ޝައިންގެ- ވަފާތެރި މަވީމޭ- 08 ވަނަބައި
ޝާނީ ހިތް ފުރޭވަރަށް ލިނބޯ ބިނދެވުމުން، އެކަން ހުއްޓާލާފައި އައިސް ދަރު އެއްކުރުމަށް ގަސްތުކުރިއެވެ. އުނިގަހުގައި ހަރުކޮށްފައި ކަތިވަޅި ނެގުމަށްފަހު ފަންތޮށި ބުރިކުރަން ގަސްތުކުރިނަމަވެސް، އުނގުގައި ލިނބޯ ހުރުމުގެ ސަބަބުން އެއްއަތުން ފަސްބައިގައި ހިފައިގެންހުރެ އަނެއްއަތުން ދަރުފެޅުމަކީ ވާނެކަމެއް ނޫންކަން އޭނާއަށް އެނގެއެވެ. އެހެންކަމުން އަނެއްކާވެސް ކަތިވަޅި ބާއްވާފައި އުނިގަހުން ފަތެއް ބިނދެގެން އައިސް ހިކިފަނެއްގެ މަތީގައި އިށީނދެ ވަރަށް ގަޔާވެގެން ގޮށްޓެއް ހެދޭތޯ މަސައްކަތްކުރިއެވެ. ނަމަވެސް އުޅެ އުޅެވެސް އޭނާއަށް ގޮށްޓެއް ހެދޭގޮތެއް ނުވިއެވެ.
އެންމެފަހުން އައިރުޅިން ފަތް ވީދާ ކުދި ކުދިކޮށްލުމަށްފަހު އުކާލިއެވެ. އެމަންޒަރު ބަލަން ތަންކޮޅެއް ދުރުގައިހުރި ޖިނާހްގެގާތަށް ހިނިއައެވެ. ޝާނީއަށް އެހީތެރިވެދިނުމަށް އޭނާ ގަސްތުކޮށް އެދިމާއަށް ހިނގައިގަތެވެ. މީހެއްގެ ހިލަންވެގެން ޝާނީ ސިހިފައި ބަލާލިއިރު ޖިނާހް އާދެއެވެ. ކުއްލިއަކަށް ޖިނާހް އެތަނުން ފެނުމުން ހަދާނެ ގޮތެއްނޭނގިފައި ޝާނީއަށް އިނދެވުނެވެ. ޖިނާހް އެއައިގޮތަށް އައިސް ކައިރީގައިހުރި އުނިގަހުން ބޮޑުދެފަތް ބިނުމަށްފަހު، ޝާނީ އިށީނދެގެން އިން ފަނުން ދެތިން އިލޮށިކޮޅު ނައްޓާލައި އެދެފަތުން ބޮޑު ގޮށްޓެއް ހަދާލީ ނުހަނު ފަރިތަކަމާއެކީގައެވެ.
ޖިނާހް ގޮށި ހެދި މަންޒަރުބަލަން އިންއިރު، އެއީ ޖިނާހް ވަރަށް އާއްމުކޮށް ކުރާކަމެއްކަން ޝާނީއަށް ޔަޤީންވިއެވެ. ޝާނީ ހައިރާންވެގެން ބަލަން އިންދައި ޖިނާހްއައިސް ގޮށި ދިއްކޮށްލުމުން ލަދުން އިނދެ އޭނާ އޭގައި ހިފިއެވެ. މިހުރިހާއިރު އޭނާ ޖެހިހައި ސަކަރާތެއް ޖިނާހް ބަލަންހުރިކަން ޔަޤީންވުމުން އޭނާ ރަނގަޅަށްވެސް ރަކިވިއެވެ. ޝާނީ ގޮށީގައި ހިފަމުން ލަދުރަކިގޮތަކަށް ހީލުމުން ޖިނާހްވެސް ހިނިތުންވެލިއެވެ.
ޝާނީ އޭނާގެ އުނގުގައިހުރި ލިނބޯތައް ގޮށްޓަށް އެޅުމަށްފަހު، އުނިގަހުގެ ދެކަފިވެފައިވާ ހިސާބުގައި ނުވެއްޓޭނެހެން ގޮށިބޭއްވިއެވެ. އަދި އަނެއްކާވެސް ކަތިވަޅި ނެގުމަށްފަހު ދަރުފެޅުމަށް އަވަސްވެގަތެވެ. ޖިނާހްހުރީތީ ޖެހިލުންވީނަމަވެސް، މަންމަ އަންނަންވާއިރަށް ކޮންމެވެސް ވަރަކަށް ދަރުފަޅަން އޭނާ ބޭނުންވިއެވެ. އޭނާ ފަންތޮށިގަނޑެއް ނަގައި އެނގޭގޮތަކަށް ބުރިކޮށްލުމަށްފަހު އެއްކައިރީގައި ބޭއްވިއެވެ.
އޭނާ ފަހަރަކު ފަންތޮށިގަނޑެއް ގެންގޮސް ފުންޏަކަށް އެއްކުރަމުން ދިޔައެވެ. ފަންތޮށިބުޑުވެސް ފަޅާވެސްނުލައި ހުރިގޮތަށް ގެންގޮސް އެއްކުރާ މަންޒަލުބަލަންހުރި ޖިނާހްއަށް އަނެއްކާވެސް ހެވުނީ ޝާނީއަށް ދަރުފަޅަންވެސް ނޭނގޭކަން އެނގުމުންނެވެ. އެކިދަރުގަނޑުގެ ދިގުމިންވެސްހުރީ އެކިވަރަށެވެ. އެންމެފަހުން ޝާނީއަށް އެކަމުގައިވެސް މަދަދުކޮށްދިނުމަށް އޭނާގެ ހިތްއެދުނެވެ. އެހެންކަމުން ޝާނީގެގާތަށް ގޮސް ކަތިވަޅިދިނުމަށް އެދުނެވެ.
ޝާނީ ހައިރާންވެފައި ބަލަންހުރުމުން އަނެއްކާވެސް ކަތިވަޅިއަށް ޖިނާހް އިޝާރާތްކޮށްލިއެވެ. ޝާނީ ޖެހިލުންވެހުރެ ވަޅިދިނެވެ. ޝާނީގެ އަތުން ވަޅިހޯދައިގެން ޖިނާހް ދަރުފަޅަންފެށިއެވެ. ފަންތޮށިބުޑުތައްވެސް ފަރިތަކަމާއެކު ފަޅާލާ މަންޒަރުބަލަން ޝާނީއަށްހުރެވުނީ އާޝޯޚްވެފައެވެ. ޖިނާހް އަވަސް ހަރަކާތަކާއެކު ދާދި ފަސޭހައިން ދަރުބޮނޑިއެއް ހަމަކޮށްލިއެވެ. ޝާނީ އެއްކޮށްފައިވާ ފަންތޮށިތައްވެސް އަތުން ބުރިކޮށް ހުރިހާ ދަރުތަކެއް އެއްވަރުކުރިއެވެ. އަދި ކައިރި ހިސާބަކުން ދިއްގާގަހެއްގެ ދަނޑިއެއް ކަނޑާލައި ވަކަ ނަގައިގެން، ފާޑުވެރިކަމާއެކު ދަރުބޮނޑި ބަނދެލިއެވެ.
ޖިނާހް ހިންދެމިލަމުން ހިނިތުންވެފައި ޝާނީއަށް ބަލާލުމާއެކު ބޭއިޚްތިޔާރުގައި ޝާނީއަށް ހިނިތުންވެލަމުން ޖިނާހްގެ މޮޅުކަމަށް ސާބަސްދިނުމުގެ ގޮތުން ދެއަތުގެ ބޮޑުވާ އިނގިލި އެއްފަހަރާ ހިއްލާލިއެވެ. ޝާނީ ދަރުބޮނޑި ކައިރިއަށް ޖެހިލާފައި އޭގައި ހިފައި އުފުލާލުމަށް މަސައްކަތްކުރި ނަމަވެސް ބަރުކަމުން ހިއްލޭ ގޮތެއްނުވިއެވެ. އެންމެފަހުން ދަރުބޮނޑި އުފުލަން ޖެހުނީވެސް ޖިނާހްއަށެވެ. ޖިނާހް ދަރުބޮނޑި ކޮނޑަށް ލައިގެން ހިނގައިގަތުމުން ޝާނީ ކުދިލިނބޯ ގޮށްޓާއި ކަތިވަޅި ހިފައިގެން ޖިނާހްގެ ފަހަތުން ނުކުތެވެ.
މައިމަގަށް ނުކުމެވުމުން މަގުގެ އެއްކައިރީގައި ދަރުބޮނޑި ބޭއްވުމަށްފަހު ޖިނާހް ފުންނޭވާއެއް ދޫކޮށްލިއެވެ. ޝާނީ ޖިނާހްއަށް ބަލާލަމުން ޝުކުރުވެރިކަމުގެ ލަދުރަކި ހިނިތުންވުމެއް ހަދިޔާކޮށްލިއެވެ. ޖިނާހްވެސް ހިނިތުންވެލިއެވެ. ކުއްލިއަކަށް މަގުގެ އަވަށާއި ވީކޮޅުން ޝާނީއަށް އޭނާގެ މަންމަ ބަރޯއެއް ހިފައިގެން އަންނަ މަންޒަރު ފެނުނެވެ. އޭނާ ކަންބޮޑުވެގެން ޖިނާހްއަށް އިޝާރާތްކޮށްލުމުން ޖިނާހް އަވަސް އަވަހަށް ކުރިންވެސް ނުކުން ހަނިމަގުން ވަލުތެރެއަށް ވަނެވެ. ޝާނީ ދަރުބޮނޑި މަތީގައި އިށީނދެ ހަމަޖެހިލައިގެން އޭނާގެ އަތުގައިވާ ކުދި ލިނބޯގޮށިން ލިނބޯ ކާލަ ކާލާ އިންދައި އޭނާގެ މަންމަ އަތުވެއްޖެއެވެ.
“ ދަރިފުޅު އަދިވެސް ދަރުފަޅަން ނޫޅެ އިނީތަ؟…އެކަނި ވަންނަން ނުކެރުނީތަ؟…“ ޝާނީގެ މަންމަ އަހާލިއެވެ.
“ މަންމާ މިހާރު ދަރުފަޅާ ނިމުނީއޭ….މަންމައަކަށް ދަރުބޮނޑިއެއް ނުފެނޭތަ؟…“ ޝާނީ އޭނާ އިށީނދެގެން އިން ދަރުބޮނޑިއަށް އިޝާރާތްކޮށްލަމުން ބުނެލިއެވެ.
“ އޭނ؟…އަނެއްކާ ކާކު ދަރުބޮނޑިއެއްތީ؟…މީސްމީހުންގެ އެއްޗެހީގަ ހުއްދަނެތި އިށީނދެ ހަދާކަށް ނުވާނެ….ތެދުވޭ…“ ޝާނީގެ މަންމަ ހިތްހަމަ ނުޖެހިފައި ބުނެލިއެވެ.
“ މަންމާ…މީ ހަމަ އަހަރެންގެ ދަރުބޮނޑިއެކޭ….މީހެއްގެ އެއްޗެއްނޫން…“ ޝާނީ އަވަސް އަވަހަށް ބުނެލިއެވެ.
“ ނުވާނެ އެހެނެއް….މިހާ ރީތިކޮށް ދަރުފަޅާ ދަރުބަންނާކަށް ނޭނގޭނެ ޝާނީއަކަށް….ސަލްމާއާ އެކީދޯ އައިސް ތިއުޅެނީ؟…ކޮބާ ސަލްމާ؟…މިހާރު ގެޔަށް ދިޔައީތަ؟…“ ޝާނީގެ މަންމައަށް އަދިވެސް ގަބޫލެއް ނުކުރެވެއެވެ.
“ ދެން މަންމާ….ދޮންތައަށް އެކަނިތަ އެނގޭނީ ދަރުފަޅަން؟…އަހަރެން ފެޅީމަ މަންމައަށް ކަމުނުދިޔައީތަ؟…“ ޝާނީ ތުން އޫކޮށްލަމުން ޅަކުއްޖެއް ފަދައިން ޝަކުވާކޮށްލިއެވެ.
“ ނޫނޭ ދަރިފުޅާ! މަންމައަށް ހަމަ ގަބޫލުނުކުރެވިގެން މިއަހަނީ؟…މީހަމަ ދަރިފުޅު ފެޅި ދަރުތަ؟…ކޮންއިރަކު ދަރިފުޅު ދަރުފަޅަން ދަސްކުރީ؟…ގައިމު މާލެގަ މިކަހަލަ ކަންކަމެއް ނުކުރާނެދޯ؟…އަނެއްކާ މިހާ ރީތިކޮށް ދަރުބޮނޑި ބަނުމަކީވެސް އަލަން ދަރުފަޅާ މީހަކަށް ފަސޭހަކަމަކަށް ނުވާނެ…ކޮންމެވެސް މީހެއްގެ އެހީގަ މިހެން ދަރުބަންނަން އެނގޭނީ…މަންމަވެސް ފުރަތަމަ ދަރުބަންނަން ދަސްކުރީ މާމަގެ އެހީގަ…“ ޝާނީގެ މަންމަ އޮޅުން ފިލުވައިދިނެވެ.
“ އާނ…އަހަރެން އެކަންޏެއްނޫނޭ….އެއީ ވަލުތެރެއިން ދިމާވި މީހަކު އެހީތެރިވެދިނީ….“ އެންމެފަހުން ޝާނީ ބުނެލިއެވެ.
“ ކޮބާ؟…މަންމައަށް އޭރުވެސް އެނގެޔޭ މިއީ ދަރިފުޅު އަމިއްލައަށް ބަނދެފަހުރި ދަރެއްނޫންކަން….ކާކު އެހީވީ؟..“ ޝާނީގެ މަންމަ އޮޅުން ފިލުވަން ބޭނުންވިއެވެ.
“ މަންމާ…މިރަށުގަ އުޅޭހާ އެންމެނެއް އަހަންނަކަށް ނޭނގެ…މަންމަ ބޭނުމީ ދަރެއްނު…މިއޮތީ ދަރުހޯދިފަ…ދެންވެސް ހިނގާބަލަ އަވަހަށް ގެޔަށްދާން…މިހާރު ވަރަށް ބަނޑުހައިވެސް ވެއްޖެއޭ…“ ޝާނީ އަވަސް އަވަހަށް ވާހަކަ އޮޅުވާލަމުން ބުނެލިއެވެ. އެންމެފަހުން ޝާނީގެ މަންމަވެސް ވާހަކަ ކުރުކޮށްލުމަށްފަހު ދަރުބޮނޑި ބަރޯއަށް ލައިގެން ގެޔަށް ދިއުމަށްޓަކައި ހިނގައިގަތެވެ. ޝާނީވެސް މަންމަގެ ފަހަތުން ހިނގައިގެންފައިވެސް ފަސް އެނބުރި ޖިނާހް ފެނޭތޯ ބަލާލިއެވެ. ނަމަވެސް ޖިނާހް ހިލަމެއްނުވިއެވެ.
މެންދުރު ފަހުގެ ވަގުތެވެ. ސަލްމާ ގެޔަށް އައުމުން މަންމަ ޝާނީ މިއަދު ދަރުފެޅި ވާހަކަބުނެ އޭނާއަށް ނުހަނު ތަޢުރީފުކުރިއެވެ. ޝާނީ އުފަލުންހުރެ މަންމަގެ ވާހަކަ އަޑުއެހިނަމަވެސް، އޭނާއަށް އެތަޢުރީފު ހައްޤުނޫންކަން ހިތުގެ އަޑިން އޭނާ ގަބޫލުކުރިއެވެ. އެހެންކަމުން އޭނާ ހަމަ ހަޤީޤަތުގައިވެސް ރަނގަޅަށް ދަރުފަޅަން ދައްކުރަން ހިތުގައި އަޒުމް ކަނޑައެޅިއެވެ.
“ އެހެންވީމަ މީގެފަހުން ރޯދައަށް ދަރުފަޅަން ދާންޖެހޭނީ ޝާނީ އިނގޭ!“ ޝާނީއަށް ބަލާލާފައި އުފަލާއެކު ސަލްމާ ބުނެލިއެވެ. ޝާނީވެސް ހިނިތުންވެލަމުން ބޯޖަހާލިއެވެ.
“ ދޮންތާ….އަސްލު އަހަންނެއް ނޫނޭ ދަރުފެޅީ…އަހަންނަށް މީހަކު އެހީވެދިނީ…ދޮންތަ އަހަންނަށް އެގޮތަށް ދަރުފަޅަން ދަސްކޮށްދެއްޗޭ!…“ ސަލްމާއާއެކު އެކަނިވުމުން މާޔޫސްކަމާއެކީ ޝާނީބުނެލިއެވެ.
“ މައްސަލައެއްނެތް…ދޮންތަ ވަލަށްދާއިރުން ބުނާނަން…އޭރުން ދެމީހުން އެކީގަ ގޮސް ދަރުފަޅާނީ…“ ހިނިތުންވެލަމުން ސަލްމާބުނެލިއެވެ.
“ ތެންކިޔޫ…“ އުފާވެފައި ޝާނީބުނެލިއެވެ.
“ ކާކުތަ ދަރުފަޅައިދިނީ؟…“ ކުއްލިއަކަށް ސަލްމާ އަހާލިއެވެ.
“ އެއީ އެހެންދިޔަ މުސްކުޅި ދައްތައެއް….އަހަރެން އުޅޭ ހާލުފެނިގެން އެހީވީ…ނޭނގެ ކާކުކަމެއް…“ ހަޤީޤަތަށް ބުނަން ނުކެރިގެން ޝާނީ ދޮގެއް ހަދާލިއެވެ.
*****
ޖެހިގެން އައި ދުވަހުގެ ހަވީރުގެ ވަގުތެވެ. ގޭތެރޭގެ މަސައްކަތުން އަވަދިވެގެން ފެންވަރައި ހަވީރުގެ ފިންޏަށް ނުކުމެ މަދު މީސްކޮޅުން ކޮޅުކޮޅު މައްޗަށް ހޭލަމޭލަ ވާތީ ފެނެއެވެ. ޝާނީވެސް ނަލަހެދިގެން ސަލްމާމެންގެ ގެޔަށް ދިއުމަށްޓަކައި މިސްރާބު ޖެހިއެވެ. އޭނާ މިވަގުތު އެގެއަށްދާން ގަސްތުކުރީ ސަލްމާ ދެކެލުމުގެ ބޭނުމަކު ނޫނެވެ. އެހެނަސް ޖިނާހްގެ މޫނު ދެކިލުމަށެވެ. އެހިނިތުންވުމުން އުފާހާސިލް ކޮށްލުމަށެވެ. ޝާނީ މަޑު ހިނގުމެއްގައި ގޮސް ސަލްމާމެންގެ ގެޔަށް ވަތްއިރު، ގޭތެރެއިން މީހެއްގެ ހިލަމެއް ނުވެއެވެ. އޭނާ ސަލްމާ އުޅޭ ކޮޓަރިއާ ދިމާއަށް މިސްރާބު ޖަހާފައިވެސް ހުއްޓިލީ ގޯތިތެރޭގައިވާ މާބަގީޗާގައި ފޮޅިފައިވާ ފިޔާތޮށި ފިނިފެންމާ ކޯޅިފެނުމުންނެވެ. އޭނާ އުފަލުން ގޮސް ފިނިފެންމާ ގަހުގައި އިން އެންމެ ބޮޑުމާ ބިނދެލިއެވެ. އަދި ވަސްބަލާލަމުން ދެލޯމަރާލިއެވެ.
“ ވާއު…ހާދަ މީރުވަސްދުވައޭ…“ ދެތިން ފަހަރަލު އޭނާ ނޭވާ އެތެރެއަށް ދަމާލިއެވެ. އޭނާ ހިތްފުރޭވަރަށް މަލުން ވަސް ބެލުމަށްފަހު، ބޮލު އިސްތަށިގަނޑުގައި މާ ހަރުކޮށްލިއެވެ. އަދި މާގަސްތަކުގެ ތެރެއިން އަސުރުމާ ގަހަކުންވެސް ދެމާ ބިނދެލުމަށްފަހު، އެވެސް ފިނިފެންމަލާއެކު ބޮލުގައި ހަރުކޮށްލިއެވެ. އަދި އުފަލުންހުރެ ގޭތެރެއަށް ދިއުމަށް މިސްރާބުޖެހިއެވެ. އެވަގުތު ދޮރުމަތީގައި ހިނިއައިސްފައި އޭނާގެ ހަރަކާތްތަކަށް ބަލަންހުރި ޖިނާހް ފެނިފައި އޭނާއަށް ހުއްޓެވުނެވެ. ޖިނާހް ބަލަންހުރި ގޮތުން އޭނާ ރަކިވާގޮތްވިއެވެ. ލަދުންހުރެ އޭނާ އިސްއުފުލާ ބަލާލި ވަގުތު އޭނާގެ އިސްތަށިގަނޑަށް އިޝާރާތްކޮށްލަމުން ރީތިކަމުގައި ޖިނާހް ބުނެލިއެވެ. ދެމީހުން އެކަކު އަނެކަކަށް ހަމަހިމޭންކަމުގެ ބަސްމޮށުމަކުން މެސެޖްތައް ފޯރުކޮށްދީދީ ތިއްބައި ކުއްލިއަކަށް ސަލްމާ ގޭތެރެއިން ނުކުންނަމުން ދޮރުކަނީގައި ލެނގިލައިގެން ހުރި ޖިނާހްގެ ކޮލީގައި ކޮށްޓާލުމާއެކު ސިހިފައި އޭނާ ދުރަށްޖެހިލިއެވެ. އެއާއެކު ސަލްމާ ހޭންފަޅާފައި ޖިނާހްގެ ކޮނޑުގައި ބޮނޑިއެއް އަޅާލިއެވެ. ޖިނާހްއަށް ވީގޮތުން ޝާނީއަށްވެސް ހެވުނެވެ.
“ އަހަނ ތިއައީދޯ…އަދި މަ މިއުޅުނީ މާމީރުއެއްޗެއް ހަދައިގެން ޝާނީ ބަލާދާންވެގެން…“ ޝާނީ ފެނުމާއެކު ސަލްމާ ބުނެލިއެވެ. ޖިނާހް އަވަސް އަވަހަށް ނުވާކަމަކަށް ހަދާފައި އެތަނުން ދިއުމަށްޓަކައި ހިނގައިގަތެވެ. އެވަގުތު ސަލްމާ ޖިނާހްގެ އަތުގެ މުލައްދަނޑީގައި ހިފައި އޭނާއާއެކު އައުމަށް އެދުނެވެ. ދެމީހުން ގޮވައިގެން ސަލްމާ ގޯތީގެ ބިއްދޮށުފަރާތަށް ގޮސް، ހިޔާބޮޑު ބަނބުކެޔޮ ގަސްދޮށުގައިވާ ޖޯލިފަތީގައި އިށީނުމަށް ބުންޏެވެ.
“ އަހަރެން ބޭނުމީ އުނދޯލީގައި އިންނަން..“ ބަނބުކެޔޮ ގަހުގައި އެލުވާފައިވާ ޖޯލި އުނދޯއްޔާ ދިމާއަށް ދުއްވައިގަންނަމުން ޝާނީ ބުންޏެވެ. އެވަގުތު ޖިނާހްވެސް ޖޯލިން ތެދުވެގެން ގޮސް ޝާނީ އިން އުނދޯއްޔާއި ދާދިގާތުގައިވާ އެހެން އުނދޯއްޔެއްގައި އިށީނެވެ.
“ މިމީހުނަށް މާކަމުދާ އެއްޗެއް މިއުނދޯއްޔަކީ….މަގޭ ބޯއަނބުރައިގަނޭ މީހަކު ހެއްލާތީ ފެނުނަސް…“ ސަލްމާ ކުދި ކިޔަމުން ގޮސް ބަދިގެޔަށް ވަނެވެ.
“ ބޮޑުބެ ދައްތާ…ކޮބާތަ މިހާރު އެ ބޮނޑިބަތްތެލި…“ ސަލްމާ ބަދިގެ ތެރޭގަ އޮވެފައި ގޮވާ އަޑުއިވުމުން ޝަކީލާ ނުކުތެވެ.
“ ބޮނޑިބަތްތައް ތައްޓަކަށް އަޅާފަ ތެޅުފެނުއަޅައިފިން….ކުޑަކޮށް ތެލީގެ ފުލުގަ ހިފާފަހުރީމަ އަވަހަށް ފެނުއެޅީ…“ ބަދިގެ ދޮރުމައްޗަށް އަރަމުން ޝަކީލާ ބުނެލިއެވެ.
“ އެހެންތަ؟..އެޔޭ މިހޯދަނީ…މިތިބަ ދެމީހުންނަށް މާމީރު އެއްޗެއްނު އެއީ….އެހެންވެ ދޭންވެގެން…“ ޝާނީއާއި ޖިނާހްއަށް އިޝާރާތްކޮށްލަމުން ސަލްމާ ބުނެލިއެވެ.
“ އަނހާ…ޝާނީ ކޮންއިރަކު އައީ…އަދި ދައްތައަށް ޝާނީ އިންކަމެއް ނޭނގެޔޭ….ޖިނާހްވެސް ކޮންމެވެސް ތާކަށް ދާށޭ ބުނެފަ ނުކުތީ…މިހާރު މިއިނީ…“ ޖިނާހް އާ ޝާނީ ފެނުމުން ހިނިތުންވެލަމުން ޝަކީލާ ވާހަކަދެއްކިއެވެ.
“ ހޫމް…ދާން އުޅެނިކޮށް ހިފަހައްޓާފަ އެހުރީ…މަ މެންދުރު ބަނބުކެޔޮ ކޮށަން ފެށީއްސުރެ ބޮނޑިބަތް ކެކޭނެ އިރެއްގެ އިންތިޒާރުގަ ކުރުކާލި ކަނޑާލަ ކަނޑާލާ އެސޮރު ހުރީ…“ ސަލްމާ ބަދިގެތެރޭގަ ހުރެގެން ވާހަކަދެއްކިއެވެ. ސަލްމާ ދެތައްޓަށް ބޮނޑިބަތް އަޅައިގެން ގެނެސް ޝާނީއަށާއި ޖިނާހްއަށް ދިނެވެ.
“ ހޫމް…ވަރަށް މީރުވަސްދުވާ…މިހާރުވެސް ކުޅުދިޔާވެއްޖެ…“ ބޮނޑިބަތްތަށީގެ ވަސްބަލާލަމުން ޝާނީ ބުނެލިއެވެ.
“ އަދި މި މަންޖެ ކޮންމެ ކާއެއްޗެ ވަސްބަލާނެ…އަން މިހުރީ ވަޅޯމަސް….ދެމީހުން ބޮނޑިބަތް ކައި….ދޮންތަ މިދަނީ ފެންވަރަން…“ ސަލްމާ ގޭތެރެއަށް ވަންނަމުން ބުނެލިއެވެ.
“ ސަލްމާ ކައްކާ ބޮނޑިބަތް ވަރަށް މީރުވާނެ…ޝާނީވެސް ވާނެ އެގޮތަށް ބޮނޑިބަތް ކައްކަން ދަސްކުރަން…“ ޝަކީލާ ހީލާފައި ބުންޏެވެ. އަދި ޖިނާހްއަށް ބަލާލަމުން ބޮނޑިބަތް ކިހިނެއްތޯ އަހާލިއެވެ. ޖިނާހް ކަނާއަތުގެ ބޮނޑުވައި އިނގިލި ހިއްލާލަމުން އެއްވަނަ ކަމުގައި ބުނެލިއެވެ. ޝަކީލާވެސް އިރުކޮޅަކު އެތާނގައި ވާހަކަދައްކަން އިނުމަށްފަހު ގޭތެރެއަށްވަނެވެ. ސަލްމާވެސް ފެންވަރާ ސާމާނު ހިފައިގެން ނުކުމެ، ބަދިގެޔާއި ތަންކޮޅެއް ދުރުގައިވާ ގިފިއްޔަށްވަނުމުން ޝާނީއާއި ޖިނާހް އެކަނިވިއެވެ.
މަޑުހެއްލުމެއް ހެއްލަމުން ތިބެ ދެމީހުންވެސް ބޮނޑިބަތް ކަމުން ދިޔައެވެ. އެމީހުންގެ ކުރިމަތީގައިވާ ކުޑަ އައްޓެއްގެ މަތީގައިހުރި މަސްތަށިން ޝާނީ ވަޅޯ މަސްކޮޅެއް ނަގައިގެން އައިސް ކާންފެށުމާއެކު މަސްކޮޅު ވެއްޓިއްޖެއެވެ. އެވަގުތު ޖިނާހް ކާންނެގި މަސްކޮޅު ޝާނީއަށް ދިއްކޮށްލިއެވެ. ޝާނީ ނޫނެކޭ ބުނެ ދެފަރާތަށް ބޯހޫރާލި ނަމަވެސް ޖިނާހް އާދޭސްކޮށްލާފަދަ ގޮތަކަށް މޫނަށް ވައްތަރެއް ޖައްސާލަމުން ޝާނީ ހިނިތުންވަމުން މަސްކޮޅުގައި ހިފަން އަތްދިއްކޮށްލިއެވެ. ނަމަވެސް ޖިހާން ޝާނީގެ އަތަށް ދޭކަށް ގަސްތެއްނުކުރިއެވެ. އޭނާ އެދުނީ ޝާނީގެ އަނގަހުޅުވުމަށެވެ.
ޝާނީ ޖެހިލުންވެ އިނދެ ކުޑަކޮށް އަނގަހުޅުވާލުމުން، ޝާނީއިން އުނދޯލީގެ ވާގަނޑުގައި ހިފަމުން ޖިނާހް ޝާނީގެ ގާތަށް ޖެހިލިއެވެ. އަދި ވަރަށް ލޯބިން ޝާނީގެ އަނގައަށް މަސްކޮޅު ލެވިއެވެ. އެވަގުތު ޖިނާހް އިންލެއް ގާތްކަމުން ޝާނީގެ ހިތުގެ ވިންދު ދެގުނައަށް އަވަސްވެގެން ދިޔައެވެ. ޖިނާހް އެހާގާތުގައި އިނުމުން އޭނާއަށް މަސްކޮޅު ދިރުވާލެވުނީވެސް ރަނގަޅަށް ހަފާ ނުލައެވެ.
އެވަގުތު އޭނާގެ ކަރުގައި އަޅައިގަތެވެ. ޝާނީއަށް ނޭވާނުލެވި ހާސްވާގޮތްވުމުން ޖިނާހްއަށް އެކަން އެނގި އަވަސް އަވަހަށް ތެދުވެ ހަލުވިކަމާއެކު ބަދިގެއަށް ވަދެ ފެންތައްޓެއް ހިފައިގެން ނުކުމެ ޝާނީގެ ގާތަށް އައެވެ. އަދި އޭނާގެ އަތުން ޝާނީގެ ތުނބުގައި ފެންތަށި ޖެއްސިއެވެ. ޝާނީ އަވަސް އަވަހަށް ދެތިންކޯވަރު ފެން ދިރުވާލުމާއެކު މަސްކޮޅު ކަރުން ނެއްޓިއްޖެއެވެ. އޭރު އޭނާގެ ލޯވެސްހުރީ ފެންކަޅުވެފައެވެ. ޝާނީ ޖިނާހްއަށް ބަލާލިއިރު، އޭނާހުރީ ނުހަނު ކަންބޮޑުވެފައެވެ. އޭނާ ދެތިން ފަހަރަކު ޝާނީ ހަމައަކަށް އެޅުނުތޯ އަހައި ޔަޤީންކުރިއެވެ.
ޖިނާހް އައިސް އުނދޯލީގައި އިށީނދެ އަނެއްކާވެސް ބޮނޑިބަތްކާންފެށިއެވެ. ދެމީހުން ހަމަހިމޭންކަމާ އެކީ ކާންތިބި ނަމަވެސް ސިއްރު ސިއްރުން އެކަކު އަނެކަކަށް ބަލާލައެވެ. އެހެންތިބިއިރު، ދެމީހުންގެ ހިތުގައިވެސް ލައްކަގިނަ ޚިޔާލުތައް ހިނގަމުން ދިޔައެވެ. ވޭތުވެދިޔަ މަދު ދުވަސްކޮޅުގެ ތެރޭގައި ދެމީހުން ބައްދަލުވީ ތަފާތު ބައްދަލުވުންތަކުގައި ޖިނާހްގެ ފަރާތުން ޝާނީއަށް ފެނުނު ސިފަތަކުގެ ސަބަބުން އޭނާގެ ހިތްދިޔައީ ދުވަހެއް ދުވަހަކަށް ޖިނާހް ލެނބެމުންނެވެ. ހަމައެފަދައިން ޝާނީގެ ފަރާތުން ފެންނަ އަދާތަކުގެ ސަބަބުން ޖިނާހްގެ ހިތްވެސް ދިޔައީ ހިނދެއް ހިނދަކަށް ޝާނީގެ މައްޗަށް ފިދާވަމުންނެވެ. އެގޮތުގައި މުޅި އުމުރަށްވެސް ޝާނީ ފެންނަ ހިސާބުގައި ވުމަށް އޭނާގެ ހިތް އެދެއެވެ. ޝާނީއާއި އެކު ހޭދަވާ ކޮންމެ ހިނދުކޮޅަކީ އޭނާގެ ހަޔާތަށް އިތުރުވާ ކުލަ ތަސްވީރެކެވެ.
“ އަދިވެސް ކައި ނުނިމެނީތަ؟…ކަލޭމެން ތިކަނީކީނޫންދޯ…ސަމްސަލުގަ ދޫލާލާ ތިބެނީ…ހުސްވެދާނެތީ…އެހެންޏާ މިހާރު ބައިގަޑިއިރުވީ ތި ކާލަ ކާލާ ތިބޭތާ…؟“ ފެންވަރައިގެން ގިފިލިން ނުކުތް ސަލްމާއަށް ޝާނީއާއި ޖިނާހް އަދިވެސް އުނދޯލީގައި ބޮނޑިބަތްކާން ތިބި މަންޒަރުފެނިފައި ފަތިވަރެއް އަމުނާލިއެވެ.
“ މިހާރު މިނިމުނީއޭ….ދޮންތަ ގިފިލީގަ އުޅޭތީ ތަށި ނުދޮވެވިގެން މިއިނީ…“ ޝާނީ އަވަސް އަވަހަށް ބުނެލިއެވެ.
“ ކޮންތާކު؟…އެހުރީ ތަށިދޮންނަން ފެންއަޅާފަހުރި ފެންހަން…ތިތަށިދޮންނަހާ ފެން އޭގަ އެބަހުރިހެން ހީވަނީ…“ ތަށިދޮވުމަށްޓަކައި ފެންއަޅާފައި އިސްކޫރުލައިފައިވާ ބޮޑުހަމެއް ދައްކާލަމުން ސަލްމާ ބުނެލިއެވެ.
“ ދޮންތާ…ދެން އަހަރެން މިތާ އިނދެގެން ލަސްވެގެން ޝަކުވާކުރަންޏާ ހިނގައިދާނަން ގެޔަށް….މިގެޔަށް ނަޔަސް އެވަރު އަޔަސް އެވަރު…“ ޝާނީ އުނދޯލިން ތެދުވަމުން ކުދިކިޔަން ފެށިއެވެ.
“ ހޫމް…އެޖެހުނީ ބޮޑުތާ….މަ އެބައުޅޭތަ ޝާނީ މިތާ އިނދެގެން އުނދަގޫވެގެން….އިނދެބަލަ!…ތި އުނދޯލި ހެއްލާނެ ވަރަކަށް ހެއްލަން އިނދެބަލަ!…މަ މިދަނީ… އަދި މިއުޅެނީ އަސުރު ނަމާދުވެސް ނުކޮށް….“ ބޮލުން ފެން ހިއްކާލުމަށްފަހު، ގިފިލި ކައިރީގައިހުރި ރޯނެއްގައި ތުވާލި އަޅާލަމުން ސަލްމާ ބުންޏެވެ. އަދި މަޑުކޮށްލުމެއްނެތި ގޭތެރެއަށް ވަދެގެން ދިޔައެވެ. ޝާނީވެސް އޭނާ ކެއި ތަށިދޮވުމަށްފަހު ބަދިގެއަށް ތަށިލާފައި ނުކުތްއިރު ޖިނާހްވެސް އުނދޯލިން ތެދުވެގެން ތަށިދޮވުމަށްޓަކައި އަންނަނީއެވެ.
“ ގެނޭ އަހަރެންގެ އަތަށް..“ ޖިނާހްގެ އަތުގައި އޮތް ތައްޓަށް އިޝާރާތް ކުރަމުން ޝާނީ އެދުނެވެ. ޖިނާހް ހިނިތުންވެލާފައި ޝާނީގެ އަތަށް ތަށިދިނެވެ. ޖިނާހް ބޭރަށްދާން ހިތަށްއަރާފައިވެސް ޝާނީ އެގޭގައި ހުރުމުން މަޑުކުރަން ނިންމިއެވެ. އޭނާ ފެންފޮދެއް ބޯލައިގެން ގޮސް ކުޑައަށިމަތީގައި ހުރި ދުފާފޮށިން ދުފާލައިގެން ގޮސް އަނެއްކާވެސް ޖޯލި އުނދޯލީގައި އިށީނދެ ހެއްލަން ފެށިއެވެ. ޝާނީވެސް ދުފާނަމޭ ހިތައި ފޯއްވަޅި ނަގައިގެން ފޯއްކޮޅެއްކޮށް އުޅުނު ވަގުތު، ފޯއްކިބަ ނައްޓައިގެން ދިޔަ ބޮނޑީގައި އޭނާގެ އިނގިލި ކެނޑުނެވެ.
“ އާހް….“ ލިބުނު ސިހުމުގައި ފޯއްވަޅިވެސް އެއްލައިލެވިއްޖެއެވެ.
އެމަންޒަރު ބަލަން އިން ޖިނާހް ފުންމައިގެން ތެދުވެ ޝާނީގެ ގާތަށްއައެވެ. ކައިރީގައިހުރި ޖޯލީގައި ޝާނީ ބޭންދުމަށްފަހު އޭނާ ދުވެފައި ގޭތެރެއަށްވަދެ، ފަސްޓްއެއިޑް ފޮއްޓެއް ހިފައިގެން ނުކުތެވެ. އެއީ އޭނާ މާލޭގައި އުޅުނުއިރުން ފެށިގެން ގެންގުޅޭ ފޮއްޓެކެވެ. ފަސްޓްއެއިޑް ފޮށި ހުޅުވާލުމަށްފަހު އެއިން ކަފަކޮޅެއް ނަގައި އޭގައިވާ ޑިޓޯލްފުޅިއަކުން އެތިފޮދެއް އަޅައި ކަފަކޮޅު ތެންމާލުމަށްފަހު ޝާނީގެ އިނގިލި ދެއްކުމަށް ބުންޏެވެ.
ޝާނީއަކީ އަބަދުވެސް ބޭސްއަޅަން ބިރުގަންނަ ކުއްޖެކެވެ. ޑިޓޯލް ޖެހުމުން ކަނޑައިގެން ގޮސްފައިވާތަނުން ދިލަނަގާނެ ވަރު ހިތަށްއެރިޔަސް އޭނާގެ ގައިން ހީބިހި ނަގައެވެ. ޝާނީ ނުދައްކަން އުޅެނިކޮށްވެސް ގަދަކަމުން ކަހަލަ ގޮތަކަށް ޖިނާހް ޝާނީގެ އަތުގައި ހިފައި އޭނާގެ އިނގިލިން ކަނޑައިގެންގޮސްފައިވާތަން ބަލާލިއެވެ. ނަސީބަކުން ބާބޮޑަކަށް ކަނޑައިގެނެއް ނުދެއެވެ. އެހެންނަމަވެސް ޝާނީ އިނީ ބިރުން ދެލޯމަރައިގެންނެވެ. އެހެންކަމުން ޖިނާހް ޑިޓޯލް ކަފަކޮޅުން ސާފުކުރަމުން ޝާނީގެ އިނގިއްޔަށް ފުމެމުން ދިޔައެވެ.
ސާފުކޮށް ނިމުމުން، ބޭނުންކޮށް ހުސްވާން ގާތްވެފައިވާ ބޭސްފުޅިއަކުން ބޭކޮޅެއް އިނގިލީގައި ހާކާލުމަށްފަހު، ގޯޒްފޮތިކޮޅެއްނަގައި އިނގިލީގައި އޮޅާލައި ރީތިކޮށް ބަނދެލިއެވެ. ބޭސްއަޅައި ނިމުނުކަން ޔަޤީންވުމުން ޝާނީ ލޯހުޅުވާއިރު ހިނިތުންވެފައި ޖިނާހްއިނެވެ. ޝާނީ އިސްޖަހާލުމުން ޖިނާހް ހިނތުންވެލާފައި ދުފާފޮށިން ފޯއްވަޅި ނަގައިގެން ފޯއްކޮށައި ބިލެއްކޮޅަކަށް އަޅާފައި ޝާނީގެ އަތަށްދިނެވެ. އަދި އިތުރު އެއްޗެއް ބޭނުންތޯ އެހުމުން ޝާނީ ނޫނެކޭ ބުނުމުން ފަސްޓް އެއިޑް ފޮށި ހިފައިގެން ގޭތެރެއަށް ވަނެވެ.
“ މަގޭވެސް މޮޔަކަން….ވެއްޖެވިއްޔަ ނޭނގޭއިރުވެސް ފޯއްކޮށަށް އުޅެން…މާ ދުފާ މީހަކަށްވެގެން…“ ޝާނީ އަމިއްލަ ނަފްސަށް އަޑުލައިގަތެވެ. އެއްވެސް ކަމެއް ރަނގަޅަށް ކުރަން ނޭނގުމުގެ ސަބަބުން ޖިނާހްގެ ކުރިމަތީގައި އޭނާ ބޭޒާރުވަމުންދާނީ އަމިއްލަ ނަފްސުދެކެ އޭނާ ރުޅިވެސް އައެވެ. ޖިނާހްއަށް ކޮންމެ ކަމެއްވެސް އެހާމޮޅަށް އެނގެނީ ކީއްވެބާއޭ އޭނާގެ ހިތަށް އަރަމުން ދިޔައެވެ.
“ އޭތް އަދިވެސް އިނީތަ؟…ކިހިނެއްވެފަ ތިއިނީ؟….“ ސަލްމާ ގޭތެރެއިން ނުކުތްއިރުވެސް ޝާނީ އެތާ އިނުމުން އެހިއެވެ.
“ ކަމެއްނުވޭ…“ ޝާނީ އޭނާގެ އިނގިލި ފޮރުވަމުން ބުނެލިއެވެ.
“ ހިނގާބަލަ މާމަގެޔަށްދާން….މާމަޔަށް ބޮނޑިބަތްކޮޅެއްދޭން ޖެހެޔޭއެބަ….ކުރިން ދުވަހުވެސް ދޮންތަ ދިޔައީމަ މާމަ ވަރަށް ޝަކުވާކުރި ޝާނީ ނާންނާތީ…ބުނި މިރަށުގަ އުޅޭތާ އެހާ ދުވަސްވީއިރުވެސް މާމަ ދެކެލަންވެސް ނާދެޔޯ…“ ތައްޓަކަށް ބޮނޑިބަތް އަޅަމުން ސަލްމާ ވާހަކަދެއްކިއެވެ.
“ ދޮންތައަށްވެސް އެނގެއެއްނު އަހަރެން ކީއްވެގެންކަން އެގެޔަށް ނުދަނީ….“ ތުންއޫކޮށްލަމުން ޝާނީ ބުންޏެވެ.
ނުނިމޭ- ވާހަކަ ކަމުދިޔަ ނަމަ fenvaru.mv ގެ އެފްބީ ޕޭޖަށް ލައިކެއް ދެއްވާ. އަދި ވާހަކަ ޝެއަރ ކޮށްލަދެއްވާ.
