މާޅޮސްމަޑުލު ދެކުނުބުރި ދަރަވަންދޫ އެއާޕޯޓުގެ ޓާމިނަލް އިތުރަށް ތަރައްޤީކުރުމުގެ ޑިޒައިން އަދި ކޮންސަލްޓެންސީގެ މަސައްކަތް ކުރުމަށް އަމިއްލަ ކުންފުންޏެއްކަމަށްވާ އީޕޯޗް އެސޯސިއޭޓްސް ޕްރައިވެޓް ލިމިޓެޑާ ހަވާލުކޮށް މި މަސައްކަތާ ގުޅޭ އެއްބަސްވުމުގައި ސޮއިކުރުމުގެ ރަސްމިއްޔާތު ބާއްވައިފިއެވެ.
މި އެއްބަސްވުމުގައި އެ އެއާޕޯޓް ހިންގަމުން އަންނަ ކުންފުނި އައިލެންޑް އޭވިއޭޝަން (އައިއޭއެސް) ގެ ފަރާތުން ސޮއިކުރެއްވީ މެނޭޖިން ޑިރެކްޓަރު އިބްރާހީމް އިޔާސް އެވެ. އަދި އީޕޯޗް އެސޯސިއޭޓްސްގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު މުޢާވިޔަތު އަބްދުއްސައްތާރެވެ.
އައިލެންޑް އޭވިއޭޝަންގެ ޑެޕިއުޓީ މެނޭޖިން ޑިރެކްޓަރ އަލީ ސަލީމް ވިދާޅުވީ، މި އެއާޕޯޓުގެ ޑިޒައިންގެ މަސައްކަތް އީޕޯޗްއާ ހަވާލުކޮށްފައިވަނީ 45 ދުވަހުގެ ތެރޭގައި ނިންމާ ގޮތަށް ކަމަށާއި، ޑިޒައިން އެންޑް ކޮންސެޕްޓްގެ މަސައްކަތް ނިމުމާއެކު އެއާޕޯޓު ތަރައްޤީކުރުމުގެ އަމަލީ މަސައްކަތް ފެށިގެންދާނެކަމަށް އޭނާ ވިދާޅުވިއެވެ.
ދަރަވަންދޫ އެއާޕޯޓްގެ ޓާމިނަލް އިތުރަށް ތަރައްގީ ކުރުމުގެ މަސައްކަތުގެ ދަށުން، އެރައިވަލް ހޯލް މިހާރަ ށްވުރެ ބޮޑުކޮށް ޗެކިން އަދި އެރައިވަލް ބެލްޓްތައް އިތުރުކުރާނެއެވެ. އަދި ޑިޕާޗާ ހޯލުގައި ކެފޭ ޖާގައެއް އިތުރު ކުރުމާއި ޑިޕާޗަ ގޭޓް އިތުރު ކުރުމަށް ވެސް ހިމަނާފައިވެއެވެ.
އިޔާސް ވިދާޅުވި ގޮތުގައި، އެއާޕޯޓު ތަރައްޤީކުރުމުގެ މަސައްކަތުގެ ދަށުން، އެރައިވަލް ހޯލް މިހާރަށްވުރެ ބޮޑު ކުރުމާއި، ޗެކިން އަދި އެރައިވަލް ބެލްޓް އިތުރުކުރެވޭނެއެވެ. އަދި ޑިޕާޗަރ ހޯލުގައި ކެފޭ ޖާގައެއް އިތުރު ކުރުމާއި ޑިޕާޗަރ ގޭޓް އިތުރު ކުރުމަށްވެސް މަޝްރޫޢުގައި ހިމަނާފައިވެއެވެ. މި މަޝްރޫޢުގެ ދަށުން މިހާރު ހުރި ޓަރމިނަލަށް ބޮޑު ބަދަލެއް ގެނެވޭނެކަމަށާއި، ޖުމްލަ އިމާރާތް ކުރާ ޖާގައަކީ 814 އަކަމީޓަރު ކަމަށްވެސް އިޔާސް ވިދާޅުވިއެވެ.
ދަރަވަންދޫ އެއާޕޯޓު ތަރައްޤީ ކުރުމުގެ މަސައްކަތަކީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރިޔާސީ އިންތިޚާބުގެ ތެރޭގައި ވެވަޑައިގެންފައިވާ ވަޢުދުފުޅެކެވެ.
ދަރަވަންދޫ އެއާޕޯޓްގެ މަސައްކަތް އައިލޭންޑް އެވިއޭޝަނާއި ހަވާލުކުރަން ނިންމާފައިވާކަން އެމަނިކުފާނު ހާމަކުރެއްވީ މިދިޔަ އޯގަސްޓް މަހު ދަރަވަންދޫއަށް ވަޑައިގެން އެރަށު ރައްޔިތުންނާއި ބައްދަލުކުރައްވާ ދެއްކެވި ވާހަކަފުޅުގަ އެވެ. ދަރަވަންދޫ އެއާޕޯޓަކީ އެއަތޮޅުގެ ފަތުރުވެރިކަމަށް ގުޅި ލާމެހިފައިވާ އެއާޕޯޓެއްކަން އެ އަތޮޅުގެ ރައްޔިތުން ފާހަގަކުރެއެވެ.
މި އެއާޕޯޓު ހިދުމަތްދޭން ފެށިތާ މިހާރު 14 އަހަރު ވެފައިވާއިރު، ރިސޯޓުތަކާއި ލޯކަލް ޓޫރިޒަމް ފުޅާވުމާއެކު އެއާޕޯޓު ބޭނުންކުރާ މީހުންގެ އަދަދު ދަނީ އިތުރުވަމުންނެވެ.
ދަރަވަންދޫ އެއާޕޯޓަކީ 2012 ގައި އޮޕަރޭޝަނަށް ގެނެސްފައިވާ ބ.އަތޮޅޫގެ އުންމީދީ އެއާޕޯޓެކެވެ.
