އެންމެފަހުން ލޯފަންކުދިން ބަލަހައްޓާ ތަނެއްގައި އެކުގައި ހުއްޓާ އެއަންހެންމީހާއަށް އެކުއްޖާ ފެނިއްޖެއެވެ.
އެކުއްޖާ ހަމަ ފެނުމާއެކު އެ އަންހެންމީހާގޮސް އޭނާގެ ގައިގާ އޮޅުލައިގަނެ ރޮއިގެންފާ ބުންޏެވެ. ”ދަރިފުޅާއެވެ. އަހަރެންނަށް މަޢާފްކުރާށެވެ.“ އެކުއްޖާ ބުންޏެވެ. ”ތިޔައީ ކާކުހެއްޔެވެ؟“ އަންހެންމީހާ ބުންޏެވެ. ”މިއީ އަހަރެންނެވެ.“ ”ތިޔައީ ހަމަ ތިބާ ހެއްޔެވެ؟“ އެ އަންހެން މީހާގެ ނަންބުނުމުން އެކުއްޖާއަށް ވަގުތުން އޭނާ އެނގުނެވެ. އަދި ހަމަ އެ ހިނދު އެކުއްޖާއަށް އެ އަންހެންމީހާގެ ފަރާތުން ލިބުނު އަނިޔާތަކާއި އުނދަގޫތަކުގެ ހަނދާން އާވެގެންދިޔައެވެ.
އޭނާއަށް ކަރަންޓު ދެވުނު ޝޮކްތަކުގެ މަތިން އޭނާ ހަނދާންވިއެވެ. ބަދިގޭގެ ފިނި މުށިގަނޑުމަތީގައި ނިންދެވި ހަނދާން އާވެގެންދިޔައެވެ. ގިނަދުވަސްވެ ހަލާކުވެ ކުނިވެފައިވާ ކާނާ ކާން މަޖުބޫރުކުރުވި ހަނދާން އާލާވެގެންދިޔައެވެ. އެ އަންހެންމީހާގެ ފަރާތުން އޭނާއަށް ކުރިމަތިވީ ހުރިހާ ތުރާތަކެއްގެ ހަނދާން އެކުއްޖާއަށް އާވެގެން ދިޔައެވެ. އަދި އެދުވަސްތަކުގައި އޭނާގެ ހަޔާތުގައި ހިނގާދިޔަ ހުރިހާ ހިތާމަތަކެއް އާލާވެގެން ދިޔައެވެ.
އޭނާގެ ބޭބެ ނިޔާވުމާއި މަންމަގެ ވަކިވެދިޔުމުގެ ހަނދާންތައް އާލާވެގެންދިޔައެވެ. އަދި އޭނާގެ ބައްޕަ ބީރައްޓެހި ބައެއްގެ ތެރެއަށް މަދު ފައިސާކޮޅެއްގެ ދަހިވެތިކަމުގައި އޭނާ ދޫކޮށްލާފައި ދިޔަހަނދާން އާލާވެގެންދިޔައެވެ. އޭނާގެ މުޅި ހަޔާތް އަދި މުޅި މުސްތަޤްބަލް ގެއްލިގެންދިޔަ ދުވަސްތަކުގެ ހަނދާން އޭނާގެ ހިތުގައި އާލާވެގެން ދިޔައެވެ. އަދި މިހުރިހާ ހިތްދަތިކަމެއްގެ ތެރެއިން އޭނާގެ ލޮލުގެ ފެނުން ގެއްލުނުހިނދު އޭނާ އެގެއިން ނެރެ އެއްލާލި ދެމަފިރިންގެ ހަނދާން އާލާ ލޮލުން ހޯސްލާފައި ކަރުނަ ފައިބައިގެން ދިޔައެވެ.
އެންމެފަހުން އެ އަންހެންމީހާ އެކުއްޖާއަށް ބުންޏެވެ. ”ދަރިފުޅާއެވެ. އަހަރެންނަށް މަޢާފްކުރާށެވެ“. އޭ އަޚުންނޭވެ! އޭ އުޚްތުންނޭވެ! ނިކަން ބައްލަވާށެވެ. މި ހުރިހާ އަނިޔާއާއި ނާއިންސާފަށްފަހުވެސް އެ އުޚްތާ އޭނާގެ ހިތުގައިވާ ނަފްރަތުގެ މައްޗަށް ބާރުފޯރުވިއެވެ. ކޮންފަދަ މަޑުމޮޅި ހިތެއްގެ ވެރިއެއްތޯއެވެ. އެނާ ޖާވާބުދިނެވެ. ”އަހަރެން ތިބާއަށް މަޢާފްކޮށްފީމެވެ.“
އެ އަންހެންމީހާ އެކުއްޖާ އޭނާއާއިއެކު ގެންދިޔައެވެ. އަދި އޭނާގެ ފަރާތުން އެނިކަމެތި ކުއްޖާއަށް ލިބުނު އަނިޔާގެ ބަދަލުދިނުމަށް ބޭނުންވިއެވެ. އެހެންކަމުން އެ އަންހެންކުއްޖާ ފަދައިން ލޯފަންވެފައިވާ އޭނާގެ މާމަ ކުދިންނާއިއެކު އެކުއްޖާވެސް ގެންގުޅުނެވެ. އެއީ އޭގެ ބަދަލެއްގެގޮތުގައި އޭނާގެ ފާފަ މާތްﷲ ގެ ހަޟްރަތުން ފުއްސަވައިދެއްވާތޯއެވެ.
އަބޫ ހުރައިރާގެ އަރިހުން ރިވާވެގެންވާ ހަދީޘްފުޅެއްގެ މާނައިގައިވެއެވެ. ރަސޫލުﷲ (صلى الله عليه وسلم) ހަދީޘްފުޅުކުރެއްވިއެވެ. ”މީހަކަށް އޭނާގެ އަނެއް އަޚާގެ އަބުރަށް ނުވަތަ އެނޫންވެސް ގޮތަކުން އަނިޔާއެއް ދެވިއްޖެނަމަ ތިބާގެ ޢަޖަލު ހަމަވުމުގެ ކުރިން އެ އަޚާގެ ކިބައިން މަޢާފަށް އެދޭހުށިކަމެވެ. ނޫންނަމަ ފައިސާއަކުން ތިމާކުރި ނުބައިކަމުގެ ބަދަލު ނުދެވޭނޭ ދުވަހު (އެބަހީ: ޤިޔާމަތްދުވަހު) ތިބާ އަނިޔާކުރި މީހާގެ ބަދަލު ހަމަވެއްޖައުމަށްދާންދެން ތިބާގެ ހެޔޮޢަމަލުގެ ތެރެއިން އެމީހަކަށް މާތްﷲ ބަދަލުދެއްވާނެތެވެ. އަދި ތިބާގެ އެފަދަ ހެޔޮކަމެއް ނެތްނަމަ އަނިޔާލިބުނު މީހާގެ ފާފައިގެ ތެރެއިން އެ ބަދަލު ހަމަވެއްޖައުމަށް ދާންދެން ތިބާއަށް ދެއްވާހުއްޓެވެ.“
މިއީ އެކަމަކާއިމެދު އަޅުގަނޑުމެން ބިރުވެތިވާންޖެހޭ ކަމެކެވެ. މުޖުތަމަޢުގެ އަމާންކަމާ ތިމާގެ އަމިއްލަ ހިމާޔަތް ތިމާއަށް ލިބިގަނެވޭނީ އެ ހިމާޔަތާއި އަމާންކަން ތިމާގެ ފުށުން އަނެކުންނަށް ލިބިގެންނެވެ. ތިމާގެ ފަރާތުން އަނިޔާ ލިބިފައިވާ މީހުންގެ ބަދު ދުޢާ ތިބާއަށް ޖެހިދާނޭކަމާމެދު ތިބާ ބިރުވެތިވާންޖެހޭނެއެވެ.
އެހެނީ އެބައެއްގެ ދުޢާ މާތްﷲ އިޖާބަނުކުރައްވާ ދޫކޮށްނުލައްވާމީހުންގެ ތެރޭގައި އަނިޔާލިބިފައިވާ މީހާ ހިމެނިގެންވެއެވެ. ވީމާ އަހުރެންނާއި ތިބާގެ ޢަމަލުތައް އިޞްލާޙްކުރައްވާ އަތާއި ދުލުގެ ނުބައިކަމުން އެހެނިހެން މުސްލިމުން ސަލާމަތްކުރެއްވުންއެދި ދުޢާދަންނަވަމެވެ. – އާމީން
އަޅުގަނޑުމެންނީ މުސްލިމުންނެވެ. ހައްޤުގެ މަގުގައި އަޅުގަނޑުމެން ތިބިކަމުގު ދަޢުވާ އަޅުގަނޑުމެން އަޑުހަރުކޮށް ކުރަމުންދާއިރު އަޅުގަނޑުމެންގެ އަމަލުތަށް ހަތް އުޑުގެ މަތިން ބައްލަވާފަރާތެއް ވާކަމާއިމެދު އަޅުގަނޑުމެންގެ ހިތުގައި ޔަޤީންކަމެއް ނެތެވެ.
ނުނިމޭ- މި ލިއުން ކަމުދިޔަ ނަމަ fenvaru.mv ގެ އެފްބީ ޕޭޖަށް ލައިކް ކޮއްލަދެއްވާ
