”އެއީ ހާދަ ހަލަނި ސޮރެކޭ. އަބަދުވެސް އުޅެންޖެހެނީ ކޮންމެވެސް ތަނަކުން ވެއްޓި ތަނަކަށް ތަދުކޮށްލައިގެން. އެކަމުގެ ހަނދާން ނުނެތެނީސް އަނެއްކާހަމަ ނިކުމެ އެކުރަން އުޅުނުކަމެއް ކާމިޔާބު ކުރަން މަސައްކަތްކުރާ ތަން އަނެއް ދުވަހު ފެންނާނެ. އެސޮރު ބޭނުންވާ ގޮތަށް އެކަން ކާމިޔާބު ކޮށްފަ ނޫނީ ހުއްޓައެއް ނުލާނެ“.
ހިތްވަރާ ވަރުގަދަ އަޒުމަކާއެކު ސިޔާސީ ދާއިރާއަށް ނިކުމެ ހުރި ރ. މަޑުއްވަރީއަށް އުފަން މޫސާ އަލިމަނިކު (މޫކޭ) އާ ގުޅޭގޮތުން އޭނާގެ މަންމަގެ ބަހަކީ މިއީއެވެ.
ސިޔާސީ މައިދާނުން މިއަދު ފެންނަން ހުރި އެންމެ ޒުވާން ޝަހުސިއްޔަތާ މެދު އިންސާފުގެ ނަޒަރަކުން އެއްޗެއް ބުނާ ކޮންމެ މީހަކުވެސް މޫކޭގެ ހިތްވަރާ ސާބިތު ކަމަށް ތައުރީފު ކުރާނެ އެވެ. ރައީސް ޔާމީންގެ އަނިޔާވެރި ވެރިކަމާ ދެކޮޅަށް ފާޅުގައި ނިކުމެ ހައްގު ބަސް ބުނުމުގައި އަދި އިސްލާހީ މަސައްކަތުގައި މޫކޭގެ ސާބިތުކަން ވަނީ ދައްކުވައިދީފަ އެވެ. ބޮޑެތި އަނިޔާތަކާއެކު ޖަލު ގޮޅީގައި އޮންނަން ޖެހޭނެކަން އެނގޭ ހާލުވެސް ގަައުމާއި ރައްޔިތުންގެ ހައްގުގައި އިސްލާހީ ބައިވެރިންނާއެކު ނިކުމެ ކުރި މަސައްކަތުން އެތައް އަނިޔާތަކެއް ލިބި އެތައް ދުވަހަކު ޖަލުގައި ހޭދަކުރަން ޖެހުނެވެ. އަނބިދަރިންނާއި ލޯބިވާއާއިލާއާއި ދުރުގައި އެތައް ދުވަހެއް ޖަލުގެ ތޭރިތަކުގައި ހޭދަކުރީ ރާއްޖެއަށް ހެޔޮވެރިކަމެއް ގެނެސްދީ ރައްޔިތުން އެދޭ ބަދަލު މި ގައުމަށް ގެނެސް ދިނުމަށެވެ.
އެއްވުންތަކާއި މުޒާހަރާތަކުގައި ޒުވާން ލީޑަރެއްގެ ގޮތުގައި މޫކޭ މަަސައްކަތްކުރީ ގައުމާމެދު އޮތް ހާއްސަ ލޯތްބެއްގެ ބޮޑުކަމުންނެވެ. އިސްލާހީ ހެޔޮ ބަދަލުތައްގައުމަށް ގެންނަން ޖެހޭ ކަމަށް ގަބޫލު ކުރެވޭތީއެވެ. އެ މަަސައްކަތުގައި ދިވެހި ރައްޔިތުންވީ ބޮޑު ގުރުބާނީގައި މޫކޭގެ ދައުރު ކޮންމެ ދިމާއަކަށް ބަލާލިޔަސްފެންނަން އެ ހުރީއެވެ. ބައިނަލްއަގްވާމީ މީޑިއާތަކުގައި ރާއްޖޭގެ ހާލަތު އޭރު ގެނެސްދޭން ބޭނުންކުރި އެކި ފޮޓޯތަކުގެ ތެރެއިން މުޅި ދުނިޔެ އެ ފޮޓޯއަކަށްނަޒަރު ހުއްޓުނު ފޮޓޯއަކީ އެއްވުމެއްގެ ތެރެއިން މޫކޭއަށް އަނިޔާވެފައިވާ މަންޒަރު ފެންނަ ފޮޓޯއެވެ.
ސިޔާސީ މަައިދާނަށް ނިކުތުމުގެ ކުރީން މޫކޭއަކީ މަޑުއްވަރީގެ ޓީޗަރެކެވެ. 2005 ވަނަ އަހަރު މޫކޭ ތައުލީމީ ދާއިރާގެ ޚިދުމަތް ފެށީ ވަގުތީ ޓީޗަރެއްގެ ވަޒީފާއިންނެވެ. އެ މަަސައްކަތުންވެސް މޫކޭ ދެއްކީ ވަރަށް ފުރިހަމަ ނަމޫނާއެވެ. އަހަރު ދުވަހުގެ އެ ޚިދުމަތް ނިންމާލީ ދަރިވަރުންނާއި ބެލެނިވެރިންގެ ހާއްސަ ލޯތްބެއް އޮތްމީހެއްގެ ގޮތުގައެވެ. އެފަހުން އެއީ ރ. އުނގޫފާރުގެ ކުޑަކަތީބެވެ. ސިޔާސީ މައިދާނަށް ލޯ ހުޅުވި އެ މަަސައްކަތުގެ ފެށުމަކީ އެއީއެވެ. ރައްޔިތުންނަށް ހިދުމަތްކުރުމާއި ގައުމީ މަަސައްކަތަށް ނިކުތުމުގެ ޝައުގުވެރިކަން އުފެދުނީ އެހިސާބުންނެވެ.
އެ މަަސައްކަތް މޫކޭ ފެށީ އޭނާއަށް ކުރިމަތިވެދާނެ ދަތި އުނދަގޫތައް އިހުސާސް ކުރެވޭ ހާލުގައެވެ. ލިބޭނެ އަނިޔާތައް ވަޒަން ކުރެވޭ ހާލުގައެވެ. ނަމަވެސް ރައްޔިތުންނަށް ލިބެންޖެހޭ ހައްގު މިންވަރު ހޯދަން ބަޔަކު މަސައްކަތް ކުރަަންޖެހޭ ކަމަށް އޭނާއަށް ގަބޫލުކުރެވުނެވެ. މޫކޭއަށް ފެނުނީ ހައްގުތަކުން މަހުރޫމް ވެފައިވާ ރައްޔިތެކެވެ. އަސާސީ ހައްގުތަކަށްޓަކައި ސަލާން ޖަހަމުން ދިޔަ ރައްޔިތުންތަކެކެވެ. އެހެންވީމަ އެ ހާލަތު ބަދަލު ކުރަން އަޒުމުކަނޑައެޅިއެވެ. އެ އަޒުމާއެކު ވަގުތުން މަސައްކަތް ފެށިއެވެ. ބިރެއް ޖެހިލުމެއް ނެތި ރައްޔިތުންގެ ހައްގުގައި ވަކާލާތު ކުރަން ފެށިއެވެ. އަދިވެސް އެމަަސައްކަތުގައި ސާބިތުވެ ހުރީ އެ އުންމީދުތަކުގައި ހަގީގީ ކުލަ ޖެއްސުމުގެ ފޮނި އުންމީދުގައެވެ.
ސިޔާސީ މަސައްކަތުގައި ފެށުނު ދަތުރުގައި އެމްޑީޕީގެ މަޑުއްވަރީ ދާއިރާގެ ރައީސްކަމުގެ މަގާމު ހުސްވެ އެ މަގާމަށް ކުރިމަތިލާނެ ޕާޓީގެ މެންބަރަކު ނެތް ހާލަތެއްއައެވެ. އެ ވަގުތު އެކަމަށް އިސްނެގީވެސްއެއްކަލަ ހިއްވަރުގަދަ މޫކޭ އެވެ. ދާއިރާއިން އެކަކުވެސް ނުވި އެ ވަގުތު މޫކޭގެ އެ އިސްނެގުން އައީ ދާއިރާއާ ރަައްޔިތުންނަށް އަދި މުޅި ޤައުމަށް ޚިދުމަތް ކުރުމާއި އިސްލާހަށް ކުރަމުން އައި މަސައްކަތް އިތުރު ހަރުފަތަކަށް ގެންދިއުމުގެ އުންމީދުގަ އެވެ. ނަމަވެސް ޕާޓީގެ ގައުމީ މަޖިލީހުގައި އެންމެއިސް ސަފުގައި ފަށާ މަސައްކަތަކީ އެއް ގޮތަށްވުރެ ގިނަ ގޮތްގޮތުން ގޮންޖެހުންތަކާއި ބިރުވެރިކަން ކުރިމަތިވާނެ ކަމެއްކަންވެސް އެނގި ހުރެއެވެ. އަދި ތަފާތުއަނިޔާތަކާއި ބިރުދެއްކުންތައް ކުރިމަތިވާނެކަންވެސް އެނގިހުރެއެވެ. ނަމަވެސް މޫކޭގެ އޮތީ މާސާފު އެހާމެ ބޮޑު ތަސައްވުރެކެވެ. މަޑުއްވަރީ ދާއިރާއަށްޓަކައިމޫކޭގެ އުންމީދުތައް އެޔަށްވުރެއް މާބޮޑެވެ.
ގާނޫނީ ވަކީލުކަމުގެ ދާއިރާއިން ފުރަތަމަ ޑިގުރީ ނިންމައި ސިޔާސީ މައިދާނުގައި މޫކޭ އިތުރު ފިޔަވަޅެއް ކުރިއަށް އެޅި ދުވަސްވަރަކީ ސިޔާސީ ގޮތުން ރާއްޖެ ދުށް އެންމެ ބިރުވެރި ދުވަސްތަކެވެ. ސިޔާސީ ލީޑަރުންނަށް ހިތުހުރި ގޮތަކަށް އަނިޔާ ކުރަމުން އައި ދުވަސްތަކެކެވެ. ގައުމުގެ ހަޒާނާ މުޅީން ހުސްކޮށްލި އެވެ. މިރީތި ކުދި ޖަޒީރާ ރަށްތައް ވިއްކައި ހުސްކުރަމުން ދިޔައެވެ. ދީނަށް ފާޅުގައި ގޮންޖަހާ އެންމެ މަތިން ފެށިގެން ވާހަކަ ދައްކާ އަޑުތައް އިވެއެވެ. އިންސާފާއި ހަމަހަމަކަން ފާލުން ނެއްޓި އަނިޔާވެރިކަން އިންތިހާއަށް ދިޔައެވެ.
ކޮންމެ އެއްވުމަކުން އަދި މުޒާހަރާއަކުން އެތައް ބަޔަކު އަނިޔާވެރިކަމާއެކު ދިޔައީ ހައްޔަރު ކުރެވުމުންނެވެ. އެހެންވީމަ ގާނޫނީ އެހީތެރިކަން ބޭނުންވާ އެތައްބަޔަކު އެމްޑީޕީގެ ސަޕޯޓަރުންގެ ތެރޭގައި ތިއްބެވެ. މޫކޭއަށް ލިބިފައިވާ ތައުލީމާއި ތަޖުރިބާގެ އަލީގައި ދެވެން އޮތް ހުރިހާ އެހީތެރިކަމެއް ދިނެވެ. އަދި މަގުމައްޗަށް ނިކުމެ މުޒާހަރާތަކުގެ އެންމެ ކުރީގައިވެސް ހަރަކާތްތެރިވިއެވެ. ޓީވީ ޕްރޮގްރާމްތަކާއި ލައިވް އިވެންޓްތަކުގައި ބައިވެރިވެ ގައުމުގެ ހާލަތު އަންގައިދެމުން ދިޔައެވެ.
އިސްލާހީ މަސައްކަތަށް ތާއީދު ހޯދާ އެ ހަރަކާތް ވަރުގަދަކޮށް ފުޅާކުރަން ކުރިއަށް ގެންދިޔަ ހަރުގެ ޖަލްސާތަކުގައި އެންމެ ފޯރީގައި ބައިވެރިވެ އޭރު އޮތް އަނިޔާވެރި ސަރުކާރަށް އެންމެ ހޫނުކޮށް ބަހުގެ ހަމަލާ ދީފައިވަނީ މޫކޭ އެވެ. އިސްލާހީ ވަރުގަދަ އެ ހަރަކާތުގައި މަޑުއްވަރީ ދާއިރާގެ ނަން ރަން އަކުރުން ފެވުނީ ދާއިރާގެ ހިތްވަރު ގަދަ ރައީސްގެ ބުރަ މަަސައްކަތުންނެވެ. ދާއިރާގެ މެންބަރުންގެ ހިތްވަރު ގަދަ މަަަސައްކަތުން ނެވެ.
ރައްޔިތުންގެ ގިނަ ބަޔަކު ކުރި ބުރަ މަސައްކަތުން މިއަދު މިވަނީ ހާލަތު ބަދަލު ކުރެވިފައެވެ. އަނިޔާވެރި ހިތްދަތި ކަޅު ދުވަސްތަކަށް ނިމުން ގެނެވިފައެވެ. ޖަލުގައި ހޭދަކުރަން ޖެހުނު ބިރުވެރި ދުވަސްތައް ނިމުމަކަށް އައީއެވެ. އާއިލާ ދުރުގައި ހޭދަކުރި ދުވަސްތަކަށް ނިމުން އައީއެވެ. އެ ދުވަހު އެ ގުރުބާނީ ނުވިނަމަމި ދުވަސް ނުފެނުނީހެވެ.
ކުރިއަށް އޮތް އެމްޑީޕީގެ ޤައުމީ މަޖިލީހުގެ އިންތިޚާބުގައި މަޑުއްވަރީ ދާއިރާގެ ރައީސް ކަމަށް ހިތްވަރު ގަދަ ދާއިރާގެ ރައީސް މޫކޭ އައު ދައުރަކަށް ކުރިމަތިލަނީ އެދުވަހު ގައުމަށް ވާނެ ގޮތެއް ވާން ދޫކޮށްނުލައި މައިދާނަށް ނިކުމެ ހައްގުގައި މަސައްކަތް ކުރި ފަދައިން އެމްޑީޕީ އާއި މަޑުއްވަރީ ދާއިރާ އަދި މުޅި ރާއްޖެއަށް ޚިދުމަތް ކޮށް ދިނުމުގެ ފޮނި އުއްމީދާއި މަތިވެރި މަގުސަދުގައެވެ. ދާއިރާގެ ރައްޔިތުންގެ ހައްގުގައި އަދި ދިވެހި ގައުމާއި ރައްޔިތުންްގެ ހައްގުގައި އާރުޑީސީގެ އެމްޑީގެ ގޮތުގައި ހުންނަވައިގެން ކުރައްވަމުން އެގެންދަވާ އަގު ނުކުރެވޭނެ މަސައްކަތްތައް އެ ގޮތުގައި ކުރިއަށް ގެންދިއުމުގެ ވަރުގަދަ އަޒުމުގައެވެ.
ދާއިރާގެ ރައީސްގެ މަގާމުގައި ހުރެ ދާއިރާއަށް ގިނަގުނަ ހިދުމަތް ކުރި މޫކޭ މިއަދުވެސް ކުރިމަތި ލަނީ ނުހަނު ލޯތްބާއިއެކުގަ އެވެ. މޫކޭގެ އޮތް ބޮޑު އަމާޒާ އެކުގައެވެ. ގޮންޖެހުމާއި މަލާމާތް އަދި ފުރައްސާރައިން ފަހަތަށް ޖައްސައިނުލެވޭނެ ކަމުގެ ޔަގީންކަމާއެކު ޕާޓީއާ ދާއިރާގެ ހައްގުގައި ފަހަތަށް ނުޖެހޭނެކަން ސާބިތު ކޮށްދެމުން ނެވެ.
މޫކޭގެ އެދުމަކީ މަޑުއްވަރީ ދާއިރާގެ އެމްޑީޕީގެ ލޮބުވެތި މެންބަރުންގެ ފުރިހަމަ ތާއީދު ދިނުމެވެ. ލޯތްބާއެކު މޫކޭއަށް ވޯޓު ދިނުމެވެ. މޫކޭ އާއި ރައްޔިތުންނާއި ދެމެދު އުފެދިފައިވާ ވަރުގަދަ ލޯބި މިފަހަރުގެ އިންތިހާބުން ދައްކައިދިނުމަށެވެ.
”ލޯބިން ގުޅޭ ދެ ހިތެއް ސަފުން ވަކިކުރެވިދާނޭތޯ“ އޭ ބުނާ ފަދައިން މޫކޭއާ މަޑުއްވަރީ ދާއިރާގެ ރައްޔިތުންގެ ގުޅުން އިންތިހާ އަށް ވަރުގަދަކަން ސާބިތުކޮށް ދިނުމެވެ. މޫކޭ ދޭ ޔަގީން ކަމަކީ މިހާރެކޭ އެއްގޮތަށް އަބަދުވެސް ފެންނާނެ ކަމެކެވެ. ދާއިރާގެރައްޔިތުންނާއެކު ތާ އަބަދުމެ މިގޮތުގައި ދެމި ހުންނާނެ ކަމެވެ. އެ ރައްޔިތުންގެ ގާތަށް އަބަދުވެސް އަންނާނެ ކަމެވެ.
މަޑުއްވަރީ ދާއިރާއަށް އަބަދުވެސް ކުރިއެރުމާއި ފާގަތިކަން ގެނުވާނޭ ފަތިހަކަށް، އުއްމީދީ ޒުވާން ލީޑަރު މޫސާޢަލިމަނިކު. މޫކޭ އިންތިޚާބު ކޮށް ދެއްވާށެވެ. ތިޔަ އަޚުންނާއި އުޚުތުންނަށް އުފާ ފާދަތި ބާއްޖަވެރި ދުވަސްތަކެއް ފެނިގެން ދާނޭ ކާމާއި މެދު ޝާއްކު ނުކުރައްވާށެވެ. މޫކޭ އަށް ވޯޓް ދެއްވާށެވެ.
ލިޔުނީ: ހުސައިން ފައިސަލް
