ޝައިންގެ- ވަފާތެރި މަވީމޭ- 09 ވަނަބައި
“ ހޫމް…ހިނގާ އަވަހަށްދާން…މިހާރު އިރުއޮއްސެއްވެސް ގާތްވެއްޖެ…އަދި ހާރިޝް އަންނަން ވާއިރަށް އަންނަން ޖެހޭނެ…“ ސަލްމާ ބޮނޑިބަތްތަށި ހިފައިގެން ނުކުމެ ބުނެލިއެވެ.
“ ދެން ދޮންތަ އެކަނި ދޭބަލަ!…އަހަރެން ނުވޭ އެއަރީފް ގަނޑު އުޅޭހާ ހިނދަކު ދާހިތެއް..“ ގެއިން ނުކުމެ ހިނގައިގެންފައިވެސް ޝާނީ ބުނެލިއެވެ.
“ ބޮޑުބޭބެ އެސޮރު މަންމަޔާ އިނީމަ، ދެން އެސޮރުވެސް އުޅޭނީ އެގޭގައެއްނު….އެހެނޭ ކިޔާފަ އަހަރެމެން އެގެޔަށް ނުދިޔައީމަ ކާފަޔާ މާމަ ކިހާ ދެރަވާނެ…..“ ވިސްނައިދިނުމުގެ ގޮތުން ސަލްމާ ބުނެލިއެވެ.
“ ދެން ކީއްވެތަ މާމަމެން އަހަރެމެން ގެޔަށް ނާންނަނީ…“ ސަލްމާއާ އެކުގައި ދިއުމަށްޓަކައި ހިނގައިގަންނަމުން ޝަކުވާގެ ރާގެއްގައި ޝާނީ އެހިއެވެ.
“ މާމަޔާ ކާފަޔާ އެންމެ ލޯބިވަނީ ބޮޑުބޭބެ ދެކެއެއްނު….އެހެންނޫނަސް ބޮޑުބޭބެ ކަހަލަ ފޯރާ މީހަކަށްދޯ އެމީހުންނަށް ކާންބޯންދީ ޚަރަދުކޮށް ހެދޭނީ…އެހެންވީމަ އެމީހުންނަށް އުޅެން ބޭނުންވާނީ އެތާއެއްނު…“ ސަލްމާ އޮޅުން ފިލުވައިދިނެވެ.
“ އެކަމު އެއަރީފްގަނޑު ނޫޅޭނަމަ…“ ޝާނީ ހުރީ އަރީފްމަތިން ހަނދާންވެ ރުޅިގަދަވެފައެވެ. އަރީފްއަކީ ޝާނީއަށް އެކިގޮތް ގޮތުން ގޯނާކޮށް ހަދާ ގޮތްކުޑަ ފިރިހެނެކެވެ. އުމުރުން ޝާނީއަށްވުރެ ބާރައަހަރު ދޮށީނަމަވެސް އޭނާ ޝާނީއާމެދު ކޮއްކޮއެއްގެ ނަޒަރަކުން ނުދެކެއެވެ. ޝާނީ ނުހަނު ކުޑައިރުންސުރެ އަރީފްގެ ގޯނާތައް އޭނާއަށް ލިބެމުން ދެއެވެ. އެހެންކަމުން ޝާނީ ހުންނަނީ އެގެޔަށްދާން ޖެހިލުންވެފައެވެ.
“ ހޫމް…ދެން ހަމްޒާ އަތުއްވެއްޖެއްޔާ މިގެޔަށްވެސް އާދެވޭ ކަމަކަށްނުވޭ ޝާނީއަށް…“ ޖެއްސުން ކޮށްލުމުގެ ގޮތުން ސަލްމާ ބުނެލިއެވެ.
“ އަނެއްކާ އަނެކަކުގެ ވާހަކަ ތިފެށީ….ހާދަ ފޫހިވާ އިންސާނެކޭ އެވެސް….މާލެއިންވެސް މަ ފެނިއްޖެއްޔާ ހީވަނީ ރޮލުން ކާލަފާނެހެން….ނަސީބެކޭ ހިތަށްއަރާ މަދުން ފެންނަކަންވެސް….“ ހަމްޒާގެ މަތިން ހަނދާންވުމުން ފޫހިވެފައި ޝާނީ ބުނެލިއެވެ.
“ ދެން ހަމަ ހަމްޒާވެސް ތިބުނާހާ ގޯހީތަ؟…ރައްޓެހިވާން އެހީމަ އަންނަހާ ރުޅިދޯތިއީ؟…“ ޝާނީ އިތުރަށް ރުޅިއަރުވާލުމުގެ ގޮތުން ސަލްމާ ބުންޏެވެ.
“ އާނ…ވަރަށް ފޫހިވޭ…އޭނަ ލަދެއްވެސް ނުގަނޭދޯ އަހާކަށްވެސް….މަ އޭނާއަށް ބޭބެއޭ ކިޔަނީވެސް….އަދި މަ ގުރޭޑް އަށަކަށް ދިޔަތަނާ އެހީ….އެހާކުޑައިރު މީހުނާ ރައްޓެހިވޭތަ…އޭގެފަހުން އޭނަ ހާރިޝްބެޔާއެކީ އެގެޔަށް އަޔަސް މަ ނުވެސް ނުކުންނަން….“ ރުޅިއައިސްފައި ޝާނީ ބުނެލިއެވެ.
“ އަބަދަލު ފިލައިގެންވެސް ނޫޅެވޭނެދޯ އެކަމު….އެބައުޅޭ ހަމްޒާ ރަށަށް އަންނަން….ހާރިޝް އެކޮޅަށް ދާތަނުން ހަމްޒާ އަންނާނެ…“ ސަލްމާ އޮޅުން ފިލުވައިދިނެވެ.
“ ދެން ދޮންތަމެން ގެޔަށް ދިއުންވެސް ހުއްޓާލަންވީ…..“ ފޫހިވެފައި ޝާނީ ބުނެލިއެވެ.
“ ދެން ހަމްޒާއާ އިނދެގެން އެއްކޮށް އަންނަންވީނު….އެއީ މާރަނގަޅުގޮތެއްނު…އަހަރެން ކިހާ ފޫހިފިލާނެ އޭރުން…“ ސަލްމާ އަނެއްކާވެސް ބުނެލިއެވެ.
“ ނޫޅެން….ދުވަހަކުވެސް ނީންނާނަން އެ ހަމްޒާއަކާ….“ ކުއްލިއެއް ޖަހާލަމުން އަޑަށް ބާރުލާފައި ޝާނީ ބުނެލިއެވެ.
“ ތިހެން ނުބުނޭ….ގިނަފަހަރަށް ނީންނާނަމޭ ބުނާ މީހާއާ އިންނަން ޖެހޭނީ…“ ހެމުން ހެމުން ސަލްމާ ޝާނީއާ ދިމާކޮށްލިއެވެ. ދެކުދިން އެގޮތުގައި ހީ ސަކަރާތް ޖަހަމުން ދިޔައިރު، އެމީހުންގެ ފަސްފަހަތުން ޖިނާހްވެސް އާދެއެވެ. އޭނާ ކެމެރާ ކޮނޑުގައި އަޅުވާލައިގެން އެދަނީ އިރުއޮއްސޭ މަންޒަރު ފޮޓޯނެގުމަށް ގަސްތުކޮށްގެންނެވެ. އެހެން ދަމުން ދަމުން ސަލްމާއާއި ޝާނީގެ ފޮޓޯވެސް އޭނާގެ ކެމެރާގައި ގައިދުކޮށްލިއެވެ.
******
ދުވަސްތައް ފާއިތުވަމުން ދާވަރަކަށް ޖިނާހްއާއި ޝާނީއާއި ބައްދަލުވާ ވަގުތުތައް ގިނަވެ، ދެމީހުންގެ މެދުގައި ހަމަހިމޭންކަމުގެ ބަސްމޮށުންތެރިކަން ބަދަލުވަމުން ދިޔައެވެ. ހަވީރުގެ ވަގުތުގައި ނަލަހެދިގެން ގިނަ ގިނައިން ސަލްމާގެ ގެޔަށް ޝާނީ ދާންފެށިއެވެ. އަދި ކޮންމެ ދުވަހަކުވެސް ސަލްމާގެ ގޭގެ މާބަގީޗާއެއް މަލެއް ބިނދެ އޭނާގެ އިސްތަށިގަނޑުގައި ޖަހައެވެ. ހަމައެފަދައިން ޖިނާހްވެސް ޝާނީ އަންނާނެ އިރަކަށް އިންތިޒާރު ކުރެއެވެ. ޝާނީ ނައިސް އެއްދުވަސް ވެސް ގޮސްފިނަމަ ޖިނާހްވެސް ޝާނީގެ ގޭދޮށުން ކުރުކާލި ކަނޑައެވެ. ދެމީހުންކުރެ އެކަކުވެސް ފާޅުގައި ލޯބި ހާމަ ނުކުރިނަމަވެސް، ދެމީހުންގެ ހިތުގައިވެސް އަނެކަކަށްޓަކައި އޮންނަ ޝައުޤުވެރިކަން ދިޔައީ ދުވަހެއް ދުވަހަކަށް އިތުރުވަމުންނެވެ.
ރޭގަނޑުގެ ވަގުތެވެ. އިޝާނަމާދަށްފަހު ލަސްތަކެއްނުވެ ރަށުގެ ގިނަމީހުން ނިދައެވެ. ޒަމާނަކީ ސައުވީސް ގަޑިއިރު ކަރަންޓް ހުންނަ ޒަމާނަކަށް ނޫނެވެ. ކަރަންޓް ހުންނަނީ އިރުއޮއްސި ހަޔަކުން ރޭގަނޑު އެގާރައަށެވެ. އެހެންކަމުން ކަރަންޓްގެ ޚިދުމަތްލިބޭ މަދު ވަގުތުކޮޅުގެ ބޭނުން ހެޔޮގޮތުގައި ހިފޭތޯ އެންމެންވެސް ބަލައެވެ. ކަރަންޓް ކަނޑާލުމުގެ ކުރިން ޝާނީގެ މަންމައާއި ބައްޕަވެސް ނިދާނެއެވެ.
ޝާނީވެސް ރޭގަނޑުގެ ކެއުމަށްފަހު ކޮޓަރިއަށް ވަނެވެ. ނަމަވެސް ކަރަންޓް ކަނޑާލިއިރުވެސް އޭނާގެ ލޮލަކަށް ނިންޖެއް ނައެވެ. ކޮޓަރީގައި އޮވެ ހޫނުވާން ފެށުމުން އޭނާ ގަސްތުކުރީ ގޯތި ތެރެއަށް ނުކުމެ ލުމަށެވެ. އޭނާ ވަރަށް މަޑުމަޑުން އެހާމެ ސިއްރުން ނުކުމެ ގޯތިތެރޭގައިވާ ޖޯލިފަތީގައި ޝާނީ އޮށޯތެވެ. ރެއަކީ ހަނދުމަހުގެ ސާދަވިލޭރެއެވެ. ހަނދުގެ ބުރުހަމަވީ ހިތްގައިމު ރެއެކެވެ.
އުޑުމަތި ސާފު ރީތި ރެއެއްކަމުން އުޑުމަތީގައިވާ ބުރުހަމަ ހަނދުގެ އަލިކަން މުޅިދުނިޔެއަށްވަނީ ފެތުރިފައެވެ. ބަނބުކެޔޮ ގަހުގެ ފަތްތަކުގެ ތެރެއިން ފުރޭނިގެން ގޯތިތެރެއަށް އެޅިފައިވާ ކޮކާ ހަނދުވަރުގެ ހިތްގައިމުގެ މިސާލެއްނެތެވެ. މިފަދަ ރެއަކު ދޮންވެލި ތުނޑިވެސް ނުހަނު ހިތްގައިމުވާނެކަން އޭނާއަށް އެނގެއެވެ. އޭނާއަށް އެކަނި ދާން ކެރޭނަމަ ކޮންމެ ރެއަކުވެސް އޭނާ ތުނޑިއަށް ދާނެކަން ގައިމެވެ.
ޖޯލީގައި އިރުކޮޅަކު އޮތުމަށްފަހު އޭނާ ތެދުވެ މަގުމައްޗަށް ނުކުތެވެ. އޭނާގެ ގެޔަކީ ބޮޑުމަގުން ވަދެވޭގޮތަށް އޮންނަ ގޯޅިއެއްގައި ހުންނަ ގެޔެއްކަމުން އެގޯޅީގައި ހުރެގެން ހަނދުވަރުގެ ރީތިކަން ނުފެންނާނެކަން އޭނާއަށް އެނގެއެވެ. އެހެންކަމުން އޭނާ މަޑުމަޑުން ރަށުގެ ބޮޑުމަގަށް ނުކުތުމަށް ގަސްތުކުރިއެވެ. ދެކޮޅު ހޯދަމުން ގޮސް ބޮޑުމަގަށް ނުކުތް އިރުވެސް އެއްވެސް މީހެއްގެ ހިލަމެއްނުވެއެވެ.
“ ރަށު އެންމެންވެސް ނިދީބާ؟..“ އޭނާ ހިތާ ހިތާ ސުވާލުކޮށްލިއެވެ.
ބޮޑުމަގަކީ ރަށުގެ ދެފަރާތު ގޮނޑުދޮށާއި ޖެހޭންދެން އޮންނަ ދިގު މަގެކެވެ. މަގުގެ މެދުގައި ހުރެ ބަލާލުމުގެ ރަށުގެ މީހުން އުޅޭ ގިނަ ގޭގެ ފެންނާނެއެވެ. އެހިސާބުން އޭނާއަށް އޭނާގެ ދޮންތަމެންގެ ގެވެސް ފެނެއެވެ. އެއީ ރަށުގެ އެންމެ އިރުމަތީގައިވާ އެއް ގެއެވެ. އޭނަގެ ގެ ހުންނަނީ ރަށުގެ އެންމެ ހުޅަނގުގައެވެ. އޭނާ ބަލަން ހުއްޓައި އެދިމާއިން މީހަކު އަންނަ މަންޒަރު ފެނުމުން އޭނާ އަވަސް އަވަހަށް ފާރުކައިރިއަށް ޖެހިލިއެވެ. އެހާދުރުން އެއީ ކާކުކަން ނޭނގުނު ނަމަވެސް އެއީ އިސްކޮޅުން ދިގު މީހެއްކަން އެނގުނެވެ. އޭނާ އެންމެ ކައިރީގައިހުރި ގޭގެ ގޯތިތެރެއަށް ކުޑަކޮށް ޖެހިލައި ފިލިއެވެ. އެހެން ހުއްޓައި އެގޭގެ ދޮރުގެ ތަންޑު ނެއްޓިއަޑަށް ހަނދާނެއް ގޮތެއް ނޭނގިގެން ގޯތިތެރެއިން ގަހެއްގެ ބުޑަށްވަދެ ފިލިއެވެ.
“ އަންނާނަން ގެޔަށް ގޮސްލާފަ އިރުއޮއްސުނުއިރު ނުކުތްގޮތަށް މިއުޅެނީ…މަ ނުދަނީސް ނުކާން އިންނާނެ އަނބިގޮއްޔެ… އޭނަ ނިދީމަ އަންނާނަން…ނުނިދާ ހުންނައްޗޭ!….“ އެގެއިން ނުކުތްމީހާ ގޭތެރޭގައި ހުރި މީހަކާ މުޚާތަބުކޮށް ބުނާއަޑު އިވުނެވެ. އެއަޑަކީ އޭނާ ނުހަނު ގިނައިން އަހާ ފަރިތަވެފައިވާ އަޑެއްކަމުން އެއީ ކާކުކަން ވަގުތުން އޭނާއަށް އެނގުނެވެ.
“ ހާރިޝްބެ…“ ހިތާ ހިތާ އޭނާއަށް ބުނެވުނެވެ.
“ ކިތަންމެ ލަހުން އަޔަސް ނުނިދާނަން…. ފަތިސްވިޔަސް އިންތިޒާރު ކުރާނަން…“ ގޭތެރޭގައި ހުރި އަންހެން މީހާގެ އަޑުއިވުނެވެ.
“ އާތިކާ؟…“ އެއީ ކާކުކަން އެނގުމުން ޝާނީއަށް ކިޔާލެވުނެވެ. އާތިކާއަކީ އޭނާއާ ދާދި އެއް އުމުރެއްގެ ޒުވާން އަންހެން ކުއްޖެއެވެ. މާލޭގައި ކިޔަވައި ނިމިގެން ރަށަށް އައިތާ އަދި ގިނަ ދުވަހެއް ނުވެއެވެ. ޝާނީގެ ހިތުގައި އެތައް ސުވާލެއް އުފެއްދުމަށްފަހު ހާރިޝް އެގެއިން ނުކުމެގެން ހިނގައްޖެއެވެ. ހާރިޝް ދިޔަތާ އެތައްއިރެއްފަހުން ޝާނީ އެހުރިތަނުން ނުކުތެވެ. އޭނާ ވިސްނުމެއްގައި ހުރެ ގެޔަށްދާން ގޯޅި އަޅާލި ވަގުތު މީހެއްގެ ގައިގާ ލައިގަތުމުން ސިހިފައި އޭނާއަށް ހަޅޭއްލަވައިވެސް ގަނެވުނެވެ. އެއީ ހާރިޝްކަމުގައި ހިތައި އޭނާ ނުހަނު ބިރުގަތެވެ.
“ ޖިނާހް…“ ދެލޯބޮޑުކޮށްފައި ބަލާލި ވަގުތު އެއީ ޖިނާހްކަން އެނގުމުން އޭނާއަށް ހަމަޖެހުމުގެ ނޭވާއެއް ދޫކޮށްލެވުނެވެ. އެވަގުތު ޝާނީ ފެނުމުން ޖިނާހްވެސް ހުރީ ނުހަނު ހައިރާންވެފައެވެ. އަދި ޝާނީ މަގުމަތީގައި ކުރަނީ ކީއްތޯވެސް އަހާލިއެވެ. ނިދި ނައުމުން ބޭރަށް ނުކުތީކުކަމުގައި އޭނާއަށް އެނގުނު ގޮތަކަށް ޖިނާހްއަށް ބުނެލިނެވެ. ޖިނާހްއަށް ޝާނީ ބުނީ ކީކޭކަން ދެނެގަނެވުނެވެ. ޝާނީވެސް ޖިނާހްގާތުގައި ހަމަ އެސުވާލު ކުރިއެވެ. ޖިނާހްވެސް ދިނީ އެޖަވާބެވެ.
“ އޭރު އެކޮޅުން އެއައީ ޖިނާހްބާ؟…ދެން ކީއްވެ އޭނާ މިގޯޅިން ނުކުންނަންވީ؟…“ ޝާނީ އެސުވާލު ކުރަން ހިތަށް އެރުމާއެކު ހާރިޝްމަތިން ހަނދާންވިއެވެ. ހާރިޝް ފެނުމުން ޖިނާހް ފިލަންވެގެން ގޯޅިއަށް ވަނީކަމަށް އޭނާ ލަފާކުރިއެވެ. ހާރިޝްދެކެ ޖިނާހް އަބަދުވެސް ބިރުގަނެ ޖެހިލުންވާކަން އޭނާއަށް އެނގެއެވެ. ޝާނީ ވިސްނުމެއްގައި ހުއްޓައި ޖިނާހް ކޮށްޓާލުމުން އޭނާ ސިހުނެވެ. ޝާނީ ބަލާލުމުން ޖިނާހް އެހީ އޭނާއާ އެކީ ހިނގާލަން ދާން ބޭނުންތޯއެވެ. ޖިނާހް އެހެން އަހާފާނެ ކަމަކަށް އޭނާ ހީކޮށްފައެއްނެތެވެ. ޖިނާހް އެހުމުން އޭނާ ޖެހިލުންވިއެވެ. އަދި މީހަކަށް ފެނިދާނެތީ ބިރުގަންނަ ވާހަކަ ބުންޏެވެ. ނަމަވެސް ޖިނާހް ހީލާފައިބުނީ އެންމެ މިވަގުތު ނިދާފަ ތިބޭނެ ވާހަކައެވެ.
“ ނޫނޭ…މީހުން ހޭލާ އެބައުޅެއޭ…“ ބިރުންހުރެ ޝާނީއަށް މަޑުމަޑުން ބުނެވުނެވެ. އޭނާއަށް ހާރިޝް ފެނުނު ވާހަކަވެސް އޭނާ ބުނެދޭން ބޭނުންވިއެވެ.
“ ދެންމެވެސް މިހިރަ ޖެހިގެންހުރި ގެއިން ހާރިޝް ބޭބެ ނުކުތް…އެގޭ އާތިކާވެސް އުޅެނީ ހޭލާ…“ ޝާނީ ތިރިވެފައި ބިންމަތީގައި ލިޔެލިއެވެ. ޖިނާހް ގުދުވެލަމުން ޝާނީ ލިޔުނު އެތި ކިޔާލިއެވެ. އަދި ޝާނީގެ މޫނަށް ބަލާލަމުން އޭނާވެސް ބިންމަތީގައި އެއްޗެއް ލިޔެލިއެވެ.
“ އަހަރެންނަށްވެސް ކުރިން ރެޔަކު އެމަންޒަރު ފެނިއްޖެ…މިރޭވެސް އޭނަ ގެޔަށް ދަނިކޮށް ފެނިގެން ފިލިއިގެން މިއައީ…“ ޖިނާހްގެ ޖަވާބު ޝާނީ ކިޔާލިއެވެ.
“ އޭނަ ހާދާ ގޯހޭ…ދޮންތަގާތު ބުނަންވީ ކަންނޭނގެ…“ ޝާނީ އޭނާގެ ޚިޔާލު ފާޅުކުރިއެވެ.
“ މިތާ ތިއްބާ މީހަކަށް ފެނިދާނެ…ތުނޑީކޮޅަށްދާނަންތަ….އެތާ ތިބެގެން ވާހަކަ ދެއްކިދާނެއްނު…“ ޖިނާހް އެދުނެވެ.
“ އެތާ ތިއްބަސް މީހަކަށް ފެނިދާނެ….އޭރުން މާ ގޯސްވާނެ…“ ޝާނީ ޖަވާބު ދިނެވެ.
“ ހަނދުވަރު ދޭ ރޭ ރޭ އަހަރެން ވަރަށް ގިނައިން ދާން….އެއްވެސް މީހަކަށް ނުފެނޭ….މިރޭ އެކަނި ދެވިދާނެތަ؟…ތުނޑީކޮޅުން ހަނދުވަރު ފެންނަލެއް މާރީތި….“ ޖިނާހް އަނެއްކާވެސް އެދުނެވެ.
“ އެކަމުވެސް ބިރުގަނޭ….“ ޝާނީ ޖެހިލުންވިއެވެ.
“ އެންމެ ރަނގަޅު….އަހަރެން ދަނީ….ޝާނީވެސް ގެޔަށްދޭ…“ އެންމެފަހުން ޖިނާހް ހަތިޔާރު ބެހެއްޓިއެވެ.
ޝާނީ އިތުރު އެއްޗެއް ނުބުނެ ގެޔަށް ދިއުމަށް ހިނގައިގަތެވެ. އޭނާ ކިތަންމެ ދާހިތްވީ ނަމަވެސް އަދި ޖިނާހްއާއެކީ މިވަފަދަ ވަގުތެއްގައި ތުނޑީކޮޅަށް ދާކަށް ނުކެރޭނެއެވެ. ޝާނީ ދާމަންޒަރުބަލަން ހުރުމަށްފަހު، އެމީހުން ބިންމަތީގައި ލިޔުނު އެއްޗެހި ފުހެލުމަށްފަހު ޖިނާހް ހިނގައިގަތެވެ. ޝާނީ އޭނާގެ ފަހަތުން އަންނާނެ ނަމައޭ އޭނާގެ ހިތަށްއެރިއެވެ. ނަމަވެސް އެއީ އެންމެ ރަނގަޅުގޮތެއްނޫންކަންވެސް އޭނާއަށް އެނގެއެވެ. ޝާނީގެ މައްޗަށް އޭނާގެ އެއްވެސް ހައްޤެއް ނެތެވެ. ވީއިރު، އޭނާ ޝާނީ ގާތު އެހެން އެހުނީތީވެސް ލަދުގަތެވެ.
ޝާނީ އެނދުގައި އޮވެގެން ވިސްނަމުން ދިޔައެވެ. ޖިނާހް އޭނަގާތުގައި އެހާފަސޭހައިން ތުނޑިއަށްދާން ބުނީ ކީއްވެބާއެވެ. އޭނާ ޖިނާހްއާއެކު ގޮސްދާނެކަމަށް ޖިނާހްއަށް ހީވީބާއެވެ. ޖިނާހްއާ އޭނާ ގަޔާވާކަން ޖިނާހްއަށް އެނގުނީބާއެވެ. ތެދެކެވެ. އޭނާ ޖިނާހްއާއެކީ ދާހިތްވެއެވެ. ހަނދުވަރުގެ ރީތިކަން ބަލާލާ ހިތްވެއެވެ. އެކުގައި މުޅިރޭވެސް ހޭދަކުރާ ހިތްވެއެވެ. ނަމަވެސް އެހާ ހިތްވަރެއް އޭނާގެ ނެތެވެ. އޭނާގެ މައިންބަފައިންގެ ތަރުބިއްޔަތުގެ ސަބަބުން އެފަދަ ގޮތަކަށް، މެންދަމުގެ ވަގުތުގައި ފިރިހެނަކާއެކީ އެކަހެރިވާން ޖެހިލުންވަނީއެވެ. އަދި އަމުދުން ޖިނާހްއާއެކީގައި ވުމަށް ޖެހިލުންވަނީ އޭނާގެ ހިތުގެ މައްޗަށް ބާރުނުފޯރުވި، ގޯސްކަމަކަށް މަގުފަހިވެދާނެ ކަމަށްޓަކައެވެ.
އަނެއްކޮޅުން، އެކަނިމާއެކި ތުނޑީގައި އިން ޖިނާހްވެސް ވިސްނަމުން ދިޔައީ ޝާނީއާއި މެދުގައެވެ. ޝާނީއަށް އޭނާގެ ހިތް ދެވިއްޖެތާ ކިތަންމެ ދުވަހެކެވެ. ބަހުން އިޤުރާރު ނުވީ ނަމަވެސް އޭނާގެ އަމަލުތައް އެކަމަށް ހެކިދޭނެއެވެ. ނަމަވެސް މިރޭ އޭނާއަށް ކުރެވުނު ކަމަކުން ޝާނީ އޭނާއާމެދު ގޯސްގޮތަކަށް ވިސްނަފާނެ ކަމަށްޓަކައި އޭނާ ބިރުގަތެވެ.
އޭނާ ޝާނީގާތު ތުނޑިއަށް އައުމަށް އެދުނީ އެއްވެސް ގޯސްނިޔަތެއް އޮވެގެންނެއް ނޫނެވެ. ހަމައެކަނި ހަނދުވަރުގެ ރީތިކަން ޝާނީއަށްވެސް ދައްކާލަން ބޭނުންވީއެވެ. ގުދުރަތީ އެރީތި ހިތްގައިމުކަން، ޝާނީއާ އެކުގައި ބަލާލަން އެދެވުނީއެވެ. ދޮންވެލިގަނޑު މަތީގައި އޮށޯވެ ބުރުހަމަ ހަނދަށް އޭނާ ބަލާލިއެވެ. އެއީ ކިހާހިތްގައިމު ރީތިކަމެއް ހެއްޔެވެ. ކޮންމެ އިންސާނެއްގެ ހިތުގައިވެސް ހަނދަށް ދެވިފައިވަނީ ޚާއްސަ މަޤާމެކެވެ. އެރީތިކަން ފެނުމުން އުފާނުވާނެ މީހަކު އުޅެދާނެބާއެވެ. އުޑުމަތީގައިވާ ގިނަގުނަ ތަރިތަކުގެ ތެރޭގައި ރަނިކަންކުރާ ހަނދުފަދައިން އޭނާގެ ހިތުގައި ޝާނީވެސް ރަނިކަންކުރަމުންދަނީއެވެ. އެހަނދު ފެނުމުން އެކަނިވެރި އާޝިޤަކަށް ލިބޭ އުފާ، ޝާނީ ފެނުމުން އޭނާއަށްވެސް ލިބެއެވެ.
ރަށުގައި އުޅޭ ހުރިހާ އަންހެން ކުދިންނާއި ޚިލާފަށް އޭނާގެ ހިތުން ޖާގައެއް ހޯދި ހަމައެކަނި އަންހެން ކުއްޖަކީ އެއީއެވެ. އޭނާގެ ހިތް ޝާނީއަށް ފިދާވަމުން ދިޔަ ނަމަވެސް ޝާނީގެ ހިތްއޮތީ ކިހިނެއްކަމެއް މުޅިއެކުން އޭނާއަކަށް ޔަޤީނެއްނޫނެވެ. ޝާނީވެސް އޭނާދެކެ ލޯބިވެޔޭ ބައެއް ފަހަރު އޭނާގެ ހިތަށް އަރައެވެ. ނަމަވެސް އަނެއްބައި ފަހަރު އޭނާގެ ހިތްބުނަނީ އެއީ ހަމްދަރުދީ ކަމުގައެވެ.
ކުޑައިރުވެސް ޝާނީ އޭނާއަށް ހަމްދަރުދީވެއެވެ. އެނޫން ނަޒަރަކުން އަންހެން ކުއްޖަކު އޭނާއާ ދިމާ ބަލާފާނެ ހެއްޔެވެ؟ އޭނާފަދަ އުނި މީހަކުދެކެ ލޯބި ވެދާނެ ހެއްޔެވެ؟ އޭނާއަށް ޝައްކެވެ. ޝާނީގެ ލޯބި ޔަޤީންކުރަން އޭނާ ހަދާނީ ކިހިނެއް ހެއްޔެވެ؟ ސުވާލުކުރާނީ ހެއްޔެވެ؟ ނޫނީ އޭނާ ލޯބި ހުށަހަޅާފައި ޖަވާބަކަށް އިންތިޒާރުކުރަން ވީ ހެއްޔެވެ؟ ނޫނެކެވެ. ބަދުނާމު ވާކަށް އޭނާ ބޭނުމެއްނޫނެވެ. ވިސްނާ ފިކުރުކުރުމުގައި ރޭދެބައިވާންދެން ޖިނާހް ތުނޑީގައި އޮތުމަށްފަހު އޭނާ ގެޔަށްއައީ ފަތިސްވުމާއި ގާތްވުމުންނެވެ.
ނުނިމޭ- ވާހަކަ ކަމުދިޔަ ނަމަ fenvaru.mv ގެ އެފްބީ ޕޭޖަށް ލައިކެއް ދެއްވާ. އަދި ވާހަކަ ޝެއަރ ކޮށްލަދެއްވާ.
