަސޫލުﷲ ޞައްލަﷲއެވެ. ކަލޭގެފާނު ކީރިތިފުޅު ކުރެއްވީ ކޮންކަމަކާތޯއެވެ.؟ އެއަށްފަހު ހިނިތުންވެވަޑައިގެން މޫނުފުޅު އަނބުރައިލެއްވީ ކޮންކަމަކާތޯއެވެ؟“ އެހިނދު ރަސޫލާ ޞައްލަﷲ ޢަލައިހި ވަސައްލަމަ ހަދީޘްފުޅު ކުރެއްވިއެވެ.

”ތިމަންކަލޭގެފާނު ކީރިތިކުރައަވަމުން ގެންދެވީ ތިމަންކަލޭގެފާނުގެ އާއިލާގެ ލޮބުވެތި އަޙާ ޖުލައިބީބް މިދުނިޔެއާ ވަކިވެވަޑައިގަތުމުންނެވެ. އެހެނީ ތިމަންކަލޭގެފާނު ފިޔަވައި ޖުލައިބީބްއަށް އަޅާލައި އޯގާތެރިވާމީހަކު ނުވެއެވެ. ދެން ﷲ ތިމަންކަލޭގެފާނަށް ސުވަރުގެއިން ޖުލައިބީބަށްޓަކައިވާ މަޤާމު ދައްކަވާލެއްވިއެވެ. އަދި ތިމަންކަލޭގެފާނު އެކަލޭގެފާނުގެ ފުރާނަފުޅު ޖަންނަތުގައި ވީތަން ދެކިވަޑައިގަތީމެވެ. އަދި އެކަލޭގެފާނަށްޓަކައި ސުވަރުގޭގައިވާ އަނބިއަބިކަނބަލުންގެތެރެއިން ޙޫރުލްޢީނަކު އެކަލޭގެފާނާ ދިމާއަށް ދުވެވަޑައިގެން އަންނަވަނިކޮށް ތިމަންކަލޭގެފާނަށް ފެނިވަޑައިގަތެވެ.

އެހެންކަމުން ޖުލައިބީބު އެދިވަޑައިގަތްފަދައިން ސުވަރުގެއިން އެކަލޭގެފާނަށް އަނބިކަނބަލެއްގެ ގޮތުގައި ހޫރުލްޢީނަކު ލިބިވަޑައިގަތުމުން ތިމަންކަލޭގެފާނަށް ހިނިވަރުނަ ކުރެވުނީއެވެ. ފަހެ ތިމަންކަލޭގެފާނުގެ މޫނުފުޅު އަނެއްފަރާތަށް އަނބުރާލެއްވީ، ޖުލައިބީބް ގެ އަނބިކަނބަލުން (ޙޫރުލް އީން) ދުވެވަޑައިގެން އެކަލޭގެފާނުގެ އަރިހަށް ވަޑައިގަތް އިރު އެކަމަނާގެ ފައިގެ އުޑުވާންކޮޅުން ތަންކޮޅެން ކަޝްފުވުމުންނެވެ. އެހެނީ ތިމަންކަލޭގެފާނަކަށް ޖުލައިބީބްގެ އަނބިކަނބަލުންނާ ދިމާއަށް ބެލުމުގެ ހައްޤެއްލިބެގެންނުވެއެވެ.

ވާހަކައިގެ އިބުރަތް: ވިސްނާ ފިކުރުކޮށްފިމީހަކަށް އެކަލޭގެފާނުގެ މިވާހަކައިން އެތައްފިލާވަޅުތަކެއް ލިއްބައިދެއެވެ. އެގޮތުން ޙާޞިލްވި އެއްމެބޮޑު އެއް ފިލާވަޅަކީ އަހަރުމެން އިންސާނުން އެކަކު އަނެކަކުގެ ސިފައަށާއި ނިކަމެތިކަމަށާއި، ހަސަބާއި ނަސަބަށްބަލައި މީހުންގެ އަބުރާއި އިއްޒަތައް ޤަދަރުނުކޮށް އެމީޙުން މުޖުތަމައުން ބޭކާރުކޮށްލާކަމެވެ.

ނަމަވެސް އަހަރުމެން ވިސްނަންޖެހޭ ކަމަކީ މުޖުތަމައުގައި މީސްތަކުން ބަލައިގަންނަންވީ އެމީހުންގެ ހަސަބާއި ނަސަބާއި ބުރުސޫރަ އަށްބެލުމަށްފަހުގައި ނޫންކަމެވެ. އޭގެބަދަލުގައި އެމީހެއްގެ ދީންވެރިކަމާއި، ހެޔޮއަމަލުތަކާއި އަދި ރިވެތި އަޚުލާޤު ގެ މައްޗަށްކަމެވެ. ވިސްނަންޖެހޭކަމަކީ އަހަރުމެން އެއްވެސް އިންސާނަކު އަނެއްއިންސާނެއްގެ މައްޗަށް މަތިވެރިވެގެން ނުވާނެކަމެވެ.

އާހިރަތުގައި ކޮންމެ އިންސާނަކުވެސް ހިސާބުކުރެވޭނީ އެމީހަކު ކުރިހެޔޮއަމަލަކުންނެވެ. އެހެންކަމުން ހުރިހާބޭފުޅުންވެސް މިކަމާމެދު ވިސްނައި މުޖުތަމައުގައި ހަމަހަމަކަމާއެކު އެންމެންނަށްވެސް އިހުތިރާމާއި ލޯބި ދިނުމަށް ސަމާލުވުމާހެއްޔެވެ؟

ނޯޓް:- މިވާހަކައަކީ އަޅުގަނޑު އިސްލާމް ސްޓޯރީ ޑޮޓްކޮމް އިންނާއި ސުންނަތް އޮންލައިން ޑޮޓްކޮމް އިން މަޢުލޫމާތު ނަގައި ތަރުޖަމާކޮށް އެކުލަވާލާފައިވާ ވާހަކައެކެވެ. އިތުރު މަޢުލޫމާތު ނަގާފައިވަނީ ޝެއިޚް ބިލާލް އައްސަދުގެ ދަރުސަކުންނެވެ.

ނިމުނީ