ޝައިންގެ- ވަފާތެރި މަވީމޭ 04 ވަނަބައި
އޭގެ ތިންދުވަސް ފަހެވެ. މަތިންދާބޯޓަށް އެރީއްސުރެ ޝާނީގެ ހިތްވަނީ އަވަސްވެފައެވެ. އެތައް ދުވަހަކަށްފަހު އޭނަގެ އަމިއްލަ ވަޒަނަށް ދެވެންއުޅޭތީ އުފަލުންކަމެއް ނުވަތަ މާޒީގެ ސަފްހާތައް ހަނދާންވެ ހިތްނުތަނަވަސް ވެގެން ކަމެއްނޭނގެއެވެ. ހަމްޒާއާއި ޝާނީ ހިމޭނުން ތިބިނަމަވެސް ދެންތިބިމީހުން ތިބީ ނުހަނު އުފަލުންނެވެ. ބޯޓް ދަތުރަށް ފެށުމުން ޝާނީވެސް ދެލޯމަރާލައި އޭނާގެ ގޮނޑީގައި ހަމަޖެހިލިއެވެ. އެއާއެކު އޭނާގެ މާޒީގެ ކުލަ ސަފްހާތަކުން ފަހަރަކު ސަފްހާއެއް ސިކުނޑީގައި ހުޅުވެމުންދިޔައެވެ.
**************
ނަވާރަ ސަތޭކަ ނުވަދިހަ ފަސްވަނަ އަހަރުގެ ބޮޑުއީދުމަހެވެ. އީދަށް އައި ޒުވާނުންނާއި ކިޔަވައި ކުދީންގެ ސަބަބުން ރަށުތެރެވަނީ ހަލަބޮލިވެފައެވެ. މާލޭގައި ކިޔަވަން ހުރެފައި ޝާނީވެސް ރަށަށް އައީ ބޮޑުއީދުގެ އުފާ ހާސިލްކޮށްލުމަށެވެ. އޭނާއަށް ރަށަށް އެއާދެވުނީ ފަސް އަހަރު ފަހުންނެވެ. ކޮންމެ ޗުއްޓީއެއްގައިވެސް އޭނާ ހުންނަނީ ރަށަށް އަންނަން ބޭނުންވެފައެވެ. ނަމަވެސް ކޮންމެ ޗުއްޓީއެއްގައިވެސް އޭނާ ކިޔަވަން ހުންނަ ގޭމީހުން ކޮންމެވެސް ބޭރުގައުމަކަށް ދެއެވެ. އެހެންކަމުން އޭނާއަށް ޖެހެނީ ގެބަލަން މާލޭގައި މަޑުކުރާށެވެ. ބައެއްފަހަރު އޭނާގެ މަންމައާއި ބައްޕަ އޭނާގެ ގާތަށް މާލެދެއެވެ. ނަމަވެސް މިފަހަރު އޭނާ ރަށަށް އެއައީ އެއްކޮށް ކިޔަވާނިމި އޯލެވެލްވެސް ނިމުނުފަހުންނެވެ. ކިޔަވައި ނިމުމުންވެސް އެމީހުން އޭނާ ފޮނުވާކަށް ބޭނުމެއްނުވިއެވެ. ނަމަވެސް އޭނާ މަންމަމެންގާތު ރޮއެއާދޭސްކޮށްގެން ރަށަށް އައީއެވެ. ދެން އަނބުރާ މާލެ ދާކަށްވެސް އޭނާ ބޭނުމެއްނުވެއެވެ.
ދުވަސްތަކަކަށްފަހު ރަށަށް އާދެވުމުން ޝާނީހުރީ ކޮންމެވެސް ވަރަކަށް އާވެފައެވެ. އެހެންކަމުން އޭނާ ގިނަ ވަގުތު ހޭދަކުރީ ގޭގައިއެވެ. ބައެއްފަހަރު މަގުމައްޗަށް ނުކުމެލިނަމަވެސް އެއްވެސް ތާކަށް އޭނާ ނުދެއެވެ. އީދު ދުވަހުގެ ދެތިން ދުވަސްކުރިން އޭނާގެ އެންމެގާތް އެކުވެރިންކަމުގައިވާ ރީނާ އާއި ލީޒާ ރަށް އައިސްފިއެވެ. އެކުދިން އޭނާ ހޯދަން ގެޔަށް އައީ އެކުދިންނާއެކު އީދު ނަމާދަށް ދިއުމަށް އެދިއެވެ. އޭނާ އެކުދިންނާއެކު އީދު ނަމާދަށް ދިއުމަށް އެއްބަސްވިއެވެ. އޭނާ މިފަހަރު މާލެއިން ގެނައި ރީތި ހެދުންތަކުގެ ތެރެއިން އެންމެރީތި ހެދުންލައި ތައްޔާރުވިއެވެ. މިސްކިތަށް ދިޔަ މަގުމަތީ އެމީހުން މިއަދުގެ ތާވަލް ރާވަމުން ދިޔައެވެ.
އީދުނަމާދު ނިމުމާއެކު ޝާނީ އަވަސް އަވަހަށް ދޮޅިބާލާފައި ގުޅައަކަށް މުލައްސަތެރެއަށްލައި އޮޅާލަމުން ހަލުވި ފިޔަވަޅުތަކެއްގައި މިސްކިތުން ފޭބިއެވެ. އޭނާ ބޭނުންވީ އެހެން ހުރިހާ ކުދިންނަށްވުރެ ކުރިން ގެޔަށް ގޮސް އޭނާގެ ރީތި އީދުހެދުން ބަދަލުކުރާށެވެ. ނޫންނަމަ މިއަދު އޭނާގެ އެކުވެރިން ފެންކުޅިކުޅެ އޭނާގެ އެރީތި ހެދުން ޚަރާބުކޮށްލާނެވެ. މިސްކިތުން ފޭބިގޮތަށް ދުވެފައި އައިސް ގެޔަށް ވަންނަން ދިމާކޮށްލި ކުއްޖާ މީހެއްގެ ގައިގާ ލައިގެންފައި މަތަވިއެވެ.
“ އަތްދިއްޔޯތް….ތަދުވެއްޖެއޭ…ކޮން ދުވުމެއްތަ ތިދުވަނީ މިހާ ހެނދުނާ؟..“ ޝާނީގެ ދޮންތަ ސަލްމާ އޭނާގެ ކޮނޑުގައި ފިރުމަމުން އަޑުލައިގަތެވެ.
“ ދެން ދޮންތާ ދުރަށްދެބަލަ ލަސްވެޔޭ….މިހާރު އެމީހުން އަންނާނެ…“ ހިތް އަވަސްވެފައި ފަހަތް ބަލާލަމުން ޝާނީ ބުނެލިއެވެ.
“ ކާކު އަންނަނީތަ؟… ނާދޭ އެއްވެސް މީހެއް….ޝާނީ ނޫން މީހަކު އެބައުޅޭތަ މިހާ ހެނދުނު ހެނދުނާ މޮޔަވެގެން….“ ބޭރުބަލާލަމުން ސަލްމާ ކުދި ކިޔައިގަތެވެ.
“ ދޮންތާ ދެންވެސް ތަން ދައްކަބަލަ! އެބަލަސްވެޔޭ…މަގޭ މިޔޮއްރީތި ހެދުން ޚަރާބުވެދާނެތީ މިއުޅެނީ…..“ ދޮރުމަތީގައި ހުރި ސަލްމާގެ އަތުގައި ހިފައި އެއްކައިރިކޮށްލަމުން ޝާނީ އަވަސް އަވަހަށް ގޭތެރެއަށް ދެމިގަތެވެ.
“ މަޑުކޮށްބަލަ! ތީ ހާދަ ރީތި ހެދުމެކޭ….މަ އަދި ނުދެކޭ ހެދުމެއްތީ….ކޮންތާކުން ހޯދި އެއްޗެއް…“ ޝާނީގެ ފަހަތުން ވަންނަމުން ސަލްމާ ބުނެލިއެވެ.
“ މި މިފަހަރު އެގޭ ދައްތަ ބޭރަށް ގޮސް ގެނައި ހެދުންތަކުން ހެދުމެއް…..ސަޅިދޯ…“ އުފާވެލާފައި ޝާނީ ބުނެލިއެވެ.
“ ވަރަށް ރީތި…ތިލާފަ ހުންނައިރު ހަމަ ހީވަނީ އަސްލުވެސް ޕާކިސްތާން ކުއްޖެހެން….“ ސަލްމާ އޭނާގެ ކޮއްކޮއަށް ތަޢުރީފުކޮށްލިއެވެ.
“ ދެން ދޮންތަވެސް މަށަށް މަލާމަތްކުރާނެ ކަމެއްނެތް….މަގޭ ރުޅިއަރުވަން އެއުޅޭ ރީނާމެންވެސް ގޮވާނެ ޕާކިސްތާން ކުއްޖާއޭ….ވަރަށް ފޫހިވޭ…“ ޅަގޮތަކަށް ތުންއޫކޮށްލަމުން ޝާނީ ޝަކުވާކުރިއެވެ.
“ އެހެންދޯ ވާނީ…މިއޮއްބޮޑު ރަށުގަވެސް ތިނޫނީ ޕާކިސްތާން ހެދުންލާ ކުއްޖެއް ނޫޅޭވިއްޔަ….“ ހީލާފައި ސަލްމާ ބުނެލިއެވެ.
“ މިއައްކިޔަނީ ދޯޕައްޓާ ހެދުން….ހަމައެކަނި ޕާކިސްތާން މީހުން ލާއެއްޗެއްނޫން މީކީ…ހިންދީ ފިލްމުތަކުގަވެސް މިކަހަލަ ހެދުން ލައެއްނު…“ ވަރަށް އެނގޭ މީހަކު ފަދައިން ޝާނީ ބުނެލިއެވެ.
“ ހިންދީ ފިލްމުގަ އުޅެނީ ޕާކިސްތާން މީހުންނެއްނޫންތަ؟…“ ކުޑަކޮށް ހައިރާންވެފައި ސަލްމާ އަހާލިއެވެ.
“ ހިންދީ ފިމްލު ކުޅެނީ ހިންދުސްތާން މީހުން….ޕާކިސްތާން އެއީ އަދި އެހެންތަކެއް….“ ޝާނީ އޮޅުން ފިލުވައިދިނެވެ.
“ ހިންދުސްތާން ޕާކިސްތާން އެއީ އެއްކައްޗެއްނު….ޕާކިސްތާން އެއީ އެމީހުންނަށް ކިޔާނަމެއްނޫންތަ؟ އަހަރެމެންނަށް ދިވެހިން ކިޔާހެން…“ ސަލްމާ ސުވާލުކޮށްލިއެވެ.
“ ދެން ކީކޭ ބުނާނީ…ހިންދީ ފިލްމުކުޅެނީ އިންޑިއާ މީހުންނޭ…ހިންދުސްތާން އަކީ އިންޑިއާ…“ ޝާނީ އޮޅުން ފިލުވައިދިނެވެ.
“ ހިންދުސްތާންއާ ޕާކިސްތާން އެއީ އިންޑިއާގެ ދެރަށެއްނޫންތަ؟…“ ސަލްމާހުރީ އޮޅުންއަރާފައެވެ.
“ އާނ…ތިބުނީ ރަނގަޅަށް..ދެން ދޮންތަ އަވަހަށްދޭ މިހާރު ހާރީޝްބެ ހޯދާނެ…“ ސަލްމާގެ ކިބައިން ސަލާމަތްވުމަށްޓަކާ ޝާނީ އެހެން ބުނުމަށްފަހު ދުވެގޮސް އޭނާގެ ކޮޓަރިއަށްވަނެވެ.
އޭނާ ހެދުން ބަދަލުކޮށްގެން ނުކުމެ ބަދިގެއަށް ވަދެ ޖަގަކަށް ފެންއަޅައިގެން ބޭރަށް ނުކުމެ ގޯތިތެރޭގައި ފިލާހުރީ ބައްޕަ މިސްކިތުން އަންނައިރު، ބައްޕައާއެކު އާސިމްބޭބެ އަންނަ ވާހަކަ ބުނުމުން އޭނާ ތެންމާލުމަށެވެ. އާސިމްއަކީ ބައްޕަ ފަރާތު ބޮޑުބޭބެ ދަރިއެކެވެ. ކުޑައިރުއްސުރެ އޭނާދެކެ ނުހަނު ލޯބިވާ ބޭބެއެކެވެ. ދޮރޯށި ކައިރީގައިހުރި ބިޔަ ބަނބުކެޔޮ ގަހުގެ ފުރަގަހުގައި ފިލާހުންނަތާ އެތައް އިރެއްފަހުން ދުރުން އޭނާގެ ބައްޕަ އަންނަ މަންޒަރު ފެނުނެވެ.
ބައްޕައާއެކުގައި ހިނގާފައި އެއަންނަ އިސްކޮޅުންދިގު ޒުވާނާގެ މޫނު ރަނގަޅަށް ނުފެނުނު ނަމަވެސް އެއީ އާސިމްބޭބެކަން އޭނާއަށް އެނގެއެވެ. އޭނާ އަވަސް އަވަހަށް ގަސް ކައިރިއަށް ޖެހިލާ ރަނގަޅަށް ފިލިއެވެ. އެހެން ހުންނަތާ އިރުކޮޅެއްފަހުން ދެމީހުން އައިސް ދާދި ކައިރީގައި މަޑުކޮށްލިއެވެ. އެމީހުން ވާހަކަދައްކާ އަޑުވެސް ނީވޭތީ އޭނަ ސިއްރު ސިއްރުން ބަލާލިއިރު، އާސިމްބޭބެހުރީ އޭނާއަށް ފުރަގަސްދީގެންނެވެ.
ބައްޕަ ހިނިތުންވެހުރެ އާސިމްބެ އިޝާރާތުން ދައްކާ އެއްޗެއް ބަލަންހުއްޓެވެ. އެދެމީހުން އެދައްކަނީ ކޮންމެވެސް ސިއްރުވެރި ވާހަކައެކޭ ޝާނީގެ ހިތަށްއެރިއެވެ. ދެމީހުންނަށް ރޭކާނުލާ ތިއްބައި ޝާނީ ފިލާހުރިތަނުން ނުކުމެ ހަލުވިކަމާއެކު ދުވެފައި އައިސް އޭނާގެ އަތުގައި ހުރި ފެންޖަގު އާސިމްގެ ބޮލަށް އޮއްސާލިއެވެ. އެމަންޒަރު ފެނުނު ނަމަވެސް އެކަން މަނާކުރުމަށްޓަކައި ޝާނީގެ ބައްޕައަށް އެއްވެސް ކަމެއް ނުކުރެވުނެވެ.
“ އީދުމުބާރަކު އާސިމްބޭ…“ ފެންޖަގުއަޅާލާފައި ބާރަކަށް ހޭންފަށަމުން ޝާނީ ބުނެލިއެވެ.
ނުވެސް ވިސްނާހުއްޓައި ފެން އެއްޗެއް ބޮލަށް ފޭބުމުން ލިބުނު ސިހުމާއެކު ކުއްލިއަކަށް ޖިނާހުއަށް ފަހަތަށް އެނބުރެވިއްޖެއެވެ. ދެއަތުން މޫނުފުހެލާފައި ބަލާލިއިރު ކުރިމަތީގައިހުރި އަންހެން ކުއްޖާހުރީ ދެލޯބޮޑުކޮށްގެން ހައިރާންކަމާއެކު އޭނާއަށް ބަލާށެވެ.
“ ދަރިފުޅާ ކީއްތަ ތިކުރީ؟…މީހަކު ގަޔަށް ފެންޖަހާއިރު ކާކުތޯ ރަނގަޅަށް ބަލާލަންވާނެއްނު…“ ޝާނީއަށް ފެންޖެހުނީ އާސިމްގެ ގަޔަށް ނޫންކަން އެނގި ކަންބޮޑުވެ ހަދާނެގޮތެއް ނޭނގިފައި ހުއްޓާ އޭނާގެ ބައްޕަ ބުންޏެވެ.
“ ސޮ..ސޮރީ…ގަސްތަކުނޫން….ހީކުރީ އާސިމްބެކަމަށް…“ ޒުވާނާ ދެލޯބޮޑުކޮށްގެން އޭނާއަށް ބަލަންހުރިގޮތުން ބިރުގެންފައި ޝާނީއަށް ބުނެވުނެވެ.
“ އެފަކީރު މުޅިން ތެމިފޯވީނު…ދެންވެސް ދޭބަލަ ތުވާއްޔެއް ހިފައިގެން އަންނަން…“ ކުޑަކޮށް ނުރުހިފައި ބައްޕަ ބުނެލުމުން ޝާނީ ދުވެފައި އެތެރެއަށް ވަނެވެ.
“ މިހާރު ކިހިނެއްވީ؟…“ ޖިނާހް ގޮވައިގެން އެތެރެއަށް ވަތް މުދިންބޭ ފެނިފައި މުދިންބޭގެ އަންހެނުން އާބިދާ އަހާލިއެވެ.
“ މި ޝާނީގެ ކަންތައް….އެސޮރު އަހަރެންނާ ވާހަކަދައްކަން ހުއްޓާ ބަލާވެސް ނުލާ އައިސް ފެންޖަހާ ތެންމާލައިފި….އުނހު ބަލާބަލަ މަގޭ މުންޑުވެސް މިހުރީ ޚަރާބުވެފަ….“ ކަންތައްވީގޮތް އަލީ އޮޅުންފިލުވައި ދިނުމުން އާބިދާވެސް ހީލަމުން ދެފަރާތަކަށް ބޯހޫރާލިއެވެ.
ޝާނީ ކަންބޮޑުވެގެންހުރެ ކޮޓަރި ތެރޭގައި ދެކޮޅަށް ހިނގަމުން ދިޔައެވެ. އޭނާއަށް ފެންޖެހުނީ އާސިމްބޭބެ ގަޔަކަށް ނޫނެވެ. އެއީ ދެކޭ މޫނެކެވެ. ދަންނަ ލޮލެކެވެ. ނަމަވެސް ކާކުކަމެއް ނޭނގުނެވެ. އެހާރީތި ޒުވާނަކު މީގެކުރިން މިރަށުން އޭނާ ނުދެކެއެވެ. ޗުއްޓީއަށް އައިސް މިވީ ހަފްތާއެއްގެ ތެރޭގައިވެސް އެޒުވާނާއެއް އޭނާ ނުދެކެއެވެ. އެއީ ކާކު ހެއްޔެވެ؟
ޖިނާހްގެ ގަޔަށް ޝާނީއަށް ފެންޖެހުނީ އޮޅުމަކުން ކަން މުދިންބޭ ބުނެދިނުމުން ޖިނާހް ބޭއިޚްތިޔާރުގައި ހެވުނެވެ. ޖިނާހް ރުޅިނާންނަކަން އެނގުމުން މުދިންބޭގެ ހިތަށް ހަމަޖެހުމެއް ލިބިގެން ދިޔައެވެ.
“ ޝާނީ ދަރިފުޅާ…އަދިވެސް ފެންހިއްކާނެއް އެއްޗެއް ނުގެނެވެނީތަ؟….ތަންކޮޅެއް އަވަސްކޮށްބަލަ!…“ މުދިންބޭ ގޮވާލުމުން ކޮޓަރިތެރޭގައި ކަންބޮޑުވެގެން ހިނގަ ހިނގާހުރި ޝާނީ ހުއްޓުނެވެ.
“ ތުވާލި ތުވާލި…“ ދެކޮޅު ހޯދާބަލާލަމުން ކޮޓަރީގެ އެއްކަނެއްގައިހުރި ބުޅިގަނޑުގައި އަޅުވާފަހުރި ރަތްފިނިފެންމާ ކުލައިގެ ތުވާލި ހިފައިން ހަލުވިކަމާއެކު ކޮޓަރިން ނުކުތެވެ. ބިރުންހުރެ ގޮސް އޭނާ ސިޓިންރޫމަށް ނުކުތްއިރު، ބޮޑުއަށީގައި އިށީނދެލައިގެން އިސްދަށަށް ޖަހައިގެން ޒުވާނާ އިނެވެ. ބައްޕަ ފެންނާކަށް ނެތެވެ. އޭނާ ނުހަނު މަޑުމަޑުން ގޮސް ގޮސް ޒުވާނާގެ ކުރިމައްޗަށް ހުއްޓި ތުވާލި ދިއްކޮށްލިއެވެ. މީހަކު އައިހެން ހީވެގެން ޖިނާހު އިސްއުފުލާ ބަލާލިއެވެ. ދެމީހުންގެ ހަތަރުކަޅި ހަމަވުމާއެކީ ހުއްޓުން އަރާފައި ޝާނީއަށް ހުރެވުނީ ޖިނާހްގެ ފުންލޮލުގެ ޖާދޫގައި ޖެހިފައެވެ. ޝާނީއަށް ބަހެއްބުނަންވެސް ނޭނގިހުއްޓައި ޖިނާހް ތުވާލީގައި ހިފަމުން ހީލިއެވެ. އެވަގުތު އޭނާގެ ހިތަށް ގޮތެއްވެގެން ދިޔައެވެ.
“ އާބިދާ ޖިނާހްއަށް ސައިހަދާބަލަ!…“ ކުއްލިއަކަށް ޝާނީ ސިހުނީ އޭނާގެ ބައްޕަގެ އަޑުންނެވެ. އޭނާ އަވަސް އަވަހަށް ކޮޓަރިއަށް ދިއުމަށްޓަކައި ހިނގައިގަތެވެ.
“ ދަރިފުޅާ….ދޭބަލަ މަންމަ ކޮބައިތޯބަލާލަން…“ އާބިދާގެ ޚަބަރެއް ނުވުމުން މުދިންބޭ އެދުނެވެ. ޝާނީ ދުވެފައި ކަހަލަ ގޮތަކަށް ބަދިގެ ފަރާތަށް ދިޔައެވެ.
“ މަންމާ ބައްޕަ ބުނީ ސައިހަދާށޯ….“ ބަދިގޭގައި ކަމެއްގައި މަޝްޢޫލުވެގެންހުރި އާބިދާ ފެނުމާއެކީ ޝާނީ ބުންޏެވެ.
“ އާނ…ތިކަމާއޭ މިއުޅެނީ….ދޭބަލަ މިތަށި ހިފައިގެން….މަންމަ ދާނަން ސައި ހިފައިގެން…“ ބޯކިބާތަށްޓެއް ދިއްކޮށްލަމުން އާބިދާ އެދުނެވެ.
“ މަންމާ….ކާކުތަ އެއީ؟…“ ތަށީގައި ހިފަމުން ޝާނީ ސުވާލުކޮށްލިއެވެ.
“ އެއީ ޖިނާހްއެއްނު….ދޮންތަމެން ގޭގަ އުޅޭ ޝަކީލާގެ މަންމަނު ސޮރު…“ އާބިދާ އޮޅުން ފިލުވައިދިނެވެ. އެވަގުތު ޝާނީގެ ހައިރާންކަން އިތުރުވީ އޭނާއަށް ޖިނާހް ނޭނގުމުންނެވެ.
“ އެއީ ހަމަ ނިޖާހްތަ؟…“ ގަބޫލު ނުކުރެވިފައި އޭނާއަށް އަހާލެވުނެވެ.
“ އާނ….ދަރިފުޅަށް ނުވެސް އެނގުނުތަ؟….މިހާރު އެސޮރު ބޮޑުވެފަ ރީތިކަމުން ނޭނގުނީދޯ…“ ހިނިއައިސްފައި އާބިދާ ބުނެލިއެވެ. ޝާނީ އިތުރު އެއްޗެއް ނުބުނެ ތަށި ހިފައިގެން ގޭތެރެއަށް ވަނެވެ.
މުދިންބެއާއެކު ގަޔާވެގެން އިނދެ ސައިބޮމުން ދިޔަ ޖިނާހްގެ މޫނަށް ޝާނީ ސިއްރު ސިއްރުން ބަލަމުން ދިޔައީ އެއީ ހަމަ ކުޑައިރު އޭނާ ދުށް ޖިނާހް ބާއޭ ހިތަށްއަރާ ހާލުގައެވެ. މީގެ ފަސް އަހަރުކުރިން ޖިނާހް އޭނާއާއެކު އެއްކުލާހެއްގައި ކިޔެވިއެވެ. އޭރު ޖިނާހްއަކީ ހިކިކޮށް އިސްކޮޅުން ކުރުކޮށްހުރި ކުއްޖެކެވެ.
މުޅި ކުލާކުންވެސް އެންމެ ކުޑަކޮށްހުރީ ޖިނާހުއެވެ. ނަމަވެސް މިހާރު ޖިނާހްއަކީ ދިގު އިސްކޮޅަކާއި ހެދިހުރި ހަށިގަނޑެއް ލިބިފައިވާ ރީތި ޒުވާނެކެވެ. އެއްވެސް އައިބެއްނެތް ފުރިހަމަ މޫނެކެވެ. ފަން އިސްތަށިގަނޑަކާއި ރީތި ކަޅިރަވައެކެވެ. ޖާދުވީ ހިނިތުންވުމެކެވެ. ފިރިހެނެއްގެ ކިބައިގައި ހުންނާނެ އެންމެހައި ރީތިކަމެއް ޖިނާހްއަށް ލިބިގެންވެއެވެ. އަޑުނީވޭ، ވާހަކަ ނުދެއްކޭ މަންމަނަކަށް ވުން ފިޔަވައި އޭނާގެ ކިބައިގައި އުނިކަމެއް ނެތެވެ. އެއުނިކަންވެސް އޭނާގެ ރީތިކަމުގެ ކުރިމަތީގައި ފަނޑުވެގެން ހިނގައިދެއެވެ.
“ ޝާނީ…ޝާނީ އާދެބަލަ!…“ ކުއްލިއަކަށް ބޭރުން ރީނާގެ އަޑުއިވިފައި ޝާނީ ސިހުނެވެ.
“ މަންމާ…އެބައަންނަން އެމީހުނާ އެކީ ގޮސްފަ…“ ޝާނީ އޭނާގެ މަންމައަށް ބަލާލަމުން ހުއްދައަށް އެދުނެވެ.
“ ހޫމް…ކަންތަކާ ޖެހުނީ…ދެން މިއަދު އިރު ހުއްޓަކާ ތިފެންކުޅިއެއް ނުނިމޭނެ…“ އާބިދާ ދެފަރާތަށް ބޯހޫރާލަމުން ބުންޏެވެ. ޝާނީ ހިނިއައިސްފައި ނުކުމެގެން ދަމުން އަދިވެސް އެއްފަހަރު ޖިނާހްއަށް ބަލާލިއެވެ. އޭނު ޖިނާހްވެސް އިނީ އޭނާއަށް ބަލާށެވެ. ނަމަވެސް ޝާނީއާ ހަތަރުކަޅި ހަމަވުމާއެކު ޖިނާހް އަވަސް އަވަހަށް އިސްޖަހާލިއެވެ.
މެންދުރުފަހުގެ ވަގުތެވެ. ފެންކުޅި ކުޅެ ނިމިގެން ގެޔަށް އައިއިރު ޝާނީހުރީ ވަރުބަލިވެފައެވެ. އަދިވެސް ރަށުތެރޭގައި ކުޅިވަރު ނުހުއްޓެވެ. ޒުވާނުންގަނޑު މަގުމަތީގައި ހޯބޯލަވަމުން ދުވާއަޑުއިވެއެވެ. ޝާނީ ގެޔަށް އައިސް ފެންވަރާލައިގެން ރީތި ހެދުމެއްލިއެވެ. އަދި ވަރަށް އުފަލުންހުރެ ގެއިން ނުކުތެވެ. އޭނާ ބޭނުންވީ ސަލްމާގެ ގާތަށްދާށެވެ. ނަމަވެސް ތަންކޮޅަކަށް ދިޔުމާއެކު ބަޔަކުމީހުން ހެމުން ދުވަމުން އަންނައަޑު އިވުނެވެ.
“ އޯހ…ނޯ އަދިވެސް ފެންކުޅިކުޅެ ނުނިމެނީ….“ ހިތާ ހިތާ ޝާނީ ކިޔާލިއެވެ. އޭނާ އަނެއްކާވެސް ތެމެން ބޭނުންނުވާތީ އަވަހަށް ޖެހިގެންހުރި ގެޔަށްވަދެ ފިލިއެވެ. އެމީހުން ދިޔައަޑުއިވުމުން އޭނާ އެގެއިން ނުކުމެގެން ދޮންތަމެން ގެޔަށް ދިއުމަށްޓަކައި އަނެއްކާވެސް ހިނގައިގަތެވެ. މިފަހަރުވެސް ބަޔަކު ދުވާއަޑުއިވިގެން އޭނާއަށް ޖެހުނީ ފިލާށެވެ. އެންމެފަހުން އޭނާ ދޮންތަގެޔަށްދާ ޚިޔާލުދޫކޮށްލުމަށްފަހު ތުނޑީމަގަށް ދިއުމަށްޓަކައި ހިނގައިގަތެވެ. ދުވަހުގެ އެންމެ ހޫނުގަދަ ވަގުތުކަމުން މަގުތަކުގައި ތަންކޮޅެއް މީހުން މަދެކެވެ. އޭނާ ކޮޅުކޮޅު ބަލަމުން ފިލާ ބޮނދަމުން ދިޔައެވެ. މިއަދު އިރުއޮއްސޭއިރުވެސް ފެންކުޅިކުޅެ ނުނިމޭނެކަން އެނގޭތީ އޭނާ ބޭނުންވި ކޮންމެވެސްތާކަށް ވަދެ ފިލާށެވެ.
އޭނާ ބައެއްފަހަރު ދުވެފައި އަނެއްބައި ފަހަރު ހިނގާފައި ގޮސް ތުނޑީކޮޅަށް ފޭނބިއެވެ. ނަސީބަކުން އެއްވެސް މީހަކު ފެންނާކަށް ނެތެވެ. ތުނޑީކޮޅުގައިހުރި ބިޔަ ކާނިގަހުގެ ހިޔަލުގައި އޭނާ އިށީނެވެ. ރީތި ދޮންވެލިގަނޑުމަތީގައި އިނދެ ކުރިމަތިން ފެންނަން އޮތް ހިތްގައިމު މޫދަށް ނަޒަރު ހިންގާލިއެވެ.
ޖެހެމުންދިޔަ ފިނި ފިނި ރޯޅިގެ ސަބަބުން ޝާނީގެ ދިގު އިސްތަށިގަނޑާއި އޭނާގެ ހުދު ދޯޕައްޓާ ވަޔާ ވިހުރުވެމުންދިޔައެވެ. އޭނާ އެގޮތުގައި އިންނަތާ އިރުކޮޅެއްފަހުން ބަޔަކު ވާހަކަދައްކާ އަޑު އިވޭހެން ހީވެގެން ފަހަތްބަލާލިއިރު ޒުވާން ފިރިހެން ކުދިންތަކެއް އެދިމާއަށް އާދެއެވެ. އޭނާ ގަތްބިރުން އިންތަނުން ތެދުވެވުނެވެ. އެމީހުންނަށް ފެނުމުގެކުރިން ފިލަން އޭނާ ބޭނުންވިއެވެ.
ކުއްލިއަކަށް އޭނާއަށް އައި ޚިޔާލުން ކާނިގަހަށް އޭނާ ބަލާލިއެވެ. އެއީ ތިރިކޮށް ހެދިފައިވާ ފަތްބޯ ގަހެއްކަމުން ގަހަށް އަރަން އުނދަގޫނުވާނެކަން އޭނާއަށް އެނގުނެވެ. އޭނާ އަތަށް ފައިވާން ނަގައިގެން ގޮސް ގަހަށް އަރަންފެށިއެވެ. އޭނާ ސަމާލުކަމާއެކީ ގަހަށްއަރައި ބޯފަތްތަކުގެ ތެރޭގައި ފިލިއެވެ. އެހެން އިންނަތާ އިރުކޮޅެއްފަހުން އެޒުވާނުންތައް އައިސް ގޮނޑުދޮށަށް ފައިބައިގެން ރަށުގެ ހުޅަނގު ފަރާތަށް ދިޔައެވެ. އެމީހުން ދިއުމުން އޭނާ ހަގުން ފައިބަން ހިތަށްއަރާފައިވެސް މަޑުކޮށްލީ އަނެއްކާވެސް ބަޔަކު އަތުވެދާނެތީއެވެ. އެހެންކަމުން އޭނާ ގަސްތުކުރީ އިރުއޮއްސޭންދެން އެގަހުގައި އިންނާށެވެ.
ގަހުގެ ފަލަގޮފިތަކުގެ ތެރެއިން ގޮތްޕެއްގައި ބުރަކަށި ޖައްސާލަމުން ރަނގަޅަށް އޭނާ ހަމަޖެހިލިއެވެ. އެތާނގައި އޮންނައިރު އުދަރެސް ފެންނަލެއް ނުހަނު ހިތްގައިމެވެ. ކަނޑުން އަންނަ ފިނިރޯޅިތައްވެސް އެއްވެސް ހުރަހެއްނެތި އޭނާގެ މޫނުގައި ބީހެމުންދިޔައެވެ. އެގޮތުގައި އޮންނަތާ އިރުކޮޅެއްފަހުން އޭނާގެ ގާތަށް ނިދިއަންނަ ގޮތްވިއެވެ.
ނުނިމޭ- ވާހަކަ ކަމުދިޔަ ނަމަ fenvaru.mv ގެ އެފްބީ ޕޭޖަށް ލައިކެއް ދެއްވާ. އަދި ވާހަކަ ޝެއަރ ކޮށްލަދެއްވާ.
